Read gitonga Luka 5 Bible Online

Luka 5 - gitonga bible

Luka 5

¹Kha nga olu Jesu, a nga bani na romo siwoni nya yiphwa ya Jenezare, vbakari nya vathu va nga bani va gu mu gundra, gasi gu pwa mahungu ya Nungungulu, bambe nya litsiva la Genezareta

²a di wona dzingalava dzimbili dzi nga bani dzi tshegemide siwoni, vagogi vakone na va tshigide vaya andza dzikhoga.

³ A di bela ngalavani nyo kari, yi nga bani yi gu lumba Simoni. Khavbo avbo, a di mu ruma gu yi hidzimisa matini. Uye, khu ngalavani, a di hevbudza gidzemo.

⁴Na vbedzide gu ganela, a di embela Simoni, khuye: “Hidzimisani ngalava nondrwani, mu thesa dzikhoga dzanu.”

⁵Simoni a di hakha, khuye: “Muhevbudzi, hi gogide wutshigu watshavbo, kha ha mana gilo; aholu kha nga ulo u rumago, nyi na thesa dzikhoga.”

⁶Va di dzi thesa, va goga dzindzandzi nya dzingi kamwe ngudzu, nya gu ni dzikhoga dzi di hadza gu pferuga.

⁷Va di khweneta vangana vawe va nga bani varomo ga yimbe ngalava, gasi guta va phasa. Va dita tadza navo ngalava yawe. Dza dzimbili dzi di vbweta gu rika khu gutala.

⁸Na wonide esi, Simoni Pedro a di dzi thesa migondroni ga Jesu, khuye: “Leya uya hwindzo gwangu, Pfhumu, kholu nyi gighohi!”

⁹Simoni ni vatshavbo avo a nga bani ari navo va di tala khu guliwuga, khu kotani nya dzindzandzi nya dzingi va nga molago;

¹⁰ni vangana vaye, Jakobe ni Johane, sanana sa Zebhedhewu, va di liwuga navo. Khavbo avbo, Jesu a di embela Simoni, khuye: “U nga thavi; gukhugela muhuno u na bani uri mugogi nya vathu.”

¹¹Va di dusa dzingalava vbavbandze, va diga satshavbo, va mu landra.

¹²Avbo Jesu a nga bani na romo dhoropani nya gukari a dita muthu moyo a nga bani a gu dwala khu sokono. Uye, na wonide Jesu, a di dzi thesa migondroni gwaye, a mu lomba, khuye: “Pfhumu, wa gu dzina, nyi agise.”

¹³Jesu a di mu handzega mandza, na gukhuye: “Nyi ngu dzina, aga” Khavbo avbo, sokono yi di dzegela gu duga gwaye.

¹⁴ A di mu laya gu a si embeli muthu, bwelo khavbo a mu embela, khuye: “Indra dzi yeyedza ga muphasi, gasi uye a ningele, khu gu agiswa gwago, iso si rumwago khu Mosi, gasi gu khala nari wufakazi vbakari gwawe.”

¹⁵Ndruma yaye yi di phalalega ni litigo, vathu nya vangi va di ya mu randrela, gasi gupwa sihevbudzo saye ni gu hawulugiswa madwali yawe.

¹⁶Aholu uye a di thava a gu hongola giwulani, aya gira nombelo.

¹⁷Tshigu mwedo, Jesu, a di gu hevbudza, vbakari nya vathu va nga bani va mu yingisa. Va diromo navo vafarisi ni vahevbudzi nya Nayo va nga tago khu Galileya, khu Judheya ni Jerusalema. A di gu hawulugisa madwali khu tshivba ya Pfhumu.

¹⁸Va di vboha vama va nga bani va rwade gilima khu lithatho. Va di vbweta ndzila nya gu gi vbohise ga Jesu.

¹⁹Na va yi hamugide khu kotani nya talo nya vathu, va di lita vbatshani nya nyumba, a nga bani a romo Jesu, vaya tshula vbamwambatunu. Na va giride isoso, va di reledza lithatho nya gilima, va li tshisa vbakari ni vbakari, mbeli ga Jesu.

²⁰Na wonide gukhodwa gwawe, Jesu a di ganela, khuye: “Amasawu, sighoho sago si tsetseledwe.”

²¹Vahevbudzi nya Nayo ni vaphasi nya mhamba va di phela gu ngurangura, khavo: “Khu mani oyu a hembululago Nungungulu? Khu mani a dzi kodzago gu tsetselela sighoho vbavbandze ga Nungungulu basi?”

²²Aholu Jesu, na tugude maalakanyo yawe, a di khusedza lito a gu va wudzisa, khuye: “Mahingigedzo muni mu gu nawo myonyoni gwanu?

²³Khu gevbini gi vbevbugidego gu ganela: Gukheni sighoho sago si tsetseledwe, ni gukheni khuga u gimbila?

²⁴Gasi mi dzitini nya gukhenu Mwamana wa Muthu a na ni tshivba nya gutsetselele sighoho mafuni momu,” a di embela gilima, khuye: “Nyi ngu gu ruma khuga u eme, dzega lithatho lago u hongola gaya gwago.”

²⁵Khavbo avbo, gilima gi di dzegela gu khuga gi ema mahoni ya vathu vatshavbo, gi dzega lithatho laye gi gu hongola gaya, na gi gu dhumisa Nungungulu.

²⁶Vatshavbo va di liwuga ngudzu ni gu tala khu githawo, gumogo ni gu dhumisa Nungungulu, khavo: “Muhuno hi wonide siliwugiso.”

²⁷Khavbo avbo, Jesu a di duga. A diya mana muhengisi nya khupho nya gupwani khu Levhi, na khade vbagikhalotunu gwaye nya thumo, a di mu embela, khuye: “Nyi landre.”

²⁸A di diga satshavbo, a khuga a mu landra.

²⁹Khavbo avbo, Levhi a di rana Jesu ndrangani gwaye, a gu mu girela buzo nya khongolo. Vbamezatunu va diromo vambe vahengisi nya khupho nya vangi ni vambe vathu.

³⁰Vafarisi ni vahevbudzi nya Nayo va di ngurangura, va gu wudzisa vapizane va Jesu, khavo: “Khu ginani mu hodzago ni gu sela gumogo ni vakhuphisi ni sighohi?”

³¹Jesu a di hakha, khuye: “Khandri vale va gu ni womi va vbwetago nyanga, aholu, vadwali.

³²Eni kha nya tela guta rana avo va nya gululama aholu, nyi tede guta rana sighohi gasi si dzi laye si wuya ndzilani nya lisine.”

³³Khavbo avbo, va di mu embela, khavo: “Vapizane va Johane ni vapizane va vafarisi va gu tala gu hala gikhati nya gingi, ni gu gira milombelo, gasi avo vago va gu hodza ni gu sela!”

³⁴Jesu a di va hakha, khuye: “Ina gu ngu kodzega vabangaladzi va mwane va hala mwane na ngari navo, gani?

³⁵Ma nguta matshigu va na gu dzegedwago mwane. Gikhati gyogyo va na hala!”

³⁶A di va embela gambe gipimaniso gegi: “Mwalo a pferulago mwendra nya muphya gasi gu gira giziva vbamwendratunu wa gale. Wa gu gira kharato, u na luza mwendra nya muphya, gambe giziva gyakone kha gi na yelana ni mwendra wa gale.

³⁷Kha nga gambe, mwalo a thelago wadwa nya givhayi malowoni ya gale. Wa gu gira kharato, wadwa nya givhayi wu na pola malowo. Gu luzega, kharati, wadwa ni malowo.

³⁸Aholu, wadwa nya givhayi gu vbwetega wu thedwa malowoni nya maphya.

³⁹Mwalo muthu nya gu na sede wadwa nya guvile gwadi a wuya a lomba wadwa nya givhayi, kholu wari, khuye: ‘Uwo nya guvile gwadi khuwo wu gu wadi.’ ”