Read gitonga Johane 21 Bible Online

Johane 21 - gitonga bible

Johane 21

¹Khavbo avbo, Jesu a di dzi wonegisa gambe ga vapizane siwoni ga Tibheriyade. A dzi wonegiside, kharati:

²Va diromo vatshavbo Simoni Pedro, Tomasi nya gupwani khu Mavbaha, ni Natanayeli, givelegwa gya Khanani gwa Galileya, gumogo ni sanana sa Zebhedhewu, ni vapizane vavili.

³Simoni a di va embela, khuye: “Nyi nga gu hongola nyi ya goga.” Va di mu hakha, khavo: “Ethu nethu hi na hongola nago.” Va di khuga, vaya bela ngalavani, aholu, kha va nga mana gilo wutshigu watshavbo.

⁴Na gugya, Jesu a di dzi wonegisa gwawe na emide funguni, aholu, vapizane kha va nga mu tugula khavo khuye.

⁵Khavbo avbo, Jesu a di khuye: “Vanavangu, mu na ni ndzandzi nya guhodze, gani?” Va di mu hakha, khavo: “Ahihi.”

⁶A di va embela, khuye: “Thesani dzikhoga kha guya phuvbo ga nyamudye nya ngalava, mu na mola.” Na va dzi theside, kha va nga dzi kodza ni gu dzi ndrindrela, kholu dzindzandzi dzi diri dzingi.

⁷Khu vbale, mupizane wule nya gigodwa gya Jesu a di embela Pedro, khuye: “Khu Pfhumu!” Pedro na pwide gupwani khu Pfhumu, a di ambala ngandzu a bvumula matini, kholu a diri wumbwiri.

⁸Gasi vambe vapizane va di wuya siwoni ni ngalava, na va gu ndrindrela dzikhoga, nya gutale khu dzindzandzi, kholu a diri vbafuvbi, pfhuka nya guningane mazana mavili mikono (100mt) khu ngalavani.

⁹Va di wona ndzandzi yi na gu vawudwa vbagikhotunu, gumogo ni gibaba.

¹⁰Jesu a di khuye: “Nga resani dzindzandzi mu nga molago.”

¹¹Khavbo avbo, Simoni Pedro a di bela ngalavani, a ndrindrela dzikhoga dzi nga bani dzi tade khu lizana ni livbandre magumi ni ndzandzi tharu (153) nya dzikhongolo; ambari dzi nga bani dzi tade, dzikhoga kha dza nga pferuga.

¹²Jesu a di va embela, khuye: “Deluni muta hodza.” Mwalo a nga tiyela gu mu wudzisa, khuye: “Khuwe mani?” Kholu va di gu muti khavo khu Jesu.

¹³Khavbo avbo, Jesu a di hidzimela, a gu dzega gibaba a va ninga, a gira kharato gambe ni ndzandzi.

¹⁴Khigyo egi gikhati nya wuraru Jesu a nga dzi wonegisa ga vapizane vaye, hwane nya gu bani a wugide khu ga vafudego.

¹⁵Na va hodzide, Jesu a di wudzisa Simoni Pedro, khuye: “Simoni, mwamana wa Jona, u ngu nyi gola guvbindra ava, gani?” Uye a di khuye: “Ina, Pfhumu, gale nu gu dziti nya gukhuwe nyi ngu gu gola.” Jesu, khuye: “Havisa dzinvuta dzangu.”

¹⁶Jesu a di engedza gambe, khuye: “Simoni, mwamana wa Jona, u ngu nyi gola kamwe, gani?” Uye a di khuye: “Ina, Pfhumu, uwe u ngu dziti khuwe nyi ngu gu gola.” Jesu, khuye: “Havisa dzinvuta dzangu.”

¹⁷A di mu wudzisa nya wuraru, khuye: “Simoni, mwamana wa Jona, ina kamwe u ngu nyi gola uwe?” Pedro a di garadzega, kholu a nga mu wudzisa nya wuraru, khuye: “U ngu nyi gola, gani?” A di mu hakha, khuye: “Pfhumu! U nguti satshavbo; u ngu dziti gwadi khuwe nyi ngu gu gola.” Jesu a di mu embela, khuye: “Havisa dzinvuta dzangu.

¹⁸Khu lisine, nyi ngu gu embela, kheni: Nu ngari gikhwathana u di dzi ambalela, u gu hongola umo u nga bani u guna. Gasi gikhati u na gumbago, u na thawuludza mawogo yago, va gu ambagisa, gasi va gu yisa umo u si gunigo.”

¹⁹A di ganela kharati na gu thula mafelo Pedro a nga hadza gu dhumisa khayo Nungungulu. Khavbo avbo, a di mu embela, khuye: “Nyi landre.”

²⁰Pedro, na thendregedzide, a di wona nya gukhuye va di gulandrwa khu mupizane wule a nga bani a godwa khu Jesu, wule, vbakari nya gilalelo a nga hidzimelago ga Jesu, a mu lembela, khuye: “Gasi khu mani a vbwetago gu gu ningela?”

²¹Na mu wone, Pedro a di wudzisa Jesu, khuye: “Oyu ke, ginani gi na gu mu dugelelago?”

²²Jesu a di hakha, khuye: “Nya gu dzina gukheni a vbanye kala nyi gu wuya, ginani gi gu garadzago? Uwe nyi landre basi.”

²³Khavbo avbo, ma di phalalega, vbakari ga vandriyaye, malipha nya gupwani mupizane wule kha na ngafa. Jesu khandri a di khuye: Kha nafa, aholu, “Nya gu dzina gukheni a vbanye kala nyi gu wuya, ginani gi gu garadzago?”

²⁴Mupizane yoyu khuye a fakazago silo sesi, khuye gambe a si lovidego. Hi ngu dziti gukhethu wufakazi waye khwa lisine.

²⁵Somo simbe silo nya singi Jesu a si giridego. Nari pwani si di lovidwe khu gimwegyo ni gimwegyo, nyi ngu tiyisa gukheni ambari litigo latshavbo li diri lidugwana gasi gu vegedzela umo mabhuku yakone.