Read gitonga Dhewuteronome 19 Bible Online

Dhewuteronome 19 - gitonga bible

Dhewuteronome 19

¹Avbo PFHUMU Nungungulu wago, a na fuvisago mifumo nya mayigo yale a na gu ningago PFHUMU Nungungulu wago, hwane nya gu bani na mu gu va khoziside mu dzega madhoropa ni dzindranga dzawe mu khala umo,

² u na hatha madhoropa mararu vbakari nya litigo eli PFHUMU Nungungulu wago, a na gu ningago gasi u li fumela, u ma kasa phuvbo.

³U na lulamisa dzindzila dzakone u pandra mivbingano nya litigo eli PFHUMU Nungungulu wago, a na gu ningago gu li fumela, u na li kabanisa khu sipandre siraru; esi si na gira gu nari wuthavelo nya vale va songago vathu khu guphazama.

⁴Madhoropa yaya ma na giredwa nari wuthavelo wa vale va na gu tshukha na va songide vathu nyamba gira kha gwenye, gasi vaya vbanyela umomo; oyu a songago muthu kwawe khu mhango nasa phela khu guganedzisana naye.

⁵Khu guralo, uye a na gu belago khabini ni muthu kwawe gasi guya pila dzikhuni, a gu khusa libhewula gasi gu koka simbo, libhewula li homoga vbasimbotunu li ya bayisa mungana waye, oyu a gufa, uye a nga mu songa a naya vbanyela ga limwedo nya madhoropa yaya;

⁶gasi muphodzeli nya novba na vbisegide monyoni gwaye, khu gulapha nya pfhuka, a si landreleli wule a nga songa kwawe a gu mu mana a mu songa, narigu musongi yoyu mwalo fanelo nya gusongwe, kholu kha nga phela khu guganedzisana naye.

⁷Khidzo kharato nyi gu layago, kheni: “U na kasa madhoropa Mararu u ma vega phuvbo.”

⁸A gu tshukha PFHUMU Nungungulu wago, a andrisa mivbingano nya litigo lago, kha nga a sambanyidego ga vababe vago, a gu ninga litigo latshavbo a va tumbisidego,

⁹wa gu dzi garadza khu gu landrisa milayo nyi gu leletelago muhuno, gasi u yi landrisa, u gola PFHUMU Nungungulu wago, matshigu yatshavbo u gimbila dzindzilani gwaye, khavbo avbo, u na engedzela gambe mambe madhoropa mararu vbatshani ga aya,

¹⁰gasi vbakari nya litigo eli PFHUMU Nungungulu wago, a gu ningidego gu khala thomba gu si vbalagi novba nyambana nandru, kholu u na manega mandzani gwago nuri ni novba nyambana nandru.

¹¹Aholu, a gu manega muthu nya gukari nari ni mazondra ni muthu kwawe, a mu wugela a mu songa, a gu thavela ga limwedo nya madhoropa yoyo,

¹²madhota ya dhoropani mule, va na rumela vathu vaya mu dzega vata mu ningela mandzani ga muphodzeli nya novba gasi a mu songa.

¹³ U nga mu khedzi khu maho nya gisiro; aholu u fanede gu fuvisa vbakari ga va na Israyeli mahungu nya guvbaladze novba nyambana nandru, gasi mu mana gu katega.

¹⁴ Malangani ma gu ya thomba yago, u nga vbindrugedzi mivbingano ya muakelane wago, yi vegidwego khu vagale vanu, ga litigo eli PFHUMU Nungungulu wago, a gu ningago gasi u li fumela.

¹⁵ Muthu a gu bani giride gilo nya manyala, mwendro gu gira gighoho nya gukari; a nga giredwi wufakazi khu muthu moyo, aholu a na giredwe wufakazi khu vathu vavili mwendro vararu.

¹⁶Muthu a gu gira wufakazi nya malipha khu gu singedza muthu, khuye giride silo nya guvivbe,

¹⁷vathu vava nya vavili va dwanago, va naya ema mbeli ga PFHUMU Nungungulu, mahoni ga vaphasi nya mhamba ni valamuli va manegago ga matshigu yoyo.

¹⁸Valamuli va na sola gwadi mahungu yoyo; gwa gu manega narigu fakazi yi di singedza malipha muakelane waye,

¹⁹mu na yi gira kha nga idzo yi nga vbweta gu gira muakelane waye; khu guralo u na fuvisa guvivba vbakari gwago;

²⁰gasi avo va tshalago va kodze gu yingisa, va khala hwanga, va si engedzi gambe gu gira gilo nya guvivbe nya nga egi vbakari gwago.

²¹ U nga mu khedzi khu maho nya gisiro: Womi wu na livbwa khu womi, likhwaha li na livbwa khu likhwaha, mandza khu mandza, ngondro khu ngondro.