Read gitonga Dhewuteronome 12 Bible Online

Dhewuteronome 12 - gitonga bible

Dhewuteronome 12

¹Khiyo eyi milayo ni sileletelo mu yelago gu dzi garadza khu gu yi landrisa tigoni a mi ningidego PFHUMU Nungungulu wa vababe vanu, gasi mu li fuma, ga matshigu yatshavbo mu na vbanyago mafuni.

²Mu naya khungumulela muphelo malanga yatshavbo va phaselago umo vanungungulu vawe vathu muya va fumelago: Vbatshani nya sigomo nya gulaphe ni sigomwana, ni vbavbatshi nya misimbo nya gunyuge;

³ mu na khungumulela siluvelo sawe, mu pilela madingo yawe, mu vbisa sihuru sa vanungungulu vawe, mu pandrelela sifananiso nya vanungungulu vawe nya dzisimbi nya gunyiviligiswe, mu futa lina lawe ga wulanga wule.

⁴Mu nga girini kharati ga PFHUMU Nungungulu wanu,

⁵aholu mu naya Mu vbwetani wulanga wule PFHUMU Nungungulu a na gu wu hathago vbakari nya mahundzu yanu yatshavbo, gasi gu vega avbo lina laye ni nyumba yaye; mu simama guya avbo.

⁶Mu na yisa wulanga wowo miphaso yanu nya guvbiswe, ni dzimhamba dzanu, ni miningelo yanu nya gipandre nya likhumi, ni eyi nya mandza yanu, ni miningelo nya gundziwitedwe ni eyi nya guningele khu gugola, ni matiwula nya dzimombe dzanu ni dzinvuta dzanu.

⁷Avbovbo, mu naya hodza mbeli ga PFHUMU Nungungulu wanu, mu naya nengela khu satshavbo mu na guya girago enu gumogo ni mapango yanu, mu nengela khu satshavbo esi a na bani a mi kategiside khiso PFHUMU Nungungulu wanu.

⁸Mu nga yi gira ni gevbini gilo kha nga idzo hi nga bani hi gira avba, nya gu muthu ni muthu a gira silo gukhedza khu gugola gwaye,

⁹kholu, kala ni olu, mu si gu beli guhefemulani ni ga thomba eyi PFHUMU Nungungulu wanu a mi ningago.

¹⁰Aholu mu na tshatuga tsongo wa Joridhani, muya vbaha tigoni mule PFHUMU Nungungulu wanu a mi ningidego gu khala thomba yanu; a na mi vhikela ga valala vanu vatshavbo va mi randredego, gambe mu na vbanya na mu tiyide.

¹¹Khu guralo, gu na manega wulanga wu na hathwago khu PFHUMU Nungungulu wanu, gasi guya vega avbo lina laye; ga wulanga wowo, mu na vbohisa satshavbo esi nyi mi leletelago a gu esi: Miphaso yanu nya guvbiswe, ni dzimhamba dzanu, ni miningelo yanu nya gipandre nya likhumi, ni eyi nya mandza yanu, ni miningelo yanu mu sambanyidego gu ninga PFHUMU Nungungulu.

¹²Gambe mu na nengela mbeli ga PFHUMU Nungungulu wanu, enu gumogo ni sanana sanu nya vama ni esi nya vanyamayi, ni sithumi sanu nya vama, ni esi nya vanyamayi, gumogo ni mulevhi a vbanyago ndrani nya madhoropa yanu, a gu mwalo gipandre mwendro thomba gumogo nanu.

¹³Dzi wonele, u nga giri miningelo nya guvbiswe ga wumbe wulanga u na wu golago;

¹⁴aholu ga wulanga wule PFHUMU Nungungulu a na wu hathago vbakari nya mahundzu yago, khavbo u naya girago miphaso nya guvbiswe, gambe avbovbo u naya gira satshavbo nyi gu leletelago.

¹⁵Khu guralo, gukhedza khu gugola gwatshavbo nya hefemulo wago, u na paya sifuyo, u hodza nyama yakone madhoropani gwago, gukhedza khu edzi PFHUMU Nungungulu wago a na bani a gu kategiside khidzo; oyu a nyenyezidego ni oyu a agidego, vatshavbo va na hodza nyama gukhwatshi va gu hodza mbavala ni mangulwe.

¹⁶ Vbavbandze nya novba mu nga hodzi; u na wu vbaladza vbavbatshi kha nga mati.

¹⁷Madhoropani gwago, u nga hodzi gipandre nya likhumi nya tirigu yago, vbinyu yago mwendro mafura yago, ambari matiwula nya dzimombe dzago ni dzinvuta dzago, ambari miningelo nya gundziwitedwe, ambari eyi u tumbisidego khu gusambanya, ambari miningelo nya guningele khu gugola, mwendro eyi nya mandza yago;

¹⁸aholu uwe u na si hodzela wulanga wule PFHUMU Nungungulu wago, a na gu wu hathago, uwe, gumogo ni gyanana gyago, nya mwama ni egi nya nyamayi, ni githumi gyago nya mwama ni egi nya nyamayi, gumogo ni mulevhi a vbanyago dhoropani gwago; u na nengela mbeli ga PFHUMU Nungungulu wago, ga satshavbo u na girago.

¹⁹Dzi wonele, u nga digi gu sayisa mulevhi matshigu yatshavbo nya guvbanye gwago tigoni.

²⁰Gikhati PFHUMU Nungungulu wago, a na anamisago litigo lago kha nga a gu embedego, u gola gu hodza nyama, u ganela, khuwe: Nyi na hodza nyama, khu guralo, kha nga gugola gwago, u na yi hodza.

²¹Wa gu bani wuri hwindzo wulanga owu PFHUMU Nungungulu wago, a wu hathidego gasi gu vega lina laye, u na paya dzimombe dzago ni dzinvuta dzago edzi PFHUMU Nungungulu a nga gu ningago, kha nga nyi gu leletedego; u na hodza ndrani nya lidhoropa lago, gukhedza khu gugola gwago gwatshavbo.

²²Khu guralo, u na hodza kha nga idzo yi hodzwago khidzo nyama nya mangulwe ni mbavala, u na hodza kharati dzinyama dzedzi; dzinyama dzedzi va na hodza vatshavbo, oyu nya gunyenyeze ni oyu a agidego.

²³Dzi wonele basi gumba hodza novba, kholu novba womi; khu guralo u nga hodzi womi gumogo ni nyama.

²⁴ U nga wu hodzi, wu vbaladze vbavbatshi kha nga mati.

²⁵U nga wu hodzi, gasi sigiro sago si gu dugela gwadi, uwe gumogo ni sanana sago, hwane gwago, wa gu gira esi si lulamidego mahoni gwa PFHUMU Nungungulu.

²⁶Gasi miningelo yago nya guage u gu nayo ni yile u nga yi tumbisa, u na yi dzega u hongola nayo wulanga wule PFHUMU Nungungulu a wu hathidego.

²⁷U na ningela miphaso yago nya guvbiswe, nyama gumogo ni novba vbagiluvelotunu gya PFHUMU Nungungulu wago, novba nya dzimhamba wu na vbaladzwa vbatshani nya giluvelo gya PFHUMU Nungungulu wago; aholu nyama u na yi hodza.

²⁸Vegedza ni gu landrisa magana yatshavbo yaya nyi gu leletelago, gasi sigiro sago si gu dugela gwadi, uwe gumogo ni sanana sago, hwane gwago kala gupindruga, wa gu gira nya sadi ni gululama mahoni ga PFHUMU Nungungulu wago.

²⁹Gikhati PFHUMU Nungungulu wago, a na mbembisago mbeli gwago mayigo, u na guya ma fumago, ma gu khala thomba yago ni gu vbanya umomo,

³⁰dzi wonele, u si modwi khu gulandrisela vanungungulu wawe nya malipha, hwane nya gu na va mbembisidwe mbeli gwago; u ganela, khuwe: Olu vathu vava va thumedego vanungungulu vawe, eni neni nyi na gira kharato.

³¹U nga giri kharato ga PFHUMU Nungungulu wago, kholu gunyenyeza gwatshavbo gu nyenywago khu PFHUMU Nungungulu, avo va dzi girede vanungungulu vawe, khu guralo, vathu vovo va vbiside niloni sanana sawe va vbisela vanungungulu vawe.

³² Satshavbo esi nyi gu leletelago u na si sayisa; u nga engedzeli gilo mwendro gu vbungula.