Read gitonga Johane 10 Bible Online

Johane 10 - gitonga bible

Johane 10

¹Jesu a di engedza gambe, khuye: “Khu lisine, nyi ngu mi embelani kheni, wule a si beligo khu mwanya, aholu a gu bela khu gihogo phandroni nya dzinvuta, mbafa, gighevenga.

²Wule a belago khu mwanya khuye a gu muhavisi nya dzinvuta,

³khuye a tuledwago lidimba khu ghadhi gasi a bele. Dzinvuta dzi nguti lito laye. Uye a gu dzi rana khu malina yawe gikhati a dzi dusago khu phandroni, gasi guya dzi havisa.

⁴Na dzi duside dzatshavbo, a gu thanga mbeli, gasi idzo dzi landra khu hwane, kholu dzi nguti lito laye.

⁵Aholu kha dzi kodzi gulandra mumbe muthu, gambe dzi na mu thava, kholu kha dzi liti lito laye.”

⁶Jesu a di va embela mufananiso yoyu, aholu avo kha va nga wuti tshamuselo wakone.

⁷Jesu a di engedza gambe, khuye: “Khu lisine, nyi ngu mi embelani, kheni: Eni nyi mwanya dzi belago khavbo dzinvuta.

⁸Vatshavbo va nyi thangedego guta, dzimbafa gambe sighevenga; khu kharato, dzinvuta kha dza va yingisa.

⁹Eni nyi mwanya; uye a belago khavbo gwangu a na vbanyiswa a na bela ni guduga; gambe a na mana mahawo.

¹⁰Mbafa kha yi teli gimbe gilo, ya gu tela gu taba, guta songa ni guta phanga. Eni nyi dzude, gasi dzinvuta dzangu dzi mane guvbanya; dzi gu mane khu gutala.

¹¹“Eni nyi muhavisi nya wadi. Muhavisi nya wadi a ngu ningela womi khu gufela dzinvuta dzaye.

¹²Gasi wule a thumelago gu hakha, a si gu muhavisi, a si gu mune dzinvuta, a gu wona lisolwa na li guta, a gu diga dzinvuta a thava; lisolwa li tutumisa dzinvuta, li dzi phalalegisa,

¹³kholu a gu thumela gu hakha; kha khathali khu dzinvuta.

¹⁴Eni nyi muhavisi nya wadi. Nyi ngu dziti dzinvuta dzangu; ni idzo dzi ngu nyiti.

¹⁵ Kha nga olu Babe a nyitigo, eni neni nyi ngu muti Babe wangu; gambe nyi ngu ningela womi khu gufela dzinvuta dzangu.

¹⁶Nyi ngari ni dzimbe dzinvuta dzi si lumbigo liphandro leli; idzo nidzo nyi ngu fanela gu dzi havisa; dzi napwa lito langu. Khu kharato li na manega liphandro limwedo ni muhavisi moyo basi.

¹⁷“Kota nya kharato Babe a nyi golago, kholu nya gu ningela womi wangu, gasi nyi wu mana nyaluphye.

¹⁸Kha nyi dzegedwi khu muthu; kheni mune nyi wu ningelago. Nyi ngu dzi kodza gu wu ningela ni gu wu dzega nyaluphye. Khiso esi sileletelo nyi nga ningwa khu Babe.”

¹⁹Gu di manega gambe guhambana vbakari nya Vajudha khu kotani nya magana yaya.

²⁰Nya vangi, va di khavo: “Handrugide; kha giti igyo a ganelago. Khu ginani mu mu yingisago?”

²¹Vambe va di khavo: “Magana yaya khandri ya muthu nya guhandruge. Ina muthu nya liphuvbo nya guvivbe a ngu dzi kodza gutula maho gikhumu, gani?”

²²A diri vbagirametunu; Jerusalema wu di gu girwa buzo nya gualakanye guagiswa nya Nyumba ya Nungungulu;

²³Jesu a di gu gimbilagimbila Nyumbani ya Nungungulu, wulangani wu ranwago pwani Nyangwa ya Solomoni.

²⁴Vajudha va di mu randrela, va mu wudzisa, khavo: “U na hi tshula lini? Wa gu bani uri uwe Kristo, ganela lisine.”

²⁵Jesu a di khuye: “Nyi mi embedeni, aholu kha mu khodwi. Mithumo nyi girago khu lina la Babe wangu khiyo yi nyi fakazelago.

²⁶Aholu enu kha mu khodwi, kholu kha muri dzinvuta dzangu.

²⁷Dzinvuta dzangu dzi ngu yingisa lito langu; eni nyi ngu dziti; a nidzo dzi ngu nyi landra.

²⁸Nyi ngu dzi ninga guvbanya nya gupindruge, gima kha dzi na mbemba; mwalo a na gu nyi wandrelago.

²⁹Babe wangu, a gu uye a nga nyi ningago dzinvuta dzedzi, khongolo guvbindra vatshavbo; mwalo a dzi kodzago gu mu wandrela.

³⁰Eni ni Babe hi moyo basi.”

³¹Khavbo avbo, Vajudha va di rola gambe siwindri, gasi gu mu pfara khiso.

³²Jesu a di khuye: “Nyi mi yeyedzideni mithumo ya yadi yitago khu ga Babe wangu; khu wevbini wakone nya gughoheke mu vbwetago gu nyi pfara khuwo?”

³³ Vajudha va di hakha, khavo: “Kha hi vbweti gu gu pfara khu mithumo yago nya yadi; aholu khu mapepetela nya guvbwete gu dzi gira Nungungulu nuri muthu.”

³⁴ Jesu a di va hakha, khuye: “Ina kha ga lowa Nayo wanu nya gupwani: Eni nyi ganede gukheni enu mu vanungungulu, gani?”

³⁵Milowo nya Guage kha yi fuvi. Nungungulu a gu rana khuye vanungungulu vathu vale va hakhago mahungu yaye.

³⁶Eni, Nungungulu a nyi hathide a nyi rumela mafuni. Khu ginani mu nyi wugelago khenu nyi na ni mapepetela kholu nyi nga ganela kheni nyi Mwamana wa Nungungulu?

³⁷Nyamba gira mithumo ya Babe wangu mu nga khodwi gwangu.

³⁸“Aholu, nya gu yi gira, ambari mu si khodwi gwangu, khodwani khu mithumo yangu, gasi mu dzitini ni gukhodwa gukhenu Babe a na ni eni, eni neni nyi na ni Babe.”

³⁹Khavbo avbo, va di vbweta gu mu mola, gasi uye a di vbuluga mandzani gwawe.

⁴⁰ A di tshatuga nyaluphye aya khisikheyi nya tsongo wa Joridhani, aya khala iyo a nga phela iyo gu bhapatisa Johane.

⁴¹Nya vangi va di hongola gwaye vaya, khavo: “Khu lisine, ambari ulo Johane a ngamba gira siliwugiso, satshavbo a nga ganelago khu muthu yoyu khya lisine.”

⁴²Nya vangi avbovbo va di khodwa gwaye.