Read gitonga Johane 17 Bible Online

Johane 17 - gitonga bible

Johane 17

¹Jesu, na ganede magana yaya, a di khusedza maho a khedza Ndzadzini, khuye: “Baba, khigyo egi gikhati, dhumisa Mwanago, gasi a nuye a gu dhumisa,

²kholu u mu ningide tshivba nya gufumele sivangwa satshavbo, gasi a ninge guvbanya nya gupindruge vatshavbo vale u nga mu ningago.

³Guvbanya nya gupindruge khogu: Vati uwe basi kha nga Nungungulu nya lisine, ni guti Jesu Kristo, a gu uye u nga mu rumelago.

⁴Nyi gu dhumiside mafuni, kholu nyi vbedzidego thumo u nga nyi rumelago.

⁵Olu, Baba, nyi ninge gambe gidhumo gile nyi nga bani nyiri nagyo khu gale mahoni gwago, na li si gu vangwi litigo.

⁶“Nyi tiviside lina lago ga vathu nya litigo u nyi ningidego. Va diri vago, aholu u nyi ningide. Avo va vegedzide milayo yago.

⁷Olu va ngu dziti gukhavo satshavbo u nyi ningidego sa guta khiyo gwago,

⁸kholu, na nyi va embede mahungu u nyi ningidego, va di ma hakha, va gu khodwa nya gukhavo khu lisine nyi dzude khiyo gwago, ni gukhavo khuwe u nyi rumedego.

⁹“Nyi ngu va lombelela, kha nyi lombeleli litigo, aholu ava u nyi ningidego, kholu va gu limba uwe.

¹⁰Satshavbo si gu sangu, khyago. Niso si gu sago, tshangu; satshavbo si ngu nyi dhumisa.

¹¹Nyi mwalo gambe tigoni, aholu avo vomo tigoni, gasi eni nyi nguta vbafuvbi gwago. Baba nya Guage, va vegedze linani gwago, lina u nyi ningidego, gasi va khale moyo, kha nga ethu.

¹² Na nyi ngari navo mafuni nyi di gu va sayisa khu lina lago. Nyi sayiside vatshavbo u nga nyi ningago, mwalo ni moyo a nga dzimelago, vbavbandze ga wule gu nga vbwetega a dzimele, gasi gu tadzisega Milowo.

¹³Olu nyi nguta iyo gwago; aholu nyi ngu ganela esi na nyi nga romo mafuni, gasi avo va mane navo gutsaka nya guvbelele nyi gu nago.

¹⁴Nyi va hevbudzide mahungu yago, aholu va nya litigo va ngu va zondra kholu avo kha va lumbi litigo, kha nga eni neni nyi si lumbigo litigo.

¹⁵Kha nyi lombi gukheni u va dusa tigoni, aholu kheni va vbulugise guvivbani.

¹⁶Avo kha va lumbi litigo, kha nga eni neni nyi si lumbigo litigo.

¹⁷Va agise va khale vathu va lumbago uwe basi khu ndzila nya lisine. Magana yago khayo ma gu lisine.

¹⁸Kha nga uwe u nga nyi rumelago tigoni, eni neni nyi va rumede tigoni.

¹⁹Eni nyi ngu dzi ningela iyo gwago khu kotani yawe, gasi avo navo va girwe vathu va agisidwego lisineni.

²⁰“Kha nyi lombeleli basi ava, aholu vale navo va na khodwago gwangu khu kota nya magana yawe,

²¹gasi vatshavbo va khale moyo basi; kha nga uwe, Baba u gomo gwangu, eni gwago, avo navo va na khale gwathu, gasi litigo li khodwe gukhilo khuwe u nyi rumedego.

²²Nyi va ningide gidhumo gile u nga nyi ningago, gasi va khale moyo kha nga ethu hi gu moyo.

²³Eni gwawe, uwe gwangu, gasi avo va pwanane nya guvbelele, gasi litigo li dziti gwadi gukhilo khuwe u nyi rumedego, ni gukhilo u va gode kha nga idzo u nyi godego khidzo.

²⁴“Baba, nya guvbweta gukheni vale u nyi ningidego va manege navo avbo nyi na gu manegago eni, gasi vafela gu wona gidhumo gyangu, gidhumo gile u nyi ningidego, kholu uwe u nyi gode na li si gu vangwi litigo.

²⁵Baba nya gululame, litigo kha la guti, aholu eni nyi gu tide, ava navo va dzitide nya gukhavo khuwe u nyi rumedego.

²⁶Nyi va tiviside lina lago; nyi ngu nga gu va tivisa gambe, gasi lihaladzo u nyi golago khilo li khale gwawe, eni neni nyi khale gwawe.”