Read gitonga Dhewuteronome 6 Bible Online

Dhewuteronome 6 - gitonga bible

Dhewuteronome 6

¹Esi khu sirumo ni milayo ni sileletelo esi PFHUMU Nungungulu wago, a nyi rumidego gu mi hevbudza, gasi muya si landrisa ga litigo mu na li dzegago gasi li khala thomba yanu.

²Khu guralo, u fanede gu thava PFHUMU Nungungulu wago, u vegedza milayo yaye yatshavbo ni sirumo nyi gu leletelago, uwe gumogo ni sanana sago ni situgulwana sago, matshigu yatshavbo nya guvbanye gwago; gasi matshigu yago ma engedzedwa.

³Yingisa, olu, uwe Israyeli, dzi vegisele gu si landrisa, gasi sigiro sago si gu dugele gwadi, u velegelana ngudzu tigoni gu gogago mahwe ni wulombe, kha nga a gu embedego PFHUMU Nungungulu wa vababe vago.

⁴ Upwa, Israyeli! PFHUMU Nungungulu wathu, khuye basi a gu Pfhumu.

⁵ U na haladza PFHUMU Nungungulu wago, khu monyo wago watshavbo, ni hefemulo wago watshavbo, ni tshivba yago yatshavbo.

⁶Milayo yeyi nyi gu ningago muhuno, u na yi vegisa monyoni gwago;

⁷u na yi hevbudza ga sanana sago, u na ganela khiyo nu khade ndrangani gwago, na wu gu gimbila ndzilani, gikhati u lalago, ni gikhati u wugago.

⁸Gambe u na yi hunga bogoni gwago gasi gu khala gialakanyiso vbakari nya maho yago.

⁹ U na yi lova mihasimotunu nya nyumba yago ni vbamalimbatunu gwago.

¹⁰ Avbo PFHUMU Nungungulu wago, a na gu vbohisago ga litigo a tumbisidego khu gusambanya ga vababe vago, Abrahama, Isaki ni Jakobe, gukhuye a na gu ninga madhoropa nya yadi nya makhongolo, ayo uwe u ngamba ma vbaha khu mandza yago;

¹¹ni dzinyumba dzi tadego khu satshavbo iso nya sadi, si ngamba hengeledzedwa khuwe, ni milambo nya mati yi ngamba podwa khuwe; ni marembwe nya miuvha ni miolivha ma ngamba yadwa khuwe; avbo u na gu hodzago u khura,

¹²dzi wonele gu tshukha u divala PFHUMU Nungungulu, a gu dusidego khu tigoni ga Egipito, nyumbani nya wugumbi.

¹³ U na ninga githawo PFHUMU Nungungulu wago, u mu thumela, u sambanya khu lina laye.

¹⁴U nga landreleli vambe vanungungulu avo va guromo vbakari nya mayigo ma gu randredego;

¹⁵kholu PFHUMU Nungungulu wago, a guromo vbakari gwanu, Nungungulu nya wufu, gasi likhulo laye li si khondri li gu fuvisa mafuni.

¹⁶U nga lingi PFHUMU Nungungulu wago, kha nga idzo u nga mu lingago khidzo Masaha.[3]

¹⁷Dzi garadze khu gu vegisa milayo ya PFHUMU Nungungulu wago, sihevbudzo saye ni sileletelo saye a gu rumidego.

¹⁸U na thuma ugo nya gwadi gu lulamidego mahoni ga PFHUMU Nungungulu, gasi si gu dugele gwadi, u bela u fumela litigo nya ladi eli PFHUMU Nungungulu, khu gusambanya a tumbisidego gu ninga ga vababe vago,

¹⁹khu gu tutumisa valala vago vatshavbo mbeli gwago, kha nga idzo PFHUMU Nungungulu a ganedego khidzo.

²⁰Khu matshigu ma nga gutago, gyanana gyago gya gu gu wudzisa, khigyo: Sa gu tshamusela ginani wufakazi, sileletelo ni milayo, esi PFHUMU Nungungulu wathu, a hi leletedego?

²¹Khavbo avbo, u na embela gyanana gyago, khuwe: Hi diri dzikhumbi dza Faro, tigoni ga Egipito; aholu PFHUMU Nungungulu, a di hi dusa khiyoyo khu libogo laye nya tshivba.

²²PFHUMU Nungungulu, giride mahoni gwathu sisamadziso ni siliwugiso nya sikhongolo, nya guthise ga vathu va Egipito, a gu wugela Faro ni ndranga yaye yatshavbo, na hi gu si wona khu maho yathu;

²³a hi dusa khiyoyo, gasi gu hi dzega aya hi ninga litigo a nga tumbisago vababe vathu khu gusambanya.

²⁴PFHUMU Nungungulu a hi rumide gukhuye hi landrisa sileletelo satshavbo sesi ni gu ninga githawo PFHUMU Nungungulu wathu, gasi hi mana gukhadzisega gikhati gyatshavbo, ni gu Uye Nungungulu a hi ninga womi, kha nga a girago kala na muhuno.

²⁵Hi na bani na hi lulamide ha gu thela kota khu gu landrisa milayo yatshavbo yeyi mbeli ga PFHUMU Nungungulu wathu, kha nga idzo a hi rumidego khidzo.