Read gitonga Dhewuteronome 14 Bible Online

Dhewuteronome 14 - gitonga bible

Dhewuteronome 14

¹ Enu mu sanana sa PFHUMU Nungungulu wanu. Khu guralo, mu nga hatshedwi dzindrova milini gwanu, ambari guvbaludwa ndzudzu hungoni gwanu khu kotani nya gufe muthu nya gukari.

² Kholu mu vathu va agidego mahoni ga PFHUMU Nungungulu wanu, gambe PFHUMU Nungungulu a mi hathide vbakari nya mayigo yatshavbo ya mafuni, gasi mu khale vathu Vaye.

³Mu nga hodzini gilo nya gunyenyeze.

⁴Sirengo mu yelago gu hodza, khesi: Mombe, nvuta, phongo,

⁵mbavala, mbalapala, mangulwe, yisya, sangu, nyari ni gipene.

⁶Mu na hodzani sirengo satshavbo si gu ni sitsendro nya gupandrwe, si khala sitsendro sivili, na si gu tsagudzela si midza si bhisela si si wuyisa si ta tsagudza gambe nyawuvili.

⁷Gambe, vbakari nya esi si tsagudzago si bhisela si tsagudzela nyawuvili, na siri ni sitsendro nya gupandrwe, mu si yeligo gu hodza khu esi: Ngameriya, gihulo nya likhabi ni gihulo nya gufuywe, kholu sa gu tsagudzela si bhisela si tsagudzela nyawuvili aholu sitsendro sawe kha sa pandrwa, isoso si nyenyezide gwanu.

⁸Mu nga hodzini khumba, ambari yi gu ni sitsendro nya gupandrwe, aholu kha yi tsagudzeli nyawuvili, yi nyenyezide gwanu. Esi mu nga hodzi nyama yawe, ambari gu kuha girumbi gyawe.

⁹Mu na hodzani satshavbo si guromo matini, a gu esi: Satshavbo si gu na ni dziphesa ni magwaru.

¹⁰Aholu satshavbo si gu mwalo dziphesa ni magwaru mu nga si hodzi; si nyenyezide avbo gwanu.

¹¹Hodzani sinyoni satshavbo si agidego.

¹²Aholu, iso mu si yeligo gu hodza, khesi: Lighama, nyamatate, likotane, ligodza,

¹³vamakoti nya mafumbu yatshavbo, pfhokwane, vamariyane gukhedza khu mafumbu yawe;

¹⁴vamahigonganye nya mafumbu yatshavbo,

¹⁵limbowa, ndrewulewu, ligwilili gukhwdza khu mafumbu yawe,

¹⁶gisungurukhuru, lipfuhule, gigurwani, nyamangondrongondrwane, sivaga gukhedza khu mafumbu yawe;

¹⁷litembe, ligumba ni lisekwa,

¹⁸mafumbu yatshavbo nya dzikalahoni, ngulukulu ni likoha nyamanganane, ni mafumbu yaye.

¹⁹Ni sirengwanana satshavbo si vbuvbago si nyenyezide gwanu. Mu nga si hodzini.

²⁰Sinyoni satshavbo si agidego hodzani.

²¹Mu nga hodzini ni girengo gimwegyo nya gufe gyabune.[4] Mu ngu dzi kodzani gu gi ningela ga muluveli, a vbanyago dhoropani gwago, gasi a gi hodza, mwendro gu gi rengisa ga muthuyo, kholu mu vathu mu agidego mahoni ga PFHUMU Nungungulu wanu. U nga phuli phongo khu mahwe ya mayi waye.[5]

²²Guvbwetega u ningela gipandre nya likhumi nya mihandro yatshavbo nya dzimbewu dzago, eyi u vbwerago thembweni gwago khu mwaga ni mwaga.

²³Mbeli ga PFHUMU Nungungulu wago, ga wulanga a wu hathidego gasi gu vega avbo Lina laye, u na hodza gipandre nya likhumi nya tirigu yago, nya vbinyu yago, mafura yago ni matiwula nya dzimombe dzago ni dzinvuta dzago; gasi u hevbule gu ninga githawo matshigu yatshavbo PFHUMU Nungungulu wago.

²⁴Gikhati PFHUMU Nungungulu wago, a gu kategisago, ndzila ya gulapha ngudzu, nyamba dzi kodza gu dzega hwengo wago, khu gu nu gu vbanya hwindzo ni wulanga wule PFHUMU Nungungulu wago, a wu hathidego gasi gu vega avbo Lina laye,

²⁵avbovbo u na si rengisa, u dzega mandzani gwago dzitsapawu dzakone, u hongola wulanga wule PFHUMU Nungungulu wago, a wu hathago.

²⁶Dzitsapawu dzodzo, u na renga khidzo satshavbo u na si golago khu monyo wago: dzimombe mwendro dzinvuta, vbinyu mwendro wadwa nya tshivba, mwendro ni gevbini gilo gi na godwago khu monyo wago; u na gi hodza nuri vbafuvbi ni PFHUMU Nungungulu wago, gambe u na nengela, uwe gumogo ni ndranga yago;

²⁷Khu guralo, u nga digi gu sayisa mulevhi a vbanyago dhoropani gwago, kholu mwalo gipandre mwendro thomba vbakari gwanu.

²⁸Guvbelani nya mwaga ni mwaga nya wuraru, u na dusa sipandre satshavbo nya likhumi nya handro nya mwaga nya wuraru, u si yisa dhoropani gwago.

²⁹ Khavbo avbo, a nata mulevhi (a gu mwalo gipandre ambari thomba vbakari gwago), muluveli, khulungu ni noni; va guromo dhoropani gwago, va na hodza va khura, gasi PFHUMU Nungungulu wago, a gu kategise ga yatshavbo mithumo ya mandza yago.