Read gitonga Dhewuteronome 3 Bible Online

Dhewuteronome 3 - gitonga bible

Dhewuteronome 3

¹Hwane ga avbovbo, hi di thendregedza hi gwela khu ndzila nya guye Bhasani; hi di khingwa khu Ogi, mufumeli wa Bhasani, uye a diri ni vathu vaye nya nyimbi gasi guta hi dwanisa tigoni ga Edhireyi.

²Khavbo avbo, PFHUMU Nungungulu a di nyi embela, khuye: U nga mu thavi, kholu nyi mu ningede mandzani gwago uye ni vathu vaye ni litigo laye; u na mu gira kha nga idzo u giridego Seyoni, mufumeli wa Vaamori va nga bani na va gu vbanya Hesibhoni.

³PFHUMU Nungungulu wathu ningede mandzani gwathu Ogi, mufumeli wa Bhasani, gumogo ni vathu vaye vatshavbo; hi va sasede kala havo bhi nyamba tshala ni moyo nya guvbanye.

⁴Khu gikhati gyogyo, hi di dzega madhoropa yawe yatshavbo; li mwalo ni limwedo lidhoropa hi ngamba li dzega; livbandre na limwedo magumi madhoropa, litigo latshavbo la Arigobhi li nga bani li gu fumwa khu Ogi, mufumeli wa Bhasani.

⁵Madhoropa yatshavbo yaya ma diri ya makhokhola nya makhongolo nya gulaphe, malimba yakone ma diri ni sigonyo nari ya simbi; hi dzega gambe ni mambe madhoropa nyamba bhiywa.

⁶Hi mu mbembisede muphelo kha nga idzo hi nga girago Seyoni, mufumeli wa Hesibhoni, hi khungumulela madhoropa yaye gumogo ni vama, vanyamayi ni sanana.

⁷Aholu, sifuyo satshavbo ni satshavbo hi nga phangago madhoropani, hi di dzega si khala phango wathu.

⁸Khu gikhati gyogyo, hi dzegide litigo latshavbo mandzani ga vafumeli va vavili nya Vaamori, vale va nga bani vari khu khisikheyi ga Joridhani; gukhugela tsongoni wa Arinoni kala gigomoni gya Herimoni.

⁹Vasidhoni va di rana gigomo gya Herimoni khu lina la Siriyoni; aholu Vaamori va di gi rana khavo Seniri.

¹⁰Hi dzegide madhoropa yatshavbo ya mapanini, Gileyadhi watshavbo, Bhasani watshavbo, kala Salika ni Edhireyi, madhoropa nya mufumo wa Ogi wa Bhasani.

¹¹Kholu Ogi, mufumeli wa Bhasani, khuye enga a nga bani na tshade nya lihundzu nya sidandrangulu, Varefayini; lidawu laye a diri la simbi li nga bani liri ni pimo nya livbandre na mina mikono gulapha, guanama li diri ni mikono mina, mayelano khu pimo wu nga bani wu thumiswa gikhati gyogyo. Li nga romo kala na muhuno.

¹²Hi dzegide khu gikhati gyogyo litigo leli li khala thomba yathu, gukhugela Aroweri, a khadego vbafuvbi ni kova wa Arinoni, ni gipandre nya gigomo gya Gileyadhi, ni madhoropa yaye, nyi ningela va na Rubheni ni va na Gadhi.

¹³Ilo li nga tshalago la Gileyadhi, gumogo ni Bhasani watshavbo, nya mufumo wa Ogi, nyi di ninga gipandre nya lihundzu la Manasi; gipandre gile gyatshavbo gya Arigobhi, Bhasani watshavbo, gu di ranwa gupwani; litigo la Varefayimi.

¹⁴Jayiri, mwamana wa Manasi, a di dzega gipandre gyatshavbo gya Arigobhi kala vbinganoni ga Gesuri ni va na Mahaka, a li thangisa lina laye, khuye: Havoti-Jayiri, gu bhamusago gupwani dzindranga dza Jayir kala na muhuno.

¹⁵Nyi ningede litigo la Gileyadhi ga Makiri.

¹⁶Aholu va na Rubheni ni va na Gadhi, nyi va ningide gukhugela Gileyadhi kala kovani wa Arinoni, gu gira vbingano vbakari nya kova kala gitsongwanani gya Jabhoki, vbingano wa sanana sa Amoni,

¹⁷gumogo gambe ni Arabha ni Joridhani wu gu vbinganoni, gukhugela Kinereti kala phwani ga Arabha, yiphwa nya Munyu, khu vbavbatshi nya gigomo gya Pisiga, guya Khugadambo.

¹⁸Ga gikhati gyogyo gya gimwegyo, nyi mi leletedeni, kheni: PFHUMU Nungungulu wanu, a mi ningide litigo leli, gasi mu li dzege; khu guralo, tsemakanyani, enu mwatshavbo dzindrena na mu pharide matshari mbeli ga vandriyanu, sanana sa Israyeli.

¹⁹Vbavbandze basi ga vagadzi vanu, ni sanana sanu, ni sifuyo sanu, (kholu nyi ngu dziti nya gukheni mu na ni sifuyo nya singi), si na khala madhoropani gwanu nyi mi ningidego,

²⁰ kala PFHUMU Nungungulu kala Pfhumu Nungungulu a ninga vandriyanu guhefemula nya nga ogu a mi ningidego enu; kala avo navo va dzege litigo eli PFHUMU Nungungulu wanu, a na gu va ninga la khisikheyi nya tsongo wa Joridhani; khavbo moyo ni moyo a na bwelela ga thomba yaye nyi mu ningidego.

²¹Ga gikhati gyogyo gambe, nyi leletede Josuwa nyi mu embela, kheni: Maho yago ma wone satshavbo esi PFHUMU Nungungulu wanu, a giridego ga vafumeli vava va vavili; PFHUMU Nungungulu a na gira idzosaye ga mifumo yatshavbo u na gu yi tsemakanyago.

²²Mu nga va thavi, kholu PFHUMU Nungungulu wanu, khuye a na mi dwanelago.

²³“Ga gikhati gyogyo gambe, nyi di lombelela ga PFHUMU Nungungulu, kheni:

²⁴Ama PFHUMU Nungungulu! U phede gu yeyedza ga githumi gyago wugulu wago ni libogo lago nya tshivba; khu mani mumbe nungungulu, ndzadzini mwendro mafuni a dzi kodzago gu gira mithumo yago, ni tshivba nya nga u giridego?

²⁵Nyi ngu gu lomba nyi dige nyi tshatuga, gasi nyi ya wona litigo leli nya ladi li guromo khu khisikheyi nya tsongo wa Joridhani, litigo lile nya gigomo gumogo ni Libhanoni.

²⁶Khu guralo, PFHUMU Nungungulu a di nyi gorogela, khu kotani gwanu, kha nga nyi yingisa; a di nyi embela, khuye: Basi! U nga nyi embeli gambe khu isoso.

²⁷ Aholu gwela tshokhatunu nya gigomo gya Pisiga, khusa maho yago u khedza phuvbo ga Muhwadambo ni Wuronga; ga Marandzi ni Khugadambo, gu wone basi khu maho, kholu kha wu na tshatuga tsongo wa Joridhani.

²⁸Leletela Josuwa, u mu ninga tshivba ni gu mu tiyisa hwambo; kholu khuye a na thangago mbeli ga vathu vava a gu va bedza ga litigo lile uwe u na gu li wonago khu maho basi.

²⁹Khu guralo, hi di khala kovani momu wu khedzanidego ni Bheti-Peyori.”