Read gitonga Johane 19 Bible Online

Johane 19 - gitonga bible

Johane 19

¹Khu vbale, Pilato a di ningedza Jesu gasi vaya mu kwamula.

²Masotshwa ma di luga gihugu nya miba ma mu ambagisa hungoni, ma mu fenengedza giwunguwungu.

³Va di hidzimela vbafuvbi gwaye, khavo: “Sewe, Pfhumu ya Vajudha!” Va gu mu veta khu dzipama.

⁴Pilato a di duga gambe vbavbandze, ata, khuye: “Nyi ngu mi reselani avba, gasi mu fela gu dziti gukhenu gimwalo gihoso nyi gi manago gwaye.”

⁵Khu kharato, Jesu a di duga vbavbandze, na ambagisidwe gihugu nya miba ni giwunguwungu. Pilato a di khuye: “Kha mu mu woni muthu wanu yoyo!”

⁶Me ni gu mu wona, vathangeli nya vaphasi nya mhamba ni dzindruna va di gulumela, khavo: “A na khokhothedwe! A na khokhothedwe!” Pilato a di engedza gambe, khuye: “Mu dzegeni muya mu khokhothela enu vamune, kholu eni kha nyi mani gihoso gwaye.”

⁷Vajudha va di mu hakha, khavo: “Ethu hi na ni nayo. Khu guruma nya nayo yoyu, a ngu yela gufa, kholu a dzi giride Mwamana wa Nungungulu!”

⁸Pilato, na pwide magana yaya, a di khala hwanga.

⁹A di bela gambe nyumbani nya gulamulele umo mahungu, a wudzisa Jesu, khuye: “Gasi wa guta khu hayi?” Aholu Jesu kha nga mu hakha.

¹⁰Khu vbale Pilato a di khuye: “Khu nyi hakhi? Khu dziti gukhuwe nyi ngu dzi kodza gu gu tshula ni gu gu khokhothela, gani?”

¹¹Jesu a di khuye: “U diri mwalo tshivba yoyo nari pwani khwa ningwa khu Babe wangu. Khu kharato, uye a nga nyi ningela mandzani gwago khuye a gu ni nandru nya wukhongolo.”

¹²Gukhugela avbovbo, Pilato a di vbweta gu mu tshula; aholu, Vajudha va di gulumela, khavo: “Wa gu mu tshula, khuri pari ya Sezari; kholu muthu watshavbo a dzi girago pfhumu a gu yeyisa Sezari.”

¹³Na pwide magana yaya, Pilato a di dusa Jesu vbavbandze; gasi uye a di tshala nyumbani, a gu khala vbawulangatunu wu ranwago khu Gihebheru pwani “Gabata,” gutshamusago pwani giwindri.

¹⁴Khu litshigu nya gupidwe Phasika, umo nya midiya, Pilato a di embela Vajudha, khuye: “Kha mu mu woni oyu Mufumeli wanu!”

¹⁵Aholu, avo va di gulumela, khavo: “A nafe, a nafe! Mu khokhothele!” Pilato a di khuye: “Nyi khokhothela Mufumeli wanu?” Vakhongolo nya vaphasi nya mhamba va di mu hakha, khavo: “Hi mwalo mumbe mufumeli vbavbandze ga Sezari!”

¹⁶Khu kharato, a di mu ningela gasi aya khokhothedwa. Khavbo avbo, va di dzega Jesu, va gu hongola naye.

¹⁷A di duga na va mu rwegide gihambano magatani, a hongola vbawulangatunu wu ranwago khu Gihebheru, pwani: “Goligota,” gutshamusago, pwani “Girwarwatunu.”

¹⁸Avbo va ngaya mu khokhothela vbakari nya vama vavili: Mumbe khu nyamudye, mumbe khu nyambade.

¹⁹Pilato a di lova gitiviso, a gi namega vbatshani nya gihambano. A di lovide, khuye: “JESU WA NAZARETA MUFUMELI WA VAJUDHA.”

²⁰Vajudha nya vangi va di hevbula milowo yile, kholu avbo a nga khokhothedwago avbo Jesu gu diri vbafuvbi ni dhoropani. Gitiviso gile gi di lovidwe khu Gihebheru, Gigereki ni Gilati.

²¹Khavbo avbo, vakhongolo nya vaphasi nya mhamba va diya ga Pilato, vaya, khavo: “U nga lovi, khuwe: ‘Mufumeli wa Vajudha’; aholu, lova, khuwe: A di khuye nyi Mufumeli wa Vajudha.”

²²Pilato a di va hakha, khuye: “Iso nyi lovidego si lovidwe.”

²³Masotshwa, na ma khokhothede Jesu, ma di dzega guambala gwaye, ma gu kabanisa khu sipandre sina, gasi gu kabana khu wu na wawe. Va di dzega gambe ngandzu yaye, nya gulugwe gukhugela vbatshani kala vbavbatshi.

²⁴ Va di pwanana khu gyawe, khavo: “Hi nga yi pferuli, aholu, hongoleni hi gire nyatumbatumbane, gasi gu wona yi na khala ya mani.” Yi tadzisega kharati Milowo, yi nga, khiyo: “Va kabanede guambala gwangu, va gira nyatumbatumbane khu ngandzu yangu.” Khidzo kharato ma nga gira masotshwa.

²⁵Vbafuvbi ni gihambano gya Jesu a di romo mayi waye ni ngadza Keleyofasi, Mariya, ndruye wa mayi waye, ni Mariya Madhalene.

²⁶Na wonide mayi waye a nga bani a ninganide ni mupizane wule a nga bani a mu gola, Jesu a di embela mayi waye, khuye: “Nyamayi, khu mu woni mwanago uyoyo.”

²⁷A di embela nuye mupizane, khuye: “Khu mu woni mayi wago uyoyo.” Gukhugela vbale mupizane a di mu hakha ndrangani gwaye.

²⁸Na wonide nya gukhuye satshavbo si vbede, ni guvbweta gukhuye yi tadzisege Milowo, Jesu a di khuye: “Nyi ngupwa lidora.”

²⁹ Gi diromo vbale gikanvwana nya gutale khu ginageri. Va di tshomega wuluva vbatshavatunu, va wu nega umo nya ginageri, va mu lisa.

³⁰Jesu, na munyide ginageri, a di khuye: “Satshavbo si tadzisegide.” Khavbo avbo, a di nogisa thamo, a gufa.

³¹Kha nga ulo a nga bani ari litshigu nya gudongisele Phasika, Vajudha va diya lomba ga Pilato guya va fanya mawundru, gasi gu va tshisa, gufela gu sirumbi si si khali vbagihambanotunu litshigu nya Sabhadho, kholu a diri litshigu likhongolo Sabhadho yile.

³²Masotshwa ma diya fanya mawundru ya vale va vavili va nga bani va khokhothedwe gumogo ni Jesu.

³³Na va vbohide ga Jesu, va mu wona khavo fude, kha va mu fanya mawundru, aholu,

³⁴moyo nya musotshwa a di mu paya limbambo khu litshari, gu duga novba ni mati.

³⁵Oyu a fakazago esi khuye a si wonidego; ni wufakazi waye khwa lisine; gambe a ngu dziti nya gukhuye iso a ganelago lisine, gasi gu enu nenu mu khodwe.

³⁶ Esi si giregide gasi gu tadzisega Milowo, yi gu, khiyo: “Ni gimwegyo girambo gyangu kha gi na fanywa.”

³⁷ Ni yimbe Milowo yi gu, khiyo: Va na mu khedzisa wule va nga mu payago.

³⁸Khavbo avbo, Josefe wa Arimateya, a nga bani ari mupizane wa Jesu, nya gisihaledza, khu guthava vakhongolo nya Vajudha, a di lomba ga Pilato guya dzega girumbi gya Jesu. Na dzumedwe khu Pilato, Josefe a diya dusa girumbi.

³⁹ A diya nuye Nikodhemo, wule a nga hongola aya bhula ni Jesu ni vbakari nya wutshigu, ni gipimo nya magumararu dzikilu nya mafura nya mira ni alowe.

⁴⁰Va di dzega girumbi gya Jesu va gi fumbela khu myendra nya guage ni gu gi thela mafura, kha nga madzingelo nya Vajudha.

⁴¹Vbafuvbi navbo a nga khokhothedwa avbo, li diromo lithembwe nya senge li nga bani liri ni lithowo nya liphya, umo gu nga bani gusi gu dzingwi muthu.

⁴²Kha nga lithowo lolo li nga bani li romo vbafuvbi, va di dzingela umo Jesu, khu kotani a nga bani ari litshigu nya gudongisele Phasika.