Read gitonga Johane 3 Bible Online

Johane 3 - gitonga bible

Johane 3

¹A diromo mwama moyo nya Mufarisi, nya gupwani khu Nikodhemo, a nga bani ari linganagana nya Vajudha.

²A di hongola ga Jesu ni vbakari nya wutshigu, aya, khuye: “Rabi, hi ngu dziti nya gukhethu u dzude khu ga Nungungulu kha nga Muhevbudzi, kholu mwalo a kodzago gu gira siliwugiso nya nga iso u girago, a gu bani ari mwalo tshivbani ya Nungungulu.”

³Jesu a di phindrula, khuye: “Khu lisine, nyi ngu gu embela, kheni: Oyu a na gumba velegwa nyaluphye, gima kha na wona Mufumo wa Nungungulu.”

⁴Nikodhemo a di mu wudzisa, khuye: “Ina gu ngu kodzega kharini guvelegwa muthu a gumbidego? Ina a na dzi kodza gubela nyaluphye ndrani ga mayi waye, gasi guvelegwa nyaluphye, gani?”

⁵Jesu a di phindrula, khuye: “Khu lisine, nyi ngu gu embela, kheni: Oyu a na gumba velegwa khu mati ni Liphuvbo, kha na dzi kodza gubela Mufumoni wa Ndzadzini.

⁶Igyo gi velegidwego khu tshivba nya muthu, muthu kamwe, gasi igyo gi velegidwego khu Liphuvbo, Liphuvbo.

⁷U nga liwugi kholu nyi nga, kheni: Mwatshavbo gu vbwetega mu velegwani nyaluphye.

⁸Phuvbo ya gu furugedza avbo yi gunago; uwe u gupwa ligwaha laye, aholu, u si guti umo yitago khumo, numo yiyago. Khidzo kharato vatshavbo va velegidwego khu Liphuvbo.”

⁹Nikodhemo a di wudzisa, khuye: “Si na girega kharini isoso?”

¹⁰Jesu a di phindrula, khuye: “Uwe u gu Muhevbudzi tigoni ga Israyeli, khu mati mahungu yaya, gani?

¹¹Khu lisine, nyi ngu gu embela, kheni: Ethu ha gu ganela esi hi si tigo, ni gufakaza esi hi si wonego, gasi enu mwa gu nyenya wufakazi wathu.

¹²Olu mu si khodwigo nya gu ganela khu silo sa mafuni, mu na khodwa kharini nya gu ganela khu silo sa Ndzadzini?

¹³Mwalo a litidego Ndzadzini, vbavbandze ga wule a nga tshigago khu Ndzadzini, a gu Mwamana wa Muthu.

¹⁴ “Kha nga Mosi a nga khusedzago nyoga giwulani, Mwamana wa Muthu gu vbwetega a khusedzwa nuye,

¹⁵gasi muthu watshavbo a khodwago gwaye a si mbembi, aholu a mane guvbanya nya gupindruge.

¹⁶“Kholu Nungungulu haladzide ngudzu litigo gu kala a ningela Mwanaye wa moyo, gasi ni wevbi a khodwago gwaye a si mbembi, aholu a mane guvbanya nya gupindruge.

¹⁷Kholu Nungungulu kha rumela Mwanaye mafuni gasi guta mbembisa litigo, aholu guta li vbanyisa.

¹⁸Uye a khodwago gwaye kha mbembi; aholu, uye a si khodwigo a na mbemba, kholu kha khodwa linani la Mwamana wa moyo wa Nungungulu.

¹⁹“Igyo gi na va mbembisago, khegi: Guwonegela gu dzude mafuni, aholu vathu va di gola ngudzu gidema guvbindra guwonegela, kholu mithumo yawe yi vivbide.

²⁰Kholu muthu watshavbo a girago guvivba a ngu venga guwonegela, gambe kha hidzimeli vbafuvbi, gasi mithumo yaye yi si tugudwi.

²¹Gasi wule a landrago ndruda, a gu hidzimela guwonegelani, gasi gu wenengedzwa mithumo a yi giredego tshivbani ga Nungungulu.”

²²Hwane nya esi, Jesu gumogo ni vapizane, a diya tigoni ga Judheya, iyo a ngaya khala navo a gu bhapatisa.

²³Johane nuye a di gu bhapatisa tigoni ga Enoni, vbafuvbi ni Salimi, kholu iyo ma diromo mati nya mangi; va diya vathu nya vangi, gasi guya bhapatiswa.

²⁴ Kholu Johane a di si gu khothedwi.

²⁵Gu di manega gu ganedzisana khu kotani nya guagiswe vbakari nya vapizane va Johane ni Vajudha nya gukari.

²⁶Va diya ga Johane vaya, khavo: “Rabi, wule u nga bani uri naye tshatugo ga Joridhani, wule u nga mu fakazelago, womo a bhapatisa, vathu vatshavbo va guya gwaye.”

²⁷Johane a di phindrula, khuye: “Mwalo a dzi kodzago gu hakha gilo a gu bani a sa ningwa khu Ndzadzini.

²⁸ Enu kamwe mu dzifakazi nya iso nyi ganedego, kheni: Khandreni Kristo; nyi di rumedwa basi gu thanga mbeli gwaye.

²⁹Buzoni nya dzegano mudzegi khuye a gu ni mwangadzi gasi phelegedzi ya mudzegi, a gu iyo yi mu bangaladzago ni gu mu yingisa, ya gupwa lito la mudzegi ya gu tsaka ngudzu. Khilo eli litsako langu nya guvbelele.

³⁰Uye a ngu yela gu dandra, gasi eni nyi vbunguga.”

³¹Uye atago khu vbatshani khusegide vbatshani guvbindra vatshavbo; gasi uye a gu wa mafuni a gu lumba mafu, gambe a gu ganela khu silo sa mafuni. Oyu atago khu Ndzadzini,

³²a gu fakaza iso a nga si wonago ni gu si pwa, aholu, mwalo a hakhago wufakazi waye.

³³Uye a hakhago wufakazi waye a ngu tiyisa nya gukhuye Nungungulu kwa lisine.

³⁴Kholu wule a nga rumedwa khu Nungungulu a gu ganela mahungu ya Nungungulu, Nungungulu kha mu ningi Liphuvbo khu gu mu pimela.

³⁵ Babe a ngu gola Mwanaye, gambe vegide silo satshavbo mandzani gwaye.

³⁶Uye a khodwago ga Mwanaye a na ni guvbanya nya gupindruge. Gasi uye a si mu yingisigo kha na mana guvbanya, gambe a na tsayiswa khu likhulo la Nungungulu.