Read gitonga Dhewuteronome 29 Bible Online

Dhewuteronome 29 - gitonga bible

Dhewuteronome 29

¹Aya khu magana nya gidzumeledzwano, egi PFHUMU Nungungulu a rumidego Mosi gu gi tiyisa ni va na Israyeli, tigoni ga Mowabhi, gu diga nya gidzumeledzwano a gi tiyisidego navo gigomoni ga Horebhi.

²Mosi a di ramba vatshavbo va na Israyeli, a va embela, khuye: Mu wonide satshavbo esi PFHUMU Nungungulu a giridego mahoni gwanu tigoni ga Egipito, ga Faro, ga sithumi saye ni ga litigo laye latshavbo:

³Silingo nya sikhongolo, siyeyedzo ni sisamadziso iso mu si wonidego khu maho yanu.

⁴Khu guralo, kala na muhuno PFHUMU Nungungulu a di si gu mi ningi monyo nya gu si pime, maho nya gu si wone, ambari dzindzeve nya gu si yingise.

⁵Eni nyi mi gimbidziside gipimo nya magumana myaga giwulani, aholu guambala gwanu mu nga bani mu ambala kha gwa kuwuluga ni silato sa migondroni gwanu kha sa hagala.

⁶Kha mwa hodza guhodza, kha mwa sela vbinyu mwendro wadwa nya guvave, gasi mu kodza gu nyiti gukhenu Eni kheni PFHUMU Nungungulu wanu.

⁷ Na mu vbohide ga wulanga wowu, Seyoni, mufumeli wa Hesibhoni, ni Ogi, mufumeli wa Bhasani, va di duga gasi guta hi dwanisa, aholu ethu hi di ta va pala.

⁸ Hi di dzega litigo lawe, hi li ningela kha nga thomba ga va na Rubheni, ga va na Gadhi ni ga gipandre nya lihundzu la va na Manasi.

⁹Khu guralo, vegisani magana yaya nya gidzumeledzwano gegi, mu ma landrisa, gasi mu kodza gu dugelela ga satshavbo mu na si thumago khu mandza yanu.

¹⁰Enu mwatshavbo, vathangeli vanu, mahundzu yanu, madhota yanu, dzindruna dzanu, vavbanyi vatshavbo va Israyeli, mu womo muhuno mbeli ga PFHUMU Nungungulu wanu,

¹¹sanana sanu, vagadzi vanu, gumogo ni muluveli a vbanyago vbakari nya lizumbo lanu, gukhugela mukoki nya dzikhuni kala muregeleli wanu nya mati;

¹²gasi mu bele ga gidzumeledzwano PFHUMU Nungungulu wanu, a gi giridego khu gisambanyo; gidzumeledzwano egi PFHUMU Nungungulu wanu, a gi tiyisidego muhuno nanu,

¹³gasi gu mi gira vathu Vaye, ni gu Uye a khala PFHUMU Nungungulu wanu, kha nga edzi a mi tumbisidego khidzo, mayelano ni gisambanyo a giridego ga vababe vanu, Abrahama, Isaki ni Jakobe.

¹⁴Khandri ni enu basi nyi tiyisago gidzumeledzwano gegi ni gisambanyo gegi,

¹⁵nya gu gi tiyisa gambe ni vatshavbo ava va guromo avba ni ethu muhuno, mbeli ga PFHUMU Nungungulu wathu, nyi gi tiyisa gambe ni vatshavbo muhuno hi gu mwalo navo avba.

¹⁶Enu mu ngu dziti gwadi edzi hi nga vbanyisa idzo tigoni ga Egipito, ni esi hi nga si manago vbakari nya mayigo hi nga ma tsemakanyago.

¹⁷Mu wonide manyala yawe, ni vanungungulu vawe nya guvatwe khu misimbo ni siwindri, ni parata ni ndralama, va nga bani vari naso.

¹⁸ Vbakari gwanu gu nga manegi mwama, nyamayi, lipango mwendro lihundzu eli myonyo yawe yi ndreyago ga PFHUMU Nungungulu wathu, yiya thumela vanungungulu va mayigo yaya; gu nga manegi vbakari gwanu khamba wu dusago wuhungu ni wuvasi nya gusonge.

¹⁹Ni wevbini a na pwago magana nya givalo gegi a nga dzi khusedzi khu monyoni gwaye, khuye: Nyi na mana gurula, ambari nya gu gimbila khu ndzila nya guwegele yi godwago khu monyo wangu; kholu, talo nya mati wu na tshima lidora.

²⁰PFHUMU Nungungulu kha na nga dzumela gu mu tsetselela; gambe li na engedzelana gu khondra likhulo la PFHUMU Nungungulu ga muthu yoyu, sitsayiso satshavbo si lovidwego libhukuni momu, si na thegela vbatshani gwaye. PFHUMU Nungungulu a na futa lina laye mafuni.

²¹PFHUMU Nungungulu a na mu phawusa a mu vega phuvbo, ga mahundzu yatshavbo ya na Israyeli, gasi a thegedwa khu mabango ni sivalo nya gidzumeledzwano gegi si lovidwego Libhukuni momu nya Nayo.

²²Khavbo avbo, mimelana yi nga gutago nya sanana sanu, avo va na gutago khu hwane gwanu, ni muluveli a na tago khu mayigoni ya hwindzo, va na wona dzitshanisa dza tigoni momu gumogo ni mabango PFHUMU Nungungulu, a na ma thesago avbo gwaye.

²³ Va na wona litigo latshavbo na li vbisidwe khu nilo nya sulufa ni munyu, nyamba dzumela gu yadwa gilo, mwendro gu buga gilo ambari gu manega ni mwasi, kha nga iso si giregidego gukhungumudwani gwa Sodhoma ni Ghomora, Adhimani ni Zebhoyimi, madhoropa ma khungumudwego khu kotani nya likhulo la PFHUMU Nungungulu.

²⁴Khu guralo, mayigo yoyo yatshavbo ma na wudzisa, khayo: Khu ginani PFHUMU Nungungulu a giridego esi tigoni momu? Khu gevbini givangelo gi nga wusago likhulo nya nga eli?

²⁵Khavbo avbo, va na ganela, khavo: Kholu va nga diga gidzumeledzwano egi PFHUMU Nungungulu wa vababe vawe a giridego navo, gikhati a nga va dusago tigoni ga Egipito;

²⁶va hongola va ya thumela vambe vanungungulu ni gu va khozela; vanungungulu va ngamba vati, avo va ngamba ningwa gu khala thomba yawe.

²⁷Khidzo kharato, likhulo la PFHUMU Nungungulu li nga khondra tigoni mule, a li resela sitsayiso satshavbo si lovidwego libhukuni momu.

²⁸Khu kotani nya likhulo, PFHUMU Nungungulu a di va sigula tigoni gwawe, khu gu vbisega ni khorodza, a va dzudzuga ga limbe litigo, kha nga mu si wonago muhuno.

²⁹Silo si sihadego sa gu lumba PFHUMU Nungungulu wathu, aholu iso nya guwonege sa gu lumba ethu gikhati gyatshavbo gumogo ni sanana sathu, gasi hi kodza gu landrisa magana yatshavbo nya Nayo yoyu.