Read gitonga Dhewuteronome 34 Bible Online

Dhewuteronome 34 - gitonga bible

Dhewuteronome 34

¹Mosi a di khuga khu mapanini ga Mowabhi a gwela gigomoni ga Nebhu, tshokhatunu nya gigomo gya Pisiga, gi nga khedzanago ni Jeriko. PFHUMU Nungungulu a di mu yeyedza litigo latshavbo, gukhugela Gileyadhi kala Dhani,

²ni litigo latshavbo la na Nafitali, la na Efrayimi ni la na Manasi, ni la na Judha watshavbo kala phwani ga Pfoladambo,

³ni la Negebhi, lipani nya kova wa Jeriko, lidhoropa nya migindru, kala Zowari.

⁴ PFHUMU Nungungulu a di mu embela, khuye: “Eli khilo litigo nyi sambanyidego gu ninga Abrahama, ni Jakobe. Nyi na li ningela ga livelego laye. Uwe u li wone khu maho yago, aholu khu na nga ya bela umo.”

⁵Mosi, githumi gya Nungungulu, a difa avbo vbale, tigoni gwa Mowabhi kha nga idzo a ganedego khidzo PFHUMU Nungungulu.

⁶A mu dzingide tigoni ga Mowabhi, kovani, wu khedzanago ni Bheti-Peyori, aholu kala na muhuno mwalo a litigo lithowo laye.

⁷Mosi fude nari lizana ni magumavili (120) myaga; aholu maho yaye gima kha ma nga vbela tshivba ni tshivba yaye kha ya nga vbunguga gilo.

⁸Va na Israyeli va di lila Mosi, mapanini gwa Mowabhi magumararu matshigu kala va enedza matshigu nya gililo gyaye.

⁹Josuwa, mwamana wa Nuni, a di tala khu liphuvbo nya guti, kholu Mosi a di mu handzegide mandza; va na Israyeli va di mu yingela va landrisa kha nga idzo PFHUMU Nungungulu a nga bani a leletede khidzo Mosi.

¹⁰ Tigoni gwa Israyeli gima kha ga nga dugelela gambe mumbe muprofeti nya gufanane ni Mosi oyu a nga wonanago ni Nungungulu khovbe ni khovbe,

¹¹ambari khu satshavbo siwoniso ni sisamadziso ni siliwugiso esi PFHUMU Nungungulu a nga mu rumago guya gira mbeli ga Faro, tigoni ga Egipito ni mbeli ga vathu vaye vatshavbo ni tigoni gwaye gwatshavbo;

¹²ni tshivba yaye nya yikhongolo, ni mithumo yaye yatshavbo nya gusamadzise, eyi Mosi a yi giridego mahoni ga vatshavbo va na Israyeli.