Read gitonga Dhewuteronome 33 Bible Online

Dhewuteronome 33 - gitonga bible

Dhewuteronome 33

¹Egi khu gikategiso Mosi, muthu wa Nungungulu, a ningidego sanana sa Israyeli, na si gufi.

²Khu guralo, a di ganela, khuye: PFHUMU Nungungulu dzude khu Sinayi, a dzi wonegiside gwawe khu Seyiri, a ngangamela gukhugela gigomoni ga Parani; a dita ni gidzemo nya likhumi magumi mazana (10.000) va nya guaga, khu nyamudye gwaye, wu di romo nilo nya Nayo wu lumbago avo.

³Khu lisine, Uwe U ngu gola vathu; va nya guaga vago vatshavbo, vomo mandzani gwago; va khala migondroni gwago, va hevbula nayo wago.

⁴Mosi a hi ningide nayo, gasi wu khala thomba nya tshangano wa Jakobe.

⁵Gu manegide mufumeli wa Jesurumi, avbo va nga tshanganago vathangeli nya mahundzu ya Israyeli.

⁶A na vbanye Rubheni, a ngafi, vathu vaye va na engedzelane!

⁷Avbo a nga bani na gu kategisa Judha a di khuye: Uwe PFHUMU Nungungulu yingisa lito la Judha, U li vbohisa vbakari ga vathu vaye; mandza yago, ma na mu dwanele, Uwe khala muphasedzeli U mu tshudzisa ga valala vaye!

⁸Ga Levhi, a di khuye: Uwe Nungungulu, ningela Tumimi yago ni Hurimi yago,[12] ga muthu nya gutumbege, U mu lingidego wulangani wa Masaha[13] u nga ganedzisana naye matini ya Meribha;[14]

⁹wule U nga embelago babe ni mayi waye, khuwe: Gima nyi si gu mi woni; ni vandriyaye kha nga vati, uye a si khathaleligo sanana saye, kholu vegedzide magana yago ni gu landrisa gidzumeledzwano gyago.

¹⁰U hevbudzide Jakobe gululama gwago ni nayo wago va na Israyeli; va di gu vegela libani dzithonvuni gwago, ni miningelo nya guvbiswe, vbagiluvelotunu gwago.

¹¹Kategisa tshivba yaye, Uwe PFHUMU Nungungulu dzumela gu hakha thumo nya mandza yaye, pila hwambo wa valala vaye, ni wa avo va mu vengago, gasi va si mu wugeli gambe.

¹²Na gu thula Bhejami a di ganela, khuye: Gigodwa gya PFHUMU Nungungulu, gi na khala gurulani gumogo naye; PFHUMU Nungungulu a na mu hetedza kala gupindruga, uye a na hefemula magatani gwago.

¹³Khu Josefe a di khuye: Litigo laye li na kategiswe khu PFHUMU Nungungulu, khesi nya gumbure si tago khu ndzadzini ni thondrwane, niso si tago khu guetani,

¹⁴a na va ninge siningwa nya sadi si vidziswago khu lidambo, ni mihandro yi dugago khu dzinango dzaye;

¹⁵ni dzimbewu nya dzadi dzi dugelago sigomoni sa gale, ni siningwa sa sigomwanani nya gupindruge;

¹⁶a na va ninge mafu nya gunone ni sivangwa saye satshavbo ni sikategiso sa uye a nga dzi wonegisa mugipoponi. Makategwa yaya ma na khale hungoni ga Josefe, ni hungoni gwa wule a nga pambudwago ga vandriyaye.

¹⁷Uye mburide kha nga gyanana nya matiwula gya mombe yaye! Dzikeho dzaye dzi ni tshivba kha nga dzikeho nya nyari; a nga mbembisa khidzo mayigo yatshavbo, kala mahegiso nya mafu: A gu sidzemo nya mahundzu ya na Efrayimi, mazanazana nya mahundzu ya na Manasi.

¹⁸Khu va na Zebhuloni, Mosi a di ganela, khuye: “Uwe Zebhuloni, tsaka malendroni gwago ya phwani, ni uwe Isakari, mitshatshani gwago!

¹⁹Avo va na tombanisa vathu gigomoni; avbovbo va na ya ningela miphaso nya gululame, kholu va na mana nya singi sa phwani ni dzithomba dzi sihidwego mafuni.”

²⁰Khu va na Gadhi, a di ganela, khuye: “A na rungudzwe Wule a andrisidego litigo la na Gadhi; uye a lalago umo kha nga nghala nya ngadzi, a vbadzulela mawogo ni gu pfarelela mihungo.

²¹A dzi hathede esi nya guhegule, si nga bani si sihidwe vbale, esi si lumbago muthangeli. Uye a di thanga mbeli ga vathu, a landrisa kharati gugola ga PFHUMU Nungungulu, gumogo ni gululama gwaye a giridego ga Israyeli!”

²²Khu va na Dhani, a di ganela, khuye: “Dhani ginghalana; gi na ndraga khu tigoni ga Bhasani.”

²³Khu va na Nafitali, a di ganela, khuye: “Nafitali a na hakha siningwa nya singi sa PFHUMU Nungungulu, gambe a na tala khu makategwa yaye, a na mana litsiva ni gipandre gya Marandzi!”

²⁴Khu va na Aseri, a di ganela, khuye: “Aseri a na kategiswe vbakari ga sanana sa Jakobe, a na nengedzise vandriyaye, ngondro waye wu na nagane khu mafura.”

²⁵Sikwinyaro sago si na manege nari sa simbi ni sugu, gurula gwago gu na simame kha nga matshigu nya guvbanye wago.

²⁶Mwalo mumbe nya gu fanane ni Nungungulu wa Jesurumi, uye atago a ta mu phasa, a tsemakanyago ndrengelenge nya mapfhi!

²⁷Nungungulu nya pindrugedwa, a na khale wuthavelo wago, khu vbavbatshi gwago, a na thawuludze mandza yaye nya gupindruge; Uye tutumiside valala mbeli gwago a gu embela, khuye: Va sasele.

²⁸Khu guralo, Israyeli a na khala na tiyide, ni nambo wa Jakobe wu na khadzisega, tigoni nya tirigu ni vbinyu, gu thegago thondrwane khu damboni.

²⁹U kategide uwe Israyeli! Khu mani a fananago nago, uwe u gu litigo u vbanyiswago khu PFHUMU Nungungulu! A gu gitshangu gyago gi gu vhikelago, ni litshari nya wugulu wago! Valala vago va na khoziswa mbeli gwago, aholu uwe u na gandredzela malanga yawe nya sigomo!