Read gitonga Dhewuteronome 20 Bible Online

Dhewuteronome 20 - gitonga bible

Dhewuteronome 20

¹Wa gu hongola litungatunu nya guye dwana nyimbi ni valala vago u wona dzikavalu, dzikareta ni vathu nya tengo nya wungi guvbindra uwe, u nga va thavi; kholu PFHUMU Nungungulu wago a nga gu dusago khu tigoni ga Egipito, a na ni uwe.

²Avbo mu vbwetago guphela gu dwana, muphasi nya mhamba a na thanga mbeli, a embela vathu vaye, khuye:

³Yingisa uwe Israyeli, muhuno mu nguta dwana ni valala vanu; myonyo yanu yi nga vbeli tshivba; mu nga khali hwanga gambe mu nga ndrendremeli ambari guthusedzedwa khavo,

⁴kholu PFHUMU Nungungulu wanu, khuye a mi dwanelago ga valala vanu, gasi a mi vbulugisa.

⁵Dzindruna dzi na ganela ga vathu khidzo: “Khu mani vbakari gwanu a vbahidego nyumba nya yiphya yi si gu khangudwigo? A na bwelele gaya gwaye, kholu a ngaya yafa nyimbitunu, nyumba yaye yi tshala yi khangudwa yi laledwa khu vambe, uye na fude.

⁶Khu mani a nga lima lithembwe nya vhinya a si gu hodzigo mihandro yakone? A na bwelele gaya gwaye, kholu a nga yafa nyimbitunu mihandro nya lithembwe laye yi tshala yi khangudwa gu hodzwa khu mumbe.

⁷Khu mani a tumbisidego nyamayi a si gu mu dzegigo? A na bwelele gaya gwaye, kholu a nga yafa nyimbitunu, mwangadzi waye a tshala a dzegwa khu mumbe.”

⁸Dzindruna dzi na engedza dzi ganela ga vathu, khidzo: “Khu mani a gu ni hwanga a pilegago hwambo? A na bwelele gaya gwaye, kholu hwanga waye wu nga vbedza tshivba vandriyaye.”

⁹Avbo dzindruna dzi na vbedzago gu ganela ga vathu, gu na hathwa vathangeli va na thangelago dzinyimbi va thanga mbeli nya vathu.

¹⁰Mwa gu vboha vbafuvbi ni lidhoropa mu vbwetago gu dwana ni vathu vakone, phelani khu gu lomba gurula navo.

¹¹Va gu gu ninga phindrulo nya gurule va gu tulela malimba, vathu vatshavbo va na manegago dhoropani momo, va na bani vari dzikhumbi dzago, u va rwega mithumo nya gulemele.

¹²Aholu va gu bomba gira pwanano nya gurule nago, va gu dwanisa, uwe u na randrela lidhoropa lawe.

¹³Khavbo avbo, PFHUMU Nungungulu wago, a na va ningela mandzani gwago, u na mbembisa vama vatshavbo khu litshari.

¹⁴Aholu vanyamayi, sanana, sifuyo, ni satshavbo si na manegago dhoropani si na lumba uwe. U na hodza iso u na gu phangago ga valala vago, avo PFHUMU Nungungulu wago, a gu ningidego.

¹⁵U na gira kharato ga madhoropa yatshavbo ma guromo hwindzo ni uwe, madhoropa yale ma si lumbigo mifumo yeyi.

¹⁶Aholu madhoropa nya mayigo yaya u ningidwego khu PFHUMU Nungungulu wago, gasi ma khala thomba yago, u na sasela sivangwa satshavbo si dagatago nyamba tshiya ni gimwegyo nya guvbanye.

¹⁷U na songa vatshavbo havo bhi: Vahiti, Vaamori, Vakhanani, Vaferezi, Vahevhi ni Vajebhuzi, kha nga idzo u nga leletedwago khidzo khu PFHUMU Nungungulu wago,

¹⁸gasi va si mi hevbudzi mavbanyelo yawe nya guvivbe, yale avo va nga bani na va gu girela vanungungulu vawe, khu guralo, mu ghohela PFHUMU Nungungulu wanu.

¹⁹Mwa gu randrela lidhoropa nya gukari gikhati nya gulaphe, mu dwana nalo gasi gu li phanga li khala lanu, u nga remuleli misimbo yaye nya mihandro khu gu yi kokelela khu libhewula, kholu u na hodza mihandro yaye; ina misimbo nya likhabi valala vanu mu dwanago navo, gani?

²⁰Aholu misimbo yile u yitigo gukhuwe mihandro yaye kha yi hodzwi, u ngu dzi kodza gu yi remulela, u yi kokelela; u gira misimbo nya gubhiye khiyo gasi gu dzi vhikela ga lidhoropa lile u dwanago nalo, kala mu li pfhungumula.