Read gitonga Johane 14 Bible Online

Johane 14 - gitonga bible

Johane 14

¹“Mu nga garadzegi myonyo yanu. Khodwani ga Nungungulu, mu khodwa gambe gwangu.

²Ndrangani ga Babe momo malanga nya mangi. Nari pwani khandri kharato, na nyi mi embedeni gale. Nyi ngu mi thangela nyiya dongisela wulanga.

³Nyi na wuya gambe nyita mi dzegani, gasi avbo nyi na bani nyi romo, mu manege nenu.

⁴Enu mu ngu gutini iyo nyi yago, ni ndzila yakone mu ngu yitini.”

⁵Tomasi a di khuye: “Pfhumu, ethu kha hi guti iyo u hongolago, hi na yiti kharini ndzila yakone?”

⁶Jesu a di khuye: “Eni kheni ndzila, ni lisine, ni guvbanya. Mwalo a vbohago ga Babe nyamba yiswa kheni.

⁷Nari pwani mu di nyitide na mu mu tide Babe wangu: Gukhugela olu mu ngu muti, gambe mu mu wone.”

⁸Filipi a di khuye: “Pfhumu, hi yeyedze Babe, iso basi si na hi enelela.”

⁹Jesu a di khuye: “Gale na nyiri nanu, gasi ni olu u si gu nyiti, Filipi? Uye a nyi wonago, a ngu wona Babe. Khu ginani u gukhuwe: ‘Hi yeyedze Babe?’

¹⁰Ina khu khodwi nya gukhuwe eni nyi womo ga Babe, ni gukhuwe Babe womo gwangu, gani? Magana nyi mi embelago khandri yangu, aholu, Babe a guromo gumogo ni eni, khuye a girago mithumo yeyi.

¹¹Khodwani gwangu; khodwani nya gukhenu nyi womo ga Babe, ni gukhenu Babe womo gwangu. Mwa gumba khodwa gwangu, khodwani khu mithumo yangu.

¹²Khu lisine, nyi ngu mi embelani, kheni: Uye a khodwago gwangu, a na gira nuye mithumo nyi yi girago; a na gira mithumo ya yikhongolo guvbindra eyi, kholu eni nyi ngu hongola ga Babe wangu.

¹³Ni gevbini mu na lombago khu lina langu, nyi na mi girelani, gasi Babe afela gu dhumiswa khu Mwanaye.

¹⁴Igyo mu na gu lombago khu lina langu, eni nyi na mi girelani.

¹⁵“Mwa gu nyi gola, mu na vegedza milayo yangu.

¹⁶Eni nyi na lomba ga Babe, a mi rumela mumbe Muphasedzeli a gu Liphuvbo nya lisine a nata khalago nanu gikhati gyatshavbo.

¹⁷Va nya litigo kha va dzi kodzi gu li hakha, kholu kha va li woni gambe kha va liti. Gasi enu mu ngu liti kholu ilo la gu vbanya vbakari gwanu ni ndrani gwanu.

¹⁸“Kha nyi na mi tshiya nga sigulungu; nyi na wuya gambe.

¹⁹Nugunugu, vathu va mafuni kha va na nyi wona gambe, gasi enu mu na nyi wonani; kholu enu mu na vbanya khu kotani nyi vbanyago.

²⁰Litshigu lolo mu na dzitini nya gukhenu eni nyi womo ga Babe wangu, enu mu womo gwangu, gasi eni nyi womo gwanu.

²¹“Oyu atigo milayo yangu, a gu yi vegedza, khuye a nyi golago. Gasi oyu a nyi golago, a ngu godwa khu Babe wangu, eni nyi na mu gola nyi dzi yeyedza gwaye.”

²²Judha, nasiri Sikariyoti, a di khuye: “Pfhumu, u na dzi yeyedza kharini gwathu, nyamba dzi yeyedza tigoni?”

²³Jesu a di hakha, khuye: “Uye a nyi golago, a na vegedza milayo yangu; Babe wangu a na mu gola; gasi eni ni Babe hi nata avbo gwaye hita khala naye.

²⁴Uye a si nyi goligo, kha vegedzi milayo yangu; gasi mahungu nyi hevbudzago khandri yangu, aholu khya Babe a nyi rumedego.

²⁵Nyi mi embedeni mahungu yaya na nyi ngari nanu.

²⁶Aholu, Muphasedzeli, a gu Liphuvbo nya Guage, lile Babe a na mi rumelago khu lina langu, li nata mi hevbudza silo satshavbo, ni guta mi dundrugisa satshavbo iso nyi nga mi hevbudzani.

²⁷“Nyi ngu mi tshiyelani gurula, nyi ngu mi ningani gurula gwangu. Kha nyi ningi gurula kha nga idzo li ningago khidzo litigo. Mu nga garadzegini myonyo yanu, gambe mu nga thavi gilo.

²⁸Mu nyi pwide na nyi gu ganela, kheni: Nyi ngu hongola, aholu nyi na wuya gambe gwanu. Nari pwani mu ngu nyi gola, khu lisine na mu gu nengela kholu nyi hongolago ga Babe, kholu Babe khongolo gu nyi vbindra.

²⁹Nyi mi embedeni olu, na si si gu giregi, gasi sa gu girega mu khodwa gwangu.

³⁰Kha nyi na ganela ngudzu nanu, kholu a ngu vboha mufumeli nya litigo leli. Uye gimwalo gilo a na girago avba gwangu,

³¹aholu, satshavbo sesi nya gufela gukheni litigo li dziti nya gukhilo nyi ngu gola Babe, ni gukhilo nyi ngu gira kha nga idzo Babe a nga nyi rumago khidzo. Khugani, hongoleni.”