Read gitonga Dhewuteronome 25 Bible Online

Dhewuteronome 25 - gitonga bible

Dhewuteronome 25

¹Vathu vavili va gu dwana, vata dzi bikela phathani nya madhota gasi guta lamudwa, valamuli va na tshule oyu a lulamidego, va tsayisa uye a ghohidego.

²Uye a ghohidego a gu bani a gu yela gu kwamudwa, mulamuli a na mu ladzisa vbavbatshi a kwamudwa nari mbeli gwaye, gu khedza khu tengo nya dzimboma nya nandru waye.

³A nga kwamudwi guvbindra magumana dzimboma, kholu a gu kwamudwa guvbindra tengo yoyo nya dzimboma, ndriyago a na thedwa dzitshoni mahoni gwago.

⁴ U nga hungi likana nya mombe yi vbulago dzimbewu.

⁵Koma ni nandra va gu vbanya dangamwedo, moyo wawe a gufa na sa tshiya gyanana, khavbo avbo, mwangadzi wa oyu a fudego, kha yeli gu dzegwa gambe khu nombo, vbavbandze ga nongo wa mwama waye; a na hambedwa khu namu waye a mu hakha kha nga mwangadzi waye, gasi gu tadzisa fanelo yaye nya wulamu.

⁶ Gyanana nya matiwula a na velegago naye, gi na tshikhedza lina la ndriyaye a fudego, gasi lina laye li si fuvi tigoni vbakari ga Israyeli.

⁷Aholu, mwama a gu bomba gudzegana ni namu waye, nyamayi a na hongola hudzwetunu nya madhota aya ganela, khuye: “Namu wangu a ngu bomba gu wusedza lina la ndriyaye vbakari ga Israyeli, kha vbweti gu landrisa nayo nya guhambele a gu fanelo nya wulamu.

⁸Khavbo avbo, madhota ya dhoropani gwaye ma na ni fanelo nya gu mu rane va ta ganela naye; aholu uye a gu simama a bomba, khuye: Kha nyi mu vbweti,

⁹ avbovbo namu waye nya nyamayi a na mu hidzimelela a mu tshula gilato ngondroni na gu wonwa khu madhota, a mu hetshela khovbeni, a ganela, khuye: Gu na girwe kharato ga muthu a bombago gu wusa ndranga ya ndriyaye;

¹⁰tigoni ga Israyeli, ndranga ya mwama yoyu, yi na ranwa gupwani: Ndranga nya gutshudwe gilato.

¹¹Vama vavili va gu dwana khu gyawe, mwangadzi wa moyo nya avo, a hidzimela guya emela mwama waye, gasi gu mu vbulugisa mandzani ga oyu a mu bayisago, a thawuludza mandza yaye a mola wama waye,

¹²uwe mu pile mandza yaye, u nga mu pweli gisiro.

¹³Kha gu vbwetegi gu dzega kwamani gwago mipimo mivili nya guhambanelane gasi gu pima gilo gya gimwegyo, moyo nya khongolo ni mumbe nya wudugwana.

¹⁴Ni nyumbani gwago gu nga manegi mipimo mivili nya guhambanelane nya efa, moyo nya khongolo ni moyo nya dugwana.

¹⁵U fanede gu manega ni pimo moyo nya guvbelele; gasi u kodze gu engedzedwa matshigu khu PFHUMU Nungungulu wago, ga litigo a na gu ningago.

¹⁶ Kholu muthu watshavbo a girago wu kanganyisi, a gu gira manyala mbeli ga PFHUMU Nungungulu wago.

¹⁷ Alakanya esi Amaleki a gu giredego ndzilani, gikhati u nga bani u duga khu Egipito;

¹⁸edzi a nga gu khingago khidzo ndzilani a ta gu dhumela khu hwane gwago, a sasela vatshavbo va nga bani va tshade khu hwane gwago, avbo u nga bani nu garade ni gu vbela tshivba; uye kha ninga githawo Nungungulu.

¹⁹ Khu guralo, avbo PFHUMU Nungungulu wago a na gu hefemudzago ga valala vago va gu randredego, ga litigo eli PFHUMU Nungungulu wago a na gu ningago gasi gu khala thomba yago, u fanede gu fuvisa lina la Amaleki vbavbatshi nya lidambo; u nga divali esi nyi gu embelago.