Read gitonga Johane 20 Bible Online

Johane 20 - gitonga bible

Johane 20

¹Litshigu nya guhegule nya semana, Mariya Madhalene a diya thowotunu na gu ngari dzimindru dzikhongolo; a diya mana giwindri gi nga bani gi fenengedzide lithowo na gi tudwe,

²a di tutuma aya ga Simoni Pedro ni mupizane wule a nga bani a godwa khu Jesu, aya va embela, khuye: “Va bide Pfhumu thowoni, kha hi guti umo va mu vegidego.”

³Pedro ni mupizane wule va di hongola vatshavbo thowotunu.

⁴Va di tutuma va vavili, aholu, mupizane wule a di tshiya Pedro hwane, a gu hegula khuye a vboha thowoni.

⁵Na nogide a holela, a di wona myendra na yi mbambamisedwe vbavbatshi, aholu kha nga bela phalani.

⁶A di vboha nuye Simoni Pedro khu hwane, a gu bela phalani, a wona basi myendra na yi mbambamisedwe vbavbatshi,

⁷ni lesu yi nga bani yi fenengedzide khovbe yaye; lesu yeyi yi diri mwalo gumogo ni myendra yile, aholu yi di petidwe yi gu vegwa khu phuvbo.

⁸A di bela nuye phalani mupizane wule a nga hegula khuye a vboha. Na wonide, a di khodwa.

⁹Va di si gu yi pimisi gwadi milowo yile, yi gu, khiyo: “Uye a na wuga khu ga vafudego.”

¹⁰Khavbo avbo, vapizane vale va vavili va di bwelela gaya.

¹¹Gasi Mariya a di tshala thowotunu. Na emide bambe nya liphala, a di holela phalani na gulila,

¹²a di wona dzingilozi dzimbili dza Nungungulu na dzi ambade myendra nya guage na dzi khade avbo gi nga bani giromo girumbi gya Jesu, yimbe khu mihungotunu, yimbe khu mawundrutunu.

¹³Dzingilozi dzi di mu wudzisa, khidzo: “Nyamayi, wa gu lilela ginani?” Mariya a di hakha, khuye: “Kholu va dzegidego Pfhumu yangu, kha nyi guti va yi vegide hayi.”

¹⁴Na ganede esi, a di thendregedza hwane a wona Jesu na emide, aholu kha nga muti khuye khu Jesu.

¹⁵A di mu wudzisa, khuye: “Nyamayi, wa gu lilela ginani? Wa guvbweta mani?” Na gu hingigedza khuye mwendro khu mulimi nya lithembwe lile, Mariya a di khuye: “Pfhumu, wa gu bani uri uwe u mu dzegidego, tshukwana u nyi embela avbo u nga mu vegago, gasi nyiya mu dzega.”

¹⁶Jesu a di mu rana, khuye: “Mariya!” Uye a di thendregedza a hakha khu Gihebheru, khuye: “Raboni!” Gutshamusago pwani: “Muhevbudzi.”

¹⁷Jesu a di mu embela, khuye: “U nga nyi hungateli, kholu nyi si gu liti ga Babe wangu. Aholu, uwe indra embela vandriyangu khuwe nyi ngu hadza gu lita ga Babe wangu, a gu Babe wanu nenu; ga Nungungulu wangu, a gu Nungungulu wanu nenu.”

¹⁸Mariya Madhalene a diya embela vapizane, khuye: “Nyi wonide Pfhumu!” A gu va tshamusela iso Jesu a nga mu embelago.

¹⁹Litshigu lolo, ni silambo, litshigu nya guhegule nya semana, na ma segidwe malimba nya nyumba, umo va nga bani varomo vapizane, khu gu thava vakhongolo nya Vajudha, Jesu a di dzi wonegisa vbakari gwawe, khuye: “Gurula gu na khale ni enu.”

²⁰Khavbo avbo, a di va yeyedza mandza ni limbambo laye. Na va wonide Pfhumu, vapizane va di tala khu gutsaka.

²¹A di va embela nyaluphye, khuye: “Gurula gu na khale ni enu. Kha nga idzo a nga nyi rumelago khidzo Babe, eni neni nyi ngu mi rumani.”

²²Na ganede esi, a di va furugedza, khuye: “Hakhani Liphuvbo nya Guage.

²³ Vale mu na gu va tsetselelago siwono, va na tsetseledwa. Gasi vale mu na gumba va tsetselela, kha va na tsetseledwa.”

²⁴Tomasi, a nga bani a gu ranwa pwani Mavbaha, a nga bani ari moyo nya vale nya likhumi na vavili, a diri mwalo gikhati Jesu a nga dzi wonegisa.

²⁵Na wide, vambe vapizane va dita mu embela, khavo: “Hi wonide Pfhumu!” Aholu, uye a di va hakha, khuye: “Nyamba wona sivanga nya mandza yaye, nya gumba vbedza nyala yangu sivangani gwaye ni mandza yangu limbamboni gwaye gima kha nyi na kodwa.”

²⁶Na ma vbindride livbandre na mararu matshigu, na varomo gambe nyumbani vapizane gumogo ni Tomasi, va di tedwa khu Jesu, na ma segidwe malimba, a gu dzi wonegisa vbakari gwawe, khuye: “Gurula gu na khale ni enu.”

²⁷Khavbo avbo, a di embela Tomasi, khuye: “Hidzimisa avba nyala yago, wona mandza yangu; hidzimisa mandza yago, u vbedza limbamboni gwangu. U nga dzi giri muthu nyamba khodwa, aholu khodwa.”

²⁸Tomasi a di khuye: “Pfhumu yangu, Nungungulu wangu!”

²⁹Jesu, khuye: “U khodwe kholu u nyi wonidego. Aholu, va kategide vale va khodwago nyamba nyi wona!”

³⁰Jesu a di gira simbe siliwugiso nya singi mahoni nya vapizane, aholu iso kha sa lowa avba.

³¹Esi si lovidwe gasi mu khodwe gukhenu Jesu khu Kristo, Mwamana wa Nungungulu; gasi khu gu khodwa, mu mane guvbanya linani gwaye.