Read gitonga Dhewuteronome 26 Bible Online

Dhewuteronome 26 - gitonga bible

Dhewuteronome 26

¹Avbo u na belago ga litigo eli PFHUMU Nungungulu wago, a gu ningago gu khala thomba yago, u khala umo u li fumela,

² u na dzega mihandro nya guphele nya satshavbo iso mu na gu vbwerago sa mahangeni ya tigoni omu PFHUMU Nungungulu wago, a na gu ningago, u na si thela mugitundruni, u hongola naso ga wulanga owu PFHUMU Nungungulu wago, a na gu wu hathago gasi gu khala avbo lina laye.

³U nata ga muphasi nya mhamba a na gu bani nari thumoni khu matshigu yoyo, u ya mu embela, khuwe: “Muhuno, nyi ngu ganela ga PFHUMU Nungungulu wathu, kheni nyi bede ga litigo eli PFHUMU Nungungulu, khu gusambanya, a tumbisidego gu li ninga vababe vathu.

⁴Muphasi nya mhamba a na dzega gitundru mandzani gwago, a gi vega mbeli nya giluvelo gya PFHUMU Nungungulu wago.

⁵Khavbo avbo, u na huwata mbeli ga PFHUMU Nungungulu wago, u ganela, khuwe: Babe wangu a diri Muarami, nya mulegalegi, na gumbide, a di hongola tigoni ga Egipito, nari ni vathu nya vadugwana aya vbanya iyoyo kha nga muluveli; aholu, khiyoyo a di ya vbindrugedza a gu khala litigo nya likhongolo nya tshivba, nya vathu nya vangi.

⁶Aholu Vagipiti va di hi tshanisa khu dzihanyi va hi rwega mithumo nya gulemele.

⁷Khu guralo, hi di lila ga PFHUMU Nungungulu wa vababe vathu; PFHUMU Nungungulu a dipwa lito nya gulile gwathu; a wona gutshaniseka, mithumo gumogo ni wuvi wathu;

⁸PFHUMU Nungungulu a di hi dusa khu tigoni ga Egipito khu mandza yaye nya tshivba, ni libogo nya gukhugege, khu sisamadziso nya sikhongolo, siyeyedzo ni siliwugiso.

⁹A di hi resa ga wulanga wowu, ni gu hi ninga litigo leli, litigo li gogago mahwe ni wulombe.”

¹⁰Olu, nyi ngu resa mihandro nya gu phele nya litigo eli uwe PFHUMU Nungungulu, u nyi ningidego. Khavbo avbo, u na yi vega mbeli ga PFHUMU Nungungulu wago, u khidzima mbeli gwaye.

¹¹Khavbo avbo, u na nengela khu satshavbo nya sadi esi PFHUMU Nungungulu wago a gu ningidego, uwe gumogo ni ndranga yago, ni Mulevhi, gumogo ni muluveli a vbanyago vbakari gwago.

¹²Khu mwaga nya wuraru, a gu mwaga nya miningelo nya gipandre nya likhumi, avbo u na vbedzago gu kabanisa miningelo yatshavbo nya likhumi, khavbo avbo, u na yi ningela ga va na Levhi, muluveli, khulungu ni malile, gasi va hodza navo va khura umo nya lidhoropa lago.

¹³U na ganela mbeli ga PFHUMU Nungungulu wathu, khuwe: Ga silo sa ndrangani gwangu nyi kaside esi si agisedwego PFHUMU Nungungulu, nyi ninga nuye Mulevhi, muluveli, khulungu ni malile, gukhedza khu milayo u nyi ningidego; gimwalo nya nayo wago nyi hambanisidego, ambari gu gi divala.

¹⁴Kha nya hodza miningelo nya gipandre nya likhumi na nyiri vbakari nya malilo yangu, ambari gu dusa na nyi nyenyezide, gambe gimwalo nyi nga dusago nyi ningela guphasela muthu a fudego; nyi yingiside lito la PFHUMU Nungungulu wangu, satshavbo u nyi rumidego, nyi giride.

¹⁵Wona gukhugela khu nyumbani gwago nya guage, khu ndzadzini yoyo, kategisa vathu vago, va na Israyeli ni litigo u hi ningidego, kha nga u nga sambanyago ga vababe vathu, litigo li gogago mahwe ni wulombe.”

¹⁶Mosi a di embela vathu, khuye: “Muhuno PFHUMU Nungungulu wathu, a ngu gu ruma gu landrisa milayo ni sileletelo sesi; khu guralo, si vegedze ni gu si landrisa khu monyo wago watshavbo ni hefemulo wago watshavbo.

¹⁷Muhuno, u tiyiside gu khuwe, Pfhumu, khuye a gu Nungungulu wago, ni gu khuwe u na gimbila khu dzindzila dzaye, u vegedza sileletelo, sirumo ni milayo yaye, ni gu yingisa lito laye.

¹⁸ Uye, nuye muhuno PFHUMU Nungungulu, tiyiside khuye, enu mu vathu mu lumbago uye basi, Uye a ngu mi ruma gukhuye mu fanede gu sayisa milayo yaye yatshavbo.

¹⁹Khu guralo, a na mi kategisa, a mi khusedza vbatshani nya mayigo yatshavbo a ma giridego, mu ma vbindra khu wudhumo ni wuzundzo ni ndruma, gasi mu khala litigo lile nya vathu va agidego mahoni ga PFHUMU Nungungulu wanu, kha nga idzo a ganedego khidzo.