Read gitonga Johane 2 Bible Online

Johane 2 - gitonga bible

Johane 2

¹Hwane nya matshigu mararu, wu di manega dzegano tigoni ga Khanani ga Galileya. Mayi wa Jesu a di romo nuye avbo.

²Jesu a di ranidwe nuye ni vapizane vaye mutshadhotunu.

³Gu di kenelela wadwa. Mayi wa Jesu a di embela mwanaye, khuye: “Va mwalo wadwa.”

⁴Jesu a di hakha, khuye: “Nyamayi! Gasi ginani u gi vbwetago avbo gwangu? Gikhati Gyangu gi si gu vbohi.”

⁵ Mayi waye a di embela sithumi, khuye: “Girani satshavbo iso a na gu mi rumago.”

⁶Gu diromo avbo livbandre na moyo misungwa nya siwindri, va nga bani va gu hamba umo mandza Vajudha; moyo ni moyo a diri ni gipandre nya mipimo mivili mwendro miraru.

⁷Jesu a di va embela, khuye: “Tadzani misungwa yoyo khu mati.” Va di dzegela gu mi tadza khu lihofu.

⁸Khavbo avbo, a di khuye: “Regani muya ninga muthangeli nya buzo.” Va di gira kharato.

⁹Muthangeli nya buzo, na lingide mati ma nga vbindrugedzwa ma khala wadwa, kha nga olu a nga bani a si guti umo wu ngata khumo, vbavbandze nya sithumi si nga regago mati, a di rana mwane,

¹⁰khuye: “Vathu vatshavbo va gu phela khu gu dusa wadwa nya wadi, hwane nya gu vathu vatshavbo, na va sede gwadi, khavbo a va ningago wadwa nya huto. Gasi uwe u di vega wadwa nya wadi kala olu!”

¹¹Khigyo egi giliwugiso nya guphele gya Jesu a giredego tigoni ga Khanani ga Galileya a gu wonegisa kharati gidhumo gyaye; vapizane va di khodwa gwaye.

¹² Hwane nya esi, a di relela Kafarinawume ni mayi waye, ni vandriyaye, gumogo ni vapizane, iyo a ngaya khalago matshigwana.

¹³ Na yiri vbafuvbi Phasika nya Vajudha, Jesu a di gwela Jerusalema;

¹⁴Nyumbani ya Nungungulu a diya mana varengisi nya dzimombe, nya dzinvuta ni matuva, navo va nya gu turukari dzitsapawu.

¹⁵A di dzega dzingodzi a luga gisephu, a gu va tutumisa khigyo vatshavbo Nyumbani ya Nungungulu, ni dzinvuta dzawe ni dzimombe. A di vbaladza dzitsapawu dza va nya wugwewo wawe, a gu thesela dzimeza dzakone.

¹⁶A di embela varengisi nya matuva, khuye: “Dusani satshavbo sesi avba. Mu nga dzegini nyumba ya Babe wangu mu yi gira nyumba nya wugwewo wanu.”

¹⁷ Vapizane va di dundruga milowo yi gukhiyo: “Gukhathala nyi gu nago khu nyumba yago gu ngu nyi pwisa wuvi.”

¹⁸Khavbo avbo, Vajudha va di mu wudzisa, khavo: “Giyeyedzo muni u hi ningago gasi hi khodwe nya gukhethu u na ni fanelo nya gugire esi?”

¹⁹ Jesu a di khuye: “Pfhungumulani Nyumba yeyi, eni nyi na yi vbahedza khu matshigu mararu.”

²⁰Vajudha va di khavo: “Nyumba yeyi yi dzegide magumana na livbandre na moyo myaga na yi gu vbahwa uwe u na yi vbahedza khu matshigu mararu basi?”

²¹Aholu uye a di gu thula nyumba nya givili gyaye.

²²Khu kharato, gikhati a nga wugago khu ga vafudego, vapizane vaye va di dundruga iso a nga ganelago, va gu khodwa khu Milowo ni magana ya Jesu.

²³Gikhati gile nya Phasika a nga bani a romo Jerusalema, vathu nya vangi va di khodwa khu lina laye khu kotani nya siliwugiso a nga bani a gu gira.

²⁴Aholu, Jesu kha nga va tumba, kholu a di gu vati vatshavbo.

²⁵Kha nga vbweta gu embedzedwa mavbanyelo ya moyo ni moyo, kholu uye mune a di gu yiti myonyo yawe.