Read gitonga Dhewuteronome 22 Bible Online

Dhewuteronome 22 - gitonga bible

Dhewuteronome 22

¹Wa gu tshuka u wona mombe mwendro nvuta ya muakelane wago na yi dzimede, u nga dzi digi; dzi ghule u dzi yisa ga ndriyago, kholu a ngu dzi dilela.

²Ndriyago yoyu, a gu bani na gu manegela hwindzo nago mwendro gu, nu si muti, dzi sayise ndrangani gwago u khala nadzo a gu manega mune wakone na gu dzi landra, u na mu bweledzela.

³U na gira gambe kharato ni buru yaye ni guambala gwaye; ambari ni gevbini gilo gya ndriyago gi dzimelago wa gu gi mana u nga gi digi.

⁴ Wa gu wona buru mwendro mombe ya ndriyago na yi thegide ndzilani, u nga yi digi; aholu yi phasedzele, u yi khusa.

⁵Nyamayi a nga ambali guambala nya mwama, mwama nuye a nga ambali guambala nya nyamayi; kholu uye a girago silo nya nga isoso, givalo ga PFHUMU Nungungulu wago.

⁶Wa guvbindra khu ndzila u mana gihaga nya ginyoni, simboni mwendro vbavbatshi, na giri ni sifondro mwendro mandra na si fundramedwe khu mayi wakone, u nga dzegi mayi ni sifondro saye;

⁷U ngu dzi kodza gu dzega sifondro saye, u diga mayi wakone a hongola, gasi u kodze gukatega ni gu engedzedwa matshigu yago.

⁸Wa gu vbaha nyumba nya yiphya nya gitezi, u na gira libhiyo likupakupani la gitezi, gasi u si mani nandru nya novba, a gu thega muthu nya gukari khu vbale.

⁹U nga tshuki u yala mafumbu mavili nya dzimbewu thembweni gwago, gasi u si nyenyezisi mihandro nya dzimbewu u yadego thembweni gwago.

¹⁰U nga tshuki u lima khu patwa nya mombe ni buru.

¹¹ U nga tshuki u ambala guambala nya gulugwe khu mawoya nya nvuta ma patwa ni linyu.

¹² U na lugelela matshakafula umo nya dzitshoka dza dzina nya gifenengelo u na fenengelago.

¹³Mwama nya gukari a gu dzegana ni nyamayi, khu hwane nya gu na lade naye, a phela gu mu nyenya,

¹⁴a mu girela mithumo ya dzitshoni, a mu pwadza phungu nya guvivbe, khuye: Nyi dzeganide ni nyamayi yoyu, aholu na nyi tshanganide naye, kha nya mu mana nari likendzi,

¹⁵khavbo avbo, babe ni mayi wa nyamahegyane va na dzega giyeyedzo nya wukendzi wa nyamahegyane, va gu hongola naso ga madhota, nyangwatunu nya lidhoropa.

¹⁶Babe wa nyamahegyane a na embela madhota, khuye: Nyi ningede nyamahegyane wangu gasi a khale mwangadzi wa mwama yoyu; aholu, uye a ngu mu nyenya;

¹⁷wonani gukhenu giride mithumo nya guvivbe, a ganela, khuye: Kha nya mana wukendzi ga nyamahegyane wago; olu, wonani avba wufakazi nya wukendzi wa nyamahegyane wangu. A na ladza guambala gwaye mbeli ga madhota ya dhoropani.

¹⁸Madhota ma na mola mwama, va mu tsayisa,

¹⁹va na mu livbisa lizana dzisekeli nya parata, va dzi ningela ga babe wa nyamahegyane, kholu pwadzide phungu nyamahegyane nya likendzi wa Israyeli. Vbavbandze nya isoso, nyamahegyane a na khala mwangadzi waye, a nuye kha na nga mu tutumisa guvbanyani gwaye gwatshavbo.

²⁰Khu guralo, isoso a gu bani ari lisine, wu si manegi wufakazi nya wukendzi ga nyamahegyane wule,

²¹va na mu dzega va gu hongola naye nyangwatunu nya ndranga ya babe waye, vama va dhoropani gwaye va na mu pfara khu siwindri kala afa, kholu giride dzitshoni tigoni ga Israyeli, a dzi gira libhemba ndrangani ga babe waye; khu guralo, u na vbedza guvivba vbakari gwago.

²²Mwama nya gukari a gu manwa na lade ni mwangadzi wa mumbe mwama, vatshavbo va na songwa, mwama a ladego ni nyamayi, ni nyamayi a ladego ni mwama; khu guralo, u na vbedza wuvivbi tigoni ga Israyeli.

²³Ga gu manega mbiri, yi nga wutwa khu mwama nya gukari, a ta mumbe mwama dhoropani, a ta manana ni mbiri yoyo a lala nayo,

²⁴khavbo avbo, mu na va dzega vatshavbo mu hongola navo nyangwatunu nya lidhoropa lile, mu ya va pfara khu siwindri kala vafa; kholu nyamahegyane kha womba huwa dhoropani, ni mwama, kholu a poyide mwangadzi wa ndriyaye; khu guralo, u na vbedza wuvivbi vbakari gwago.

²⁵Khu guralo, a gu manega mwama nya gukari a mana mbiri na yi wutidwe a yi pfinya khu tshivba a lala nayo, avbovbo a na songwa basi mwama a nga lala naye;

²⁶ga mbiri u nga giri gilo; uye mwalo nandru nya lufu, mahungu yaya ma ngu fanana ni mwama a wugelago ndriyaye a mu songa.

²⁷Kholu mwama wule a di mana nyamahegyane a tumbisidwego nari khabini a mu manide khabini; mbiri yi wombide huwa, aholu kha ga manega muthu nya gute mu lamulela.

²⁸Mwama nya gukari a gu mana nyamahegyane nya likendzi, a ngamba wutwa, a mu pfinya a lala naye, va manwa,

²⁹ avbovbo mwama a nga lala ni mbiri yile a na ningela ga babe wa nyamahegyane livbandre magumi dzisekeli nya parata; kholu a mu poyidego, a na mu dzega a khala mwangadzi waye; kha gu kodzegi gu mu tutumisa guvbanyani gwaye gwatshavbo.

³⁰ Ni mwama a nga lali ni mayidugwane waye, a nga nyenyezisa lidawu la babe waye.