Read gitonga Dhewuteronome 31 Bible Online

Dhewuteronome 31 - gitonga bible

Dhewuteronome 31

¹Mosi a di simama a ganela ga vatshavbo va na Israyeli magana yaya,

² a va embela, khuye: “Eni muhuno nyi na ni tanga nya lizana ni magumavili (120) myaga. Kha nyi na dzi kodza gambe gu simama kha nga muthangeli wanu. Gu diga nya isoso, PFHUMU Nungungulu a nyi embede, khuye: Uwe gima khu na tshatuga tsongo wa Joridhani.

³PFHUMU Nungungulu wago, a na gu thangela; Uye a na mbembisa mayigo yaya mbeli gwago, uwe u na ma fumela. Josuwa a na thanga mbeli gwago kha nga idzo a gu embedego khidzo PFHUMU Nungungulu.

⁴ PFHUMU Nungungulu a na gira ga vathu vovo idzosaye ni idzo a giridego ga Seyoni ni ga Ogi, vafumeli va Vaamori, avo a nga va saselago gumogo ni litigo lawe.

⁵Avbo PFHUMU Nungungulu a na mi ningago vathu vovo, enu mu na girani khu avo, kha nga idzo wu rumago khidzo nayo watshavbo nyi mi ningago.

⁶Khalani vathu nya gutiye ni gutimisela, mu nga thavi ambari gu thuruga mbeli gwawe, kholu PFHUMU Nungungulu wanu, khuye a na gimbilago nanu; kha na mi diga ambari gu hambana nanu.”

⁷Mosi a di rana Josuwa mbeli ga va na Israyeli vatshavbo, a mu embela, khuye: Tiya longo u si vbeli tshivba; kholu u na bela ni vathu vava, ga litigo eli PFHUMU Nungungulu a sambanyidego gu li ningela ga vababe vago; uwe khuwe u na va ningago va li fumela.

⁸ PFHUMU Nungungulu khuye a na thangago mbeli gwago; Uye a na bani nari nago, kha na hambana nago ambari gu gu diga; u nga vbeli tshivba ambari gu khala hwanga.

⁹Nayo yoyu, Mosi a di wu lova a ningela vaphasi nya mhamba, sanana sa Levhi, va nga bani va gu rwala Ngasa nya Gidzumeledzwano ya PFHUMU Nungungulu gumogo ni madhota yatshavbo ya na Israyeli.

¹⁰Mosi a di va leletela, khuye: Guvbelani nya livbandre na mivili myaga, a gu mwaga nya dzegiso, avbo nya Buzo nya Mitshatsha,[10]

¹¹gikhati va na Israyeli vatshavbo va ta dzi wonegisago mbeli ga PFHUMU Nungungulu wago, vbawulangatunu a nga wu hathago, uwe u na hevbula Nayo yoyu mbeli ga va na Israyeli vatshavbo.

¹²Tombanisa vathu, vama, vanyamayi, sanana, ni valuveli vatshavbo va na gu bani va romo dhoropani gwago, gasi va wu yingise, ni gu wu hevbula, va kodza gu ninga githawo PFHUMU Nungungulu wanu ni gu zama gu landrisa magana yatshavbo nya Nayo yoyu;

¹³gasi sanana sanu si si wutigo si hevbule gu ninga githawo PFHUMU Nungungulu wanu, matshigu yatshavbo mu na vbanyago tigoni muyago umo guya li fumela, mwa gu tshatugani tsongo wa Joridhani.

¹⁴PFHUMU Nungungulu a di embela Mosi, khuye: Nyi ngu wona nya gukheni matshigu yago nya gufe ma ngu hidzimela; khu guralo, rana Josuwa mu ta dzi bikela umo nya Tshatsha nya Tshangano, gasi nyi ta mu ninga milayo yangu. Khavbo avbo, Mosi ni Josuwa va di ya dzi wonegisa umo nya Tshatsha nya Tshangano.

¹⁵PFHUMU Nungungulu, a di dzi wonegisa vbale, nari khumo nya lipfhi, nyangwatunu nya Tshatsha.

¹⁶Khavbo avbo, PFHUMU Nungungulu a di embela Mosi, khuye: Wona gukhuwe u ngu hadza guya lala gumogo ni vavelegi vago; gasi vathu vava va na khala maphuphulu, va landrela vambe vanungungulu nya malipha va tigoni va yago umo, va na nyi diga, va hambanisa gidzumeledzwano nyi giridego navo.

¹⁷Khu litshigu lolo, likhulo langu li na khondra vbakari gwawe, nyi va diga ni gu va sihela khovbe yangu, nyi va diga va mbembiswa khu dzimhango nya gutale; ni dzitshanisa dzi nata vbatshani gwawe; aholu avo va na ganela, khavo: Ina libango leli khandri la gu hi thegela kholu PFHUMU Nungungulu wathu, a gu mwalo vbakari gwathu, gani?

¹⁸Khu lisine kamwe, khu litshigu lolo eni nyi na va sihela khovbe yangu, khu guvivba gwatshavbo va na gu bani va giride, khu gu landrela vambe vanungungulu.

¹⁹Olu, nyi ngu mi lovelani ndzimo yeyi; yi hevbudzeni ga va na Israyeli, yi vegeni kanani gwawe, gasi ndzimo yeyi yi khale kha nga fakazi yangu vbakari ga va na Israyeli.

²⁰Gikhati nyi na va bedzago ga litigo eli nyi li sambanyedego ga vababe vawe, litigo li gogago mahwe ni wulombe, mu na ya hodza mu khura, gambe mu naya ena. Aholu va na phela guya khozela vambe vanungungulu, va nyenya Eni, va hambanisa gidzumeledzwano gyangu.

²¹Khu guralo, gikhati va na gu namaredwago khu mabango nya gutale, ndzimo yeyi yi na khala kha nga fakazi mbeli gwawe; kholu iyo gima kha yi na divadwa maganani ga situgulwana sawe. Kholu Eni nyi ngu mati maalakanyo ya myonyoni gwawe va girago muhuno, nyi si gu va vbohisi ga litigo nyi va sambanyedego gu va ninga.

²²Khu guralo, Mosi khu litshigu lolo, a di lova ndzimo yeyi a yi hevbudza ga va na Israyeli.

²³ Khavbo avbo, PFHUMU Nungungulu a di leletela Josuwa, mwamana wa Nuni, a mu embela, khuye: Tiya longo u si vbeli tshivba; kholu khuwe u na vbohisago sanana sa Israyeli ga litigo nyi sambanyidego gu va ninga; gasi eni nyi na bani nyiri nago.

²⁴Avbo Mosi a nga vbedzago gu lova magana nya Nayo yoyu umo nya libhuku,

²⁵a di leletela va na Levhi va nga bani va gu rwala Ngasa nya Gidzumeledzwano gya PFHUMU Nungungulu, khuye:

²⁶“Dzegani Libhuku leli nya Nayo, mu li vega khu wubambe nya Ngasa nya Gidzumeledzwano gya PFHUMU Nungungulu wanu, gasi li khala vbale kha nga fakazi yanu.

²⁷Kholu nyi ngu guti guyeyisa gwanu ni gu banga nya mihungo yanu; ambari nya gukhuwe nyi di bani nyi nga gu vbanya vbakari gwanu, enu mu kanyiside PFHUMU Nungungulu, ahati olu hwane nya gu bani nyi fude?

²⁸Tombanisani vbafuvbi gwangu vasingalagadzi vatshavbo nya mahundzu yanu, gumogo ni dzindruna dzanu, gasi nyi kodza gu ganela dzindzeveni gwawe, nyi na rana ndzadzi ni mafu, gasi yi kodze gu khala fakazi mbeli gwawe.

²⁹Kholu nyi ngu dziti gukheni, avbo nyi na gu bani nyi fude, mu na tshala mu gira silo nya gunyenyeze, mu ndreyani ndzilani nyi mi leletedego; khu guralo, khu matshigu nya guhegise, libango leli li na thega vbatshani gwanu, mwa gu gira esi si vivbidego mahoni ga PFHUMU Nungungulu, gasi mu wusa likhulo laye khu kotani nya mithumo ya mandzani gwanu.”

³⁰Khavbo avbo, Mosi a di ganela magana nya ndzimo yeyi dzindzeveni nya tshangano watshavbo wa na Israyeli kala ma vbela.