Read gitonga Dhewuteronome 27 Bible Online

Dhewuteronome 27 - gitonga bible

Dhewuteronome 27

¹Mosi gumogo ni madhota ya Israyeli a di laya vathu, khuye: Vegedzani milayo yatshavbo eyi nyi mi leletedego muhuno.

²Ga litshigu mu na gu tshatugago tsongo wa Joridhani gasi guya bela ga litigo lile PFHUMU Nungungulu wago a na gu ningago, u naya emisa siwindri nya sikhongolo u si pendra khu phembe.

³Hwane nya gu bani mu tshatugide, nu gu bela ga litigo nya ladi mu ningwago khu PFHUMU Nungungulu wanu, litigo li gogago mahwe ni wulombe, kha nga idzo PFHUMU Nungungulu wago a mi tumbisidego khidzo, mu naya lova vbatshani nya siwindri yatshavbo magana nya nayo yoyu.

⁴Avbo mu na tshatugago, na muri khisikheyi nya tsongo wa Joridhani, mu naya emisa siwindri sesi muhuno nyi mi leletelago gigomoni gya Ebhali, bwelo khavbo mu si pendra khu phembe.

⁵Mu naya vbaha vbale giluvelo gya PFHUMU Nungungulu wanu, giluvelo gyakone mu na gi vbaha khu siwindri nyamba vatwa khu simbi.

⁶ Giluvelo gegi mu na gu vbahelago PFHUMU Nungungulu wanu, mu na gi emisa khu siwindri nyamba vatwa, mu ningela avbo miphaso nya guvbiswe.

⁷Mu naya ningela avbo miningelo nya gurule; mu naya yi hodza iyoyo mu nengela mbeli ga PFHUMU Nungungulu wanu.

⁸Mu na lova vbatshani nya siwindri sesi, magana yatshavbo nya nayo yoyu, ma wonega gwadi.

⁹Mosi a di ganela ga va na Israyeli nari gumogo ni vaphasi nya mhamba, va na Levhi, khuye: “Enu va na Israyeli, degulani mu yingisa! Muhuno mu khade vathu va PFHUMU Nungungulu wathu,

¹⁰khu guralo, yingisani satshavbo iso Uye a mi rumago, ni gu landrisa sirumo ni milayo yatshavbo eyi muhuno nyi mi ningago.”

¹¹Khu litshigu lolo, Mosi a di ninga sileletelo sesi va na Israyeli, khuye:

¹² Aya khu mahundzu ma na gu bani ma romo gigomoni ga Garizimi gasi gu kategisa vathu, hwane nya gu bani mu tshatugide tsongo wa Joridhani: Simiyoni, Levhi, Judha, Isakari, Josefe ni Bhejami.

¹³Gasi avo va naya emago gigomoni gya Ebhali gasi gu ganela magana nya givalo khava: Rubheni, Gadhi, Aseri, Zebhuloni, Dhani ni Nafitali.

¹⁴Va na Levhi va na khusedza malito va ganela ga va na Israyeli, khavo:

¹⁵ Libango ga muthu a dzi girelago gifananiso nya guvatwe mwendro nya gupfhudwe, kholu manyala ga PFHUMU Nungungulu, gilo nya gugirwe khu thumo nya wumeseri, a gi vega gusihalani gasi gu gi khzela. Vathu vatshavbo va na hakha, khavo: “Amen!”

¹⁶ Libango ga wule a vengago babe mwendro mayi waye. Vathu vatshavbo va na hakha, khavo: “Amen!”

¹⁷ Libango ga wule a vbindrugedzago mivbingano ya muakelane waye. Vathu vatshavbo va na hakha, khavo: “Amen!”

¹⁸ Libango ga wule a khulugisago gikhumu ndzilani. Vathu vatshavbo va na hakha, khavo: “Amen!”

¹⁹ Libango ga wule a hambanisago fanelo ya muluveli, ya khulungu ni ya malile. Vathu vatshavbo va na hakha, khavo: “Amen!”

²⁰ Libango ga wule lalago ni mayidugwane waye, kholu a gu funungula wumbwiri wa babe waye. Vathu vatshavbo va na hakha, khavo: “Amen!”

²¹ Libango ga wule a lalago ni girengo. Vathu vatshavbo va na hakha, khavo: “Amen!”

²² Libango ga wule a lalago ni ndriyaye, a gu gyanana gya babe waye mwendro gyanana gya mayi waye. Vathu vatshavbo va na hakha, khavo: “Amen!”

²³ Libango ga wule a lalago ni ngogadzi waye. Vathu vatshavbo va na hakha, khavo: “Amen!”

²⁴Libango ga wule a songago muakelane waye gusihalani. Vathu vatshavbo va na hakha, khavo: “Amen!”

²⁵Libango ga wule a dzumelago gu livbwa gasi gu songa muthu nyambana nandru. Vathu vatshavbo va na hakha, khavo: “Amen!”

²⁶ Libango ga wule a na gumba tiyisa magana nya nayo yoyu, ni gu ma landrisa. Vathu vatshavbo va na hakha, khavo: “Amen!”