Read gitonga Luka 24 Bible Online

Luka 24 - gitonga bible

Luka 24

¹Litshigu nya guhegule nya semana, ni mambagugya, vanyamayi vale va di hongola thowotunu ni mafura va nga bani va dongisede.

²Va diya mana giwindri na gi rindrividzidwe hwindzo ni lithowo;

³va di bela, aholu kha va mana girumbi gya Pfhumu Jesu.

⁴Na va nga gu liwuga esi, va di tumbulugedwa khu vama vavili na va ambade dzingandzu nya gungangamele.

⁵Kha nga ulo va nga bani va tsitside dzithamo khu hwanga, vama vale va di va embela, khavo: “Khu ginani mu vbwetago vbakari nya va nya gufa uye a vbanyago?

⁶Mwalo avba, wugide! Dundrugani iso a nga mi embela na nga romo Galileya, khuye:

⁷ Mwamana wa Muthu emede gu ningedwa mandzani nya sighohi si mu khokhothela, aholu khu litshigu nya wuraru a na wuga.”

⁸Khavbo avbo, vanyamayi va di dundruga magana yaye.

⁹Na va wide khu thowotunu, va diya tivisa satshavbo sesi ga vapostoli vatshavbo vale nya likhumi na moyo ni ga vatshavbo vambe va nga bani vari navo.

¹⁰Vanyamayi vava a diri Mariya wa Madhalene, Jowana ni Mariya, mayi wa Jakobe. Vambe vanyamayi va nga bani vari navo, va di fakaza navo silo sesi ga vapostoli.

¹¹Aholu vapostoli kha va nga khodwa khu magana yawe, va di ma wona kha nga milotelote.

¹²Ambari ulo, Pedro a di hongola thowotunu khu mazambo. Na nogide a holela, a di wona basi sidzingelo. A di wuya gaya, na gu liwuga iso si nga dugelelago.

¹³Litshigu lolo la limwedo, vavili vawe va di phara ndzila nya guhongole talalani nya gupwani Emawusi, gu nga bani gu khalela gipimo nya likhumi dzikilometro vbavbandze ga Jerusalema.

¹⁴Va di gu bhula khu esi satshavbo si nga dugelelago.

¹⁵Na varomo vbakari nya libhulo ni gu ganedzisana, Jesu a di gimbidzisa aya va manela, a gu longoloka navo.

¹⁶Aholu maho yawe ma di segegide va si mu tuguli.

¹⁷A di va wudzisa, khuye: “Libhulo muni ilolo mu gu nalo vbakari nya ndzila?” Va di ema, na va tade khu wusiwana.

¹⁸Khavbo avbo, moyo wawe, nya gupwani khu Keleyofasi, a di hakha, khuye: “Ina khuwe basi u gu pfhumba, u hangwago khiso si nga dugelela tigoni momu ga Jerusalema matshigu yaya, gani?”

¹⁹Jesu a di va wudzisa, khuye: “Gasi ginani gi nga giregago?” Va di mu embela, khavo: “Iso si nga dugelelago Jesu wa Nazareta, muprofeti nya sigiro ni magana nya tshivba mahoni ga Nungungulu ni mahoni nya vathu vatshavbo.

²⁰Idzo a nga ningedwago khidzo khu vakhongolo nya vaphasi nya mhamba ni vathangeli vathu a songwa, vaya khu gu mu khokhothela vbagihambanotunu.

²¹Hi di khethu mwendro khuye a natago ata vbanyisa Israyeli, aholu eli khu litshigu nya wuraru hwane nya gu bani si dugelede satshavbo sesi.

²²Vomo vanyamayi nya gikwata gyathu va ngata hi thusa, kholu va diya thowotunu, ni mambagugya;

²³na va yide vaya hamuga girumbi gyaye, va di wuya vata khavo va di tumbulugedwa khu dzingilozi dzi nga va embelago khidzo a ngu vbanya.

²⁴Khavbo avbo, vambe va na gyathu va di hongola thowotunu vaya mana satshavbo kha nga idzo vanyamayi vale va nga bani va ganede khidzo. Aholu, uye wutumbu, kha va mu wona.”

²⁵Khavbo avbo, Jesu a di va embela, khuye: “Mapeminu, nya mihungo nya gulemele, mu si vbiredzeligo gu khodwa khu satshavbo si nga ganedwago khu vaprofeti!

²⁶Gasi Kristo a di si emeli gu saniseka, afela gu bela wudhumoni gwaye, gani?”

²⁷Khavbo avbo, a di va tshamusela milowo yatshavbo yi nga bani yi ganela khu uye, guphela khu Mosi kala gu vbedza vaprofeti vatshavbo.

²⁸Na va gu vboha talalani va nga bani va gu hongola umo, a di gira gu khwatshi a gu vbweta guvbindra.

²⁹Gasi avo va di mu khadzisa, khavo: “Khala ni ethu, kholu lidambo li hwidwe, wutshigu wu nguya na wu hidzimela.” A di bela, gasi guya khala navo.

³⁰Na khade vbamezatunu, a di dzega gibaba, a gi kategisa, a gi kabanisa, a va ninga.

³¹Khavbo avbo, maho yawe ma di tulega, va mu tugula; aholu uye a di mwalalega mahoni gwawe.

³²Va di phela gu embeledzelana, khavo: “Ina kha ha nga bani hi pwa myonyo yathu na yi dzura gikhati a nga bani a gu ganela ni ethu ndzilani, a hi tshamusela Milowo, gani?”

³³Va di bwelela khu guvbiredza va hongola Jerusalema, iyo va ngaya manago vale nya likhumi na moyo vapostoli ni vangana vawe na vari danga mwedo,

³⁴avo va di va embela, khavo: “Khu lisine Pfhumu wugide! A dzi wonegiside ga Simoni!”

³⁵Avo navo va di ya va tivisa, iso si nga va dugelelago ndzilani, ni idzo Jesu a nga dzi wonegisago khidzo vbagupilatunu nya gibaba.

³⁶Na va nga guganela esi, Jesu a di dzi wonegisa vbakari gwawe, a gu va embela, khuye: “Gurula gu na khale ni enu!”

³⁷Na va tade khu guthuruga ni hwanga, va di pimisa nya gukhavo githusa va gi wonago.

³⁸Aholu a di va embela, khuye: “Mwa gu thavela ginani? Khu ginani mu gu ni gukanakana gogo myonyoni gwanu?

³⁹Khedzani mandza yangu ni migondro yangu. Kheni kamwe. Nyi phareni; dzitini nya gukhenu githusa gi mwalo nyama ni marambo kha nga esi mu si wonago khenu nyi naso.”

⁴⁰Na gu ganela esi, a di va yeyedza mandza ni migondro.

⁴¹Kha nga ulo va nga bani vari vbakari nya guliwuge ni gukanakana, khu kotani nya gunengele, Jesu a di va wudzisa, khuye: “Mu na ni gilo nya guhodze avbovbo, gani?”

⁴²Va di mu ninga gipandre nya ndzandzi nya guvawudwe.

⁴³A di dzega a gu hodza mahoni gwawe.

⁴⁴Khavbo avbo, a di va embela, khuye: “Khayo aya magana nyi nga mi embelani na nyi ngari nanu, gikhati nyi nga, kheni: Womo fanelo nya gutadzisege satshavbo si nga lowago khu Mosi, khu Vaprofeti ni Dzindzimo, na si gu ganela khu eni.”

⁴⁵Khu vbale, a di va tula mapimo, gasi va pime Milowo,

⁴⁶ a gu va embela, khuye: “Gu lovidwe pwani Kristo emedwe khu gusaniseka, aholu khu litshigu nya wuraru a na wuga khu ga vafudego;

⁴⁷ni gupwani, khu lina laye, gu na hevbudzwa mayigoni gwatshavbo gu vbindrugedza mavbanyelo ni tsetselelo nya sighoho, gukhugela Jerusalema.

⁴⁸Enu mu dzifakazi nya silo sesi.

⁴⁹ Eni nyi na mi rumelani igyo nyi nga thembiswa khu Babe wangu. Aholu indra bani mu khala dhoropani kala mu gu hakha tshivba ya vbatshani.”

⁵⁰Hwane nya matshigu, a di hongola navo Bhetaniya, na va vbohide, a di khusedza mandza a va kategisa.

⁵¹Na gu va kategisa, a di hambana navo, a gu khusega aya Ndzadzini.

⁵²Gasi avo, na va mu khozede, va di bwelela Jerusalema na va tade khu gunengela.

⁵³Va di khala gikhati gyatshavbo Nyumbani ga Nungungulu va gu rungudza Nungungulu.