Read gitonga Luka 18 Bible Online

Luka 18 - gitonga bible

Luka 18

¹Khavbo avbo, a di va embela gipimaniso gi yeyedzago giguruvedzo nya gulombelele nyamba garala, khuye:

²“Dhoropani nya gukari a di romo mulamuli moyo a nga bani ari mwalo githawo ni Nungungulu ambari ni vathu vakwawe.

³A di gu vbanya nuye dhoropani mule nyamayi moyo nya noni a nga bani a gu tala gu hongola ndrangani ga mulamuli, aya, khuye: ‘Nyi lamule eni ni nala wangu.’

⁴Ma di vbindra matshigu nya gulaphe na gu bomba gu mu lamula; aholu litshigu limwedo a di pimisa, kharati: ‘Ambari nyi si thavigo Nungungulu, ni olu nyi si ningigo githawo vathu vakhwathu,

⁵nyi ngu lamula noni yeyi, yi nyi garadzago, gasi yi nyi dige nyi rula, yi siti nyi garadza gambe.’ ”

⁶Pfhumu a di engedza gambe, khuye: “Mu ngu si pwa iso si ganedwago khu mulamuli yoyu nya guvivbedwe khu monyo, gani?

⁷Ina Nungungulu khuye a na gumba lamula sihathwa saye, si mu ranago wutshigu ni mihani, ambari a gu gira gukhwatshi a gu hwela, gani?

⁸Nyi ngu mi embelani, khu lisine, kheni: A na dzegela gu si lamula. Ina gikhati a na wuyago Mwamana wa Muthu, a nata mana gukhodwa tigoni, gani?”

⁹A di va embela gambe gipimaniso gegi, gasi gu hevbudza vale va nga bani va gu dzi khusedza guvbindrisa, va gu dzi vega kha nga vathu nya gululame, va nyenya vakwawe,

¹⁰a di khuye: “Vama vavili va di bela Nyumbani ga Nungungulu vaya gira nombelo. Moyo a diri Mufarisi, mumbe a diri muhengisi nya khupho.

¹¹Mufarisi a di lombelela na emide, khuye: ‘Nyi ngu gu bonga, Nungungulu, kholu eni kha nyi fanani ni vambe vathu, va gu dzimbafa, va gu mwalo ndruda, va gu sibhayi; gambe kha nyi fanani ni mukhuphisi yoyu.

¹²Eni nyi ngu hala nyondro mbili khu semana, nyi ngu livba gikhaba nya silo sangu satshavbo.’

¹³Gasi muhengisi nya khupho, a di ema khu hwindzo, nyamba tiyela ni gu khusedza thamo, a di dzipwa nandru, a veta khana na gu khuye: ‘Nungungulu, nyi tsetselele, kholu nyi gighohi.’

¹⁴ Nyi ngu mi embelani, kheni: Oyu muhengisi nya khupho khugide khu vbale a hongola gaya na tsetseledwe, gasi mufarisi khandriso si nga mu dugelago. Kholu watshavbo muthu a dzi khusedzago a na vbwasamiswa, gasi uye a dzi sodzisago a na khusedzwa.”

¹⁵Va di mu yisela gambe sanana gasi a si kuha. Vapizane vaye, na va wonide esi, va di va kawuka.

¹⁶Aholu Jesu a di rana sanana sita vbafuvbi gwaye a ganela, khuye: “Digani sanana sita gwangu, mu nga si himbedzeli, kholu khwawe Mufumo wa Nungungulu.

¹⁷Khu lisine nyi ngu mi embelani, kheni: Uye a si hakhigo Mufumo wa Nungungulu kha nga gyanana gidugwanana, gima kha na wu mana.”

¹⁸Mujudha moyo nya guthavisege a di mu wudzisa, khuye: “Muhevbudzi nya wadi, ginani nyi fanelago gu gira, gasi nyi mane guvbanya nya gupindruge?”

¹⁹Jesu a di mu hakha, khuye: Khu ginani u gukhuwe nyi wadi? Uye a gu wadi moyo khu Nungungulu basi.

²⁰ U ngu yiti milayo yi gu, khiyo: U nga bhayi, u nga songi, u nga bi, u nga singedzi muthu, mwendro gu gira wukustumunyu nya malipha; rungudza babe wago ni mayi wago.

²¹Gasi uye a di khuye: “Muhevbudzi, nyi ngu landrisa satshavbo soso gukhugela wuphyani gwangu.”

²²Na pwide esi, Jesu a di mu embela, khuye: “Gimwegyo basi gi nga tshadego. Rengisa satshavbo u gu naso, u kabanisela dzitsapawu dzakone sisiwana, gasi u mane thomba ya Ndzadzini. Nu giride isoso, delu uta nyi landrela.”

²³Na pwide magana yaya, mwama nya gitetema a di garadzega ngudzu, kholu a diri ni dzithomba nya dzingi.

²⁴Na mu wonide kharati, Jesu a di khusa lito, khuye: “Gu ngu garadza ngudzu gu bela Mufumoni wa Ndzadzini avo va gu ni dzithomba!

²⁵Khidzo nyi mi embelago, gu vbevbugide gu vbulela lidzoke vbahogotunu nya tshingano, guvbindra gu dzega gitetema gi bela Mufumoni wa Ndzadzini!”

²⁶Avo va nga bani va mu pwa va di khavo: “Khu kharati khu mani a na vbanyiswago?”

²⁷Jesu a di hakha, khuye: “Iso si si kodzwigo gu girwa khu vathu, si ngu kodzega ga Nungungulu.”

²⁸Pedro a di mu embela, khuye: “Ethu hi digide silo sathu satshavbo hi gu landra.”

²⁹Uye a di khuye: “Khu lisine nyi ngu mi embelani nya gukheni: Mwalo a digago ndranga, mwangadzi, vandriyaye, vavelegi mwendro sanana khu kotani nya Mufumo wa Nungungulu,

³⁰a na gumba bweledzedwa mafuni momu, bwelo khavbo a mana guvbanya nya gupindruge ga limbe litigo li na tago.”

³¹Na dzegide vale nya likhumi na vavili, a di va embela, khuye: “Mu ngu, wonani, olu ha gu gwela Jerusalema, iyo si naya tadzisegago satshavbo sile si nga lowago khu vaprofeti na si gu lumba Mwamana wa Muthu.

³²A naya ningedwa ga va nya mayigo. A na vadwa, a saniswa ni gu hetshedwa.

³³Hwane nya gu bani va mu vetide khu dzimboma, va na mu songa. Aholu khu litshigu nya wuraru a na wuga khu gufani.”

³⁴Gani olu, avo kha va nga si pima a gu vbweta gukhuye ginani. Maganelelo yale ma di si beli mapimoni gwawe, khu kharato, kha va nga bani va dziti a gu thula ginani.

³⁵Na va gu vboha dhoropani ga Jeriko, va di mana gikhumu gimwegyo gi nga bani gi khade bambe nya ndzila, na gi gu lomba zomola.

³⁶Na gi pwide ligwaha nya vathu va nga bani va gu vbindra, gi di wudzisa, khigyo: Gasi ginani?

³⁷Gi di embedwa pwani khu Jesu wa Nazareta a vbindrago.

³⁸Khavbo avbo, gi di khusedza lito, gi lomba, khigyo: “Jesu, Mwamana wa Dhavhidhe, nyi pwele wuhindzi!”

³⁹Avo va nga bani va thangide va di gi kawuka, gasi gu gi degudza. Aholu igyo gi di vbindrisa gu gulumela, khigyo: “Mwamana wa Dhavhidhe, nyi pwele wuhindzi!”

⁴⁰Jesu a di ema, a gu gi ranisa. Na gi vbohide, a di gi wudzisa, khuye:

⁴¹“Wa guvbweta khuwe nyi gu rini?” Gi di hakha, khigyo: “Pfhumu, nya guvbweta kheni nyi wona!”

⁴²Jesu a di gi embela, khuye: “Wona. Gukhodwa gwago gu gu vbanyiside.”

⁴³Khu vbale, gikhumu gi di dzegela gu wona, gi gu mu landra, na gi gu dhumisa Nungungulu. Vathu vatshavbo, na va wonide esi, va di rungudza Nungungulu.