Read gitonga Johane 11 Bible Online

Johane 11 - gitonga bible

Johane 11

¹ A di gu dwala mwama moyo nya gupwani khu Lazaro, givelegwa gya Bhetaniya, litigo la Mariya ni ndriyaye Marta.

² Khuye Mariya yoyu, a nga todza mafura Pfhumu ni gu mu bavbula migondro khu ndzudzu waye; ndriyaye Lazaro a di gu dwala.

³Vandriyaye va di rumela mwango ga Jesu, khavo: “Pfhumu, wule u mu golago, a ngu dwala.”

⁴Jesu na pwide, mahungu yaya, a di khuye: “Wudwali wowo khandri wa gu songa, khwa gu dhumisa Nungungulu, gasi Mwamana wa Nungungulu afela gu dhumiswa khuwo.”

⁵Jesu a di gu gola Marta, ni ndriyaye Mariya, ni Lazaro.

⁶Na hakhide mwango yoyo, a di khala gambe matshigu mavili avbo a nga bani a romo.

⁷Khavbo avbo, a di embela vapizane vaye, khuye: “Hongoleni hi bwelele gambe Judheya.”

⁸Vapizane va di khavo: “Muhevbudzi, nugunugu Vajudha va nga vbweta gu gu pfara khu siwindri, u nga gu vbweta gu bwelela gambe iyo, gani?”

⁹Jesu a di va hakha, khuye: “Gasi litshigu li mwalo likhumi na dzimbili dziora, gani? Uye a gimbilago mihani kha tshunganeli, kholu a ngu wona safa nya litigo.

¹⁰Aholu, uye a gimbilago wutshigu, a na tshunganela, kholu mwalo wenengedzo.”

¹¹Khavbo avbo, a di khuye: “Pari yathu Lazaro a ngu lala; aholu nyi naya mu wusa.”

¹²Vapizane va di khavo: “Pfhumu, a gu bani na lade gu yeyedza gupwani a na hawuluga.”

¹³Jesu a di ganela esi na gu thula gufa ga Lazaro, gasi avo va di khavo mwendro a gu thula gulala ligovbe.

¹⁴Jesu a di va pwadzela gwadi khuye: “Lazaro fude.

¹⁵Nyi ngu tsaka kholu nyi nga bani nyiri mwalo iyoyo, kholu kharati khavbo gu gu gwadi ga enu, gasi mu khodwe; ambari ulo hongoleni hiya mu wona.”

¹⁶Tomasi, a ranwago pwani Mavbaha, a di embela vangana vaye, khuye: “Hongoleni nethu, gasi hi na yafa ni muhevbudzi.”

¹⁷Jesu na vbohide, a di embedwa gupwani ma vbindride matshigu mana na dzingidwe.

¹⁸Bhetaniya gu diri vbafuvbi ni Jerusalema, pfhuka nya kilometro mbili ni gipandre.

¹⁹Vajudha nya vangi va di hongode ga Marta ni Mariya, gasi guya va bangaladza khu gufa ga ndriyawe.

²⁰Marta, na pwide nya gupwani a ngu vboha Jesu, a di mu khinga; gasi Mariya a di tshala nyumbani.

²¹Marta a di embela Jesu, khuye: “Pfhumu, nari pwani u diromo avba, ndriyangu gima na safa!

²²Aholu, nyi ngu dziti gambe nya gukheni satshavbo esi u si lombago ga Nungungulu, uye, ngu gu ninga.”

²³Jesu a di khuye: “Ndriyago a na wuga.”

²⁴Marta a di mu hakha, khuye: “Nyi ngu dziti nya gukheni a na wuga khu litshigu nya guhegise, litshigu va na wugago va nya gufa.”

²⁵Jesu a di engedza gambe, khuye: “Eni kheni guwuga, kheni guvbanya. Uye a khodwago gwangu, ambari na fude, a na vbanya

²⁶ni wevbi a vbanyago na gu khodwa gwangu gima kha nafa. U ngu khodwa khesi, gani?”

²⁷Marta a di hakha, khuye: “Ina, Pfhumu! Nyi ngu khodwa gukheni uwe khuwe Kristo, Mwamana wa Nungungulu, wule a nga pwani a nata mafuni.”

²⁸Na ganede esi, a diya rana ndriyaye Mariya khu phuvbo, a mu embela, khuye: “Vbohide, Muhevbudzi, a ngu gu rana.”

²⁹Na pwide esi, a di dzegela gu khuga a mu yela.

³⁰Jesu a di si gu beli ndrangani, a di nga emide avbo a nga khingedwa avbo khu Marta.

³¹Vajudha va nga bani vari naye nyumbani va mu bangaladza, na va wonide Mariya na gu khuga khu guvbiredza, va di mu landra na va gu pimisa gukhavo a gu hongola thowotunu aya lila iyo.

³²Na vbohide avbo a nga bani a romo Jesu, Mariya a di thega migondroni gwaye, khuye: “Pfhumu, nari pwani u diromo avba, ndriyangu gima na safa!”

³³Na gu wona Mariya na gulila, gumogo ni Vajudha a nga bani a guta navo, Jesu a dipwa gisiro nya gikhongolo ni gugaradzega monyoni,

³⁴a gu va wudzisa, khuye: “Mu mu dzingide hayi?” Va di hakha, khavo: “Pfhumu, delu uta gu wona.”

³⁵Khavbo avbo, Jesu a di lila.

³⁶Vajudha va di khayo: “Nga wonani idzo a nga bani a gu gola khidzo Lazaro!”

³⁷Gasi vambe va di khavo: “Uye a nga tula maho gikhumu, ina kha dzi kodza gukhuye Lazaro a sifi, gani?”

³⁸Jesu na hidzimede vbathowotunu, a nga bani ari phago na yi segidwe khu giwindri, a dipwa gambe gisiro.

³⁹Jesu a di khuye: “Dusani giwindri.” Aholu, Marta, ndruye wa mufi, a di hakha, khuye: “Ahihi, Pfhumu; gu ngu nunga, kholu matshigu mana na fude.”

⁴⁰Jesu a di khuye: “Kha nya gu embela nya gukheni wa gu khodwa u na wona gidhumo gya Nungungulu, gani?”

⁴¹Khavbo avbo, va di dusa giwindri. Jesu, na khuside maho a khedza Ndzadzini, a di khuye: “Baba, nyi ngu gu bonga kholu u nga nyi yingisago.

⁴²Nyi ngu dziti gukheni u ngu nyi yingisa gikhati gyatshavbo, aholu nyi di ganela esi khu kotani nya vathu va nyi randredego, gasi vatshavbo vakhodwe gukhavo khuwe u nyi rumedego.”

⁴³Na ganede esi, a di khusedza lito, a gu rana, khuye: “Lazaro, duga vbavbandze.”

⁴⁴Mufi a di duga na hungidwe mawogo ni mawundru khu mikeka nya sidzingelo; khovbe yi na fenengedzidwe khu lesu. Jesu a di va embela, khuye: “Mu tshuleni, mu mu diga a hongola.”

⁴⁵Khavbo avbo, Vajudha nya vangi va nga bani va dzude ga Mariya, na va wonide iso a nga girago Jesu, va di khodwa gwaye.

⁴⁶Aholu, vambe va diya ga Vafarisi, gasi guya va embeledzela iso a nga gira Jesu.

⁴⁷Vakhongolo nya Vaphasi nya mhamba ni Vafarisi va di tshangana va gu hunga gikungo, khavo: “Hi na gira ginani? Muthu yoyu a ngu gira siliwugiso nya singi.

⁴⁸Ha gu mu diga kharati, vatshavbo va na khodwa gwaye. Khavbo avbo, Varoma va nata khungumula Nyumba ya Nungungulu, ni litigo lathu.”

⁴⁹Khayifasi, a nga bani ari muthangeli nya vaphasi nya mhamba mwaga yoyo, a di va embela, khuye: “Enu kamwe kha muti gilo.

⁵⁰Dzitini nya gukhenu i tshukwana gufa muthu moyo, afela vathu vatshavbo, guvbindra gumbemba litigo rumba!”

⁵¹Uye kha ganela esi khu gu si khugela, aholu, kha nga a nga bani ari muthangeli nya vaphasi nya mhamba mwaga wule, a di profeta khuye Jesu a di gu yela gufa, afela litigo.

⁵²Nasiri gufela litigo nya Vajudha basi, aholu gufela gambe gutshanganisa sanana sa Nungungulu si phalalegidego.

⁵³Gukhugela litshigu lolo, va di hunga gikungo nya gusonge Jesu.

⁵⁴Khu kharato, Jesu a di si gimbili gambe vbakari nya Vajudha, aholu a di khuga a gu hongola Efrayimi, litigo li nga bani li romo vbafuvbi ni giwula, aya khala iyo gumogo ni vapizane vaye.

⁵⁵Yi diri vbafuvbi Phasika nya Vajudha. Nya vangi va di gwela Jerusalema, gasi guya dzi agisa na yi si gu vbohi Phasika.

⁵⁶Na varomo Nyumbani ya Nungungulu va di vbweta Jesu, na va wudzisana, khavo: “Nga yi balani, ina kamwe kha nata nuye vbabuzotunu, gani?”

⁵⁷Vakhongolo nya vaphasi nya mhamba ni Vafarisi va di vegide nayo nya gukhavo uye a gutigo avbo a guromo a na tivise, gasi aya modwa.