Read gitonga Luka 3 Bible Online

Luka 3 - gitonga bible

Luka 3

¹Khu mwaga nya likhumi na livbandre nya gufume ga mufumeli nya khongolo wa Roma, Tibheriyu Sezari; Pilato nari mwamangulu wa Judheya, Herodhi na gu fumela Galileya, ndriyaye Filipi na gu fumela Itureya ni Trakonite, Lizaniya na gu fumela Abhileni,

²Anasi ni Khayifasi vari vaphasi nya vakhongolo, magana ya Nungungulu ma di rumedwa ga Johane mwamana wa Zakariya, a nga bani a gu vbanyela mugiwulani.

³Johane a di gimbila gimbila tsongoni wa Joridhani na gu hevbudza vathu khuye gu vbwetega gu hakha gubhapatisa nya gu dzi sodzise, gasi gu tsetseledwa sighoho,

⁴kha nga gu lovidwego mulibhukuni la muprofeti Isaya, pwani: “Lomo lito li huwelelago mugiwulani, khilo: Dongiselani ndzila ya Pfhumu, lulamisani sindzilana saye;

⁵mikova yatshavbo yi na futedwa, ni sigomo satshavbo si na guledwa, dzindzila nya guwegele dzi na lulamiswa, nidzo nya sikidinga dzi na futeledwa.

⁶ Vathu vatshavbo va na wona guvbanyisa ga Nungungulu.”

⁷ Johane a di embela vathu va nga bani va mu yela, gasi guya bhapatiswa, khuye: “Enu livelego nya dzinyoga, khu mani a nga mi layani gu thava tsayiso nya khongolo wu vbwetago gu vboha?

⁸Nonedzani mihandro yi yeyedzago gu vbindrugedza mavbanyelo; mu nga dzi pembi sanu, khenu: Ethu hi na ni babe Abrahama. Dzitini nya gukhenu Nungungulu a ngu dzi kodza gu vbindrugedza siwindri sesi si khala sanana sa Abrahama.

⁹ Gibhewula gyomo tshinani nya misimbo. Khu kharato, simbo watshavbo wu si ningigo mihandro nya yadi wu na kokwa, wu rinywa niloni.”

¹⁰Khavbo avbo, vathu va di mu wudzisa, khavo: “Hi na rini olu?”

¹¹A di va hakha, khuye: “Uye a gu ni dzingandzu dzimbili a na kabane ni wule a gu mwalo; uye a gu ni silo nya guhodze a na gire nuye kharato.”

¹² Va diya navo vahengisi nya khupho, gasi guya bhapatiswa. Vaya mu wudzisa, khavo: “Muhevbudzi, ginani hi fanelago gu gira?”

¹³A di va hakha, khuye: “Mu nga khuphisi gu vbindrisa nayo.”

¹⁴Masotshwa nayo ma diya wudzisa, khayo: “Ahati ethu, ginani hi fanedego gu gira?” A di ma hakha, khuye: “Mu nga phangi muthu, mu nga mu singedzi malipha, mu nga dwaneli gimbe gilo, vbavbandze nya iso mu hakhiswago khu mufumo.”

¹⁵Kha nga olu vathu vatshavbo va nga bani va lindrede, vatshavbo va di hingigedza myonyoni gwawe khavo mwendro saye Johane khuye Kristo wakone.

¹⁶Johane a di va embela vatshavbo, khuye: “Khu lisine, eni nya gu mi bhapatisani khu mati, aholu a nguta uye a gu ni tshivba gu nyi vbindra, oyu eni nyi gu mwalo fanelo nya gunoge nyi mu tshula dzingodzi nya silato saye; uye a nata mi bhapatisani khu Liphuvbo nya Guage ni nilo.

¹⁷A na ni gitandri mandzani, gasi gu vbevberela sa githungani gyaye, bwelo khavbo a gu sefa mavbila a ma vega mugithungani, a dzega mungu wakone a wu vbisa niloni nya gukhondre nyamba tshimega.”

¹⁸Khu sihevbudzo nya nga esi ni simbe nya gutale Johane, a di gu hevbudza vathu Mahungu nya Yadi.

¹⁹Avbo mufumeli Herodhi a nga kawukwa khu Johane khu kotani ya Herodhiya, mwangadzi wa ndriyaye, Filipi, ni kotani nya yimbe mithumo nya guvivbe a nga girago,

²⁰ aholu mithumoni yaye yatshavbo nya guvivbe, Herodhi a di engedzela gambe khu gu khothela Johane pasoni.

²¹Hwane nya gu vathu vatshavbo na va bhapatisidwe Jesu a diya bhapatiswa nuye. Na romo vbakari nya nombelo, ndzadzini gu di tulega;

²² Liphuvbo nya Guage li di tshiga lita mbaka vbatshani gwaye kha nga lituva. Li dita lito khu Ndzadzini li nga, khilo: “Uwe u Mwamana wangu nya gigodwa ngudzu; u nengedzisago monyo wangu.”

²³Gikhati a nga phela thumo waye, Jesu a diri ni gipimo nya magumararu myaga. Adiri gyanana gya Josefe kha nga idzo va nga bani va gu pimisa khidzo va nya litigo. Josefe a diri gyanana gya Heli,

²⁴wa Mathati, wa Levhi, wa Meleki, wa Janayi, wa Josefe,

²⁵wa Matatiya, wa Amosi, wa Nahume, wa Esili, wa Nagayi,

²⁶wa Mahati, wa Matatiya, wa Semeyi, wa Josefe; wa Jodha,

²⁷wa Johane, wa Rasayi, wa Zorobhabheli, wa Salatiyeli, wa Neri,

²⁸wa Meliki, wa Adhi, wa Khosani, wa Elimadhani, wa Eri,

²⁹wa Josuwa, wa Eliyazari, wa Jorimi, wa Mathati, wa Levhi,

³⁰wa Simiyoni, wa Judha, wa Josefe wa Jonani, wa Eliyakimi,

³¹wa Meleya, wa Menani, wa Mathathayi, wa Nathani,

³²wa Dhavhidhe, wa Jese, wa Obhedhi, wa Bhowazi, wa Salayi, wa Nasoni,

³³wa Aminadhabhi, wa Adhimimi, wa Arini, wa Esromi, wa Peresi, wa Judha,

³⁴wa Jakobe, wa Isaki, wa Abrahama, wa Tera, wa Nahori,

³⁵wa Serugi, wa Ragawu, wa Faleke, wa Hebheri, wa Salayi,

³⁶wa Khayinani, wa Arifaxadhi, wa Semi, wa Nowa, wa Lameki,

³⁷wa Mathuzalemi, wa Enoki, wa Jaredhi, wa Mahalaleli, wa Khayinani,

³⁸wa Enosi, wa Seti, wa Adhamu a nga tumbulugiswa khu Nungungulu.