Read gitonga Johane 4 Bible Online

Johane 4 - gitonga bible

Johane 4

¹Vafarisi va pwide mahungu nya gupwani Jesu a ngu mana vapizane nya vangi ni gu bhapatisa guvbindra Johane.

²Ambari a nga bani a siri Jesu abune a nga bani a gu bhapatisa, aholu vapizane vaye.

³Na pwide mahungu yoyo a di khuga Judheya a guya nyaluphye tigoni ga Galileya.

⁵ A di vboha dhoropani nya gukari ga Samariya, gu ranwago Sikari, vbafuvbi ni gipeto gile Jakobe a nga ningago mwanaye Josefe.

⁶Avbo wu nga bani wu romo nambo wa Jakobe. Na garade khu ndzila, Jesu a di khala bambe nya nambo. Gu diri mihani gikhati nya midiya.

⁷A di vboha nyamayi moyo nya Musamariya, ata rega mati, Jesu a di mu lomba, khuye: “Nga nyivba mati nyi sela.”

⁸Vapizane vaye, va di hongode dhoropani vaya renga guhodza.

⁹ Nyamayi a di mu phindrula, khuye: “Khu ginani uwe nuri Mujudha u nyi lombago mati eni nyi gu Musamariya?” Kholu Vajudha va di si pwanani ni Vasamariya.

¹⁰Jesu a di mu hakha, khuye: “Nari pwani u ngu wuti wuhigo wa Nungungulu ni oyu a gukhuye: ‘Nyivbe mati nyi sele’, uwe khuwe u nga vbweta gu mu lomba, uye na gu ninga mati nya guvbanye.”

¹¹Nyamayi a di khuye: “Pfhumu, u mwalo purumwa, nari gu nambo khongolo; ayo mati uma thulago nya guvbanye wa gu ma mana hayi?

¹²Ina kamwe uwe u khongolo guvbindra babe wathu Jakobe, a nga hi ningago nambo yoyu, a gu umo a nga bani a gu rega nuye mati, a sela gumogo ni sanana ni sifuyo saye, gani?”

¹³Jesu a di hakha, khuye: “Oyu a selago mati yaya a napwa gambe lidora;

¹⁴gasi oyu a selago mati nyi na mu ningago gima kha napwa gambe lidora, ma na mu gira gifefe nya mati nya guvbanye nya gupindruge.”

¹⁵Nyamayi a di khuye: “Pfhumu, nyivbe mati yoyo, gasi nyi sipwi gambe lidora, nyi si bweleli gambe avba nyita rega.”

¹⁶Jesu a di mu embela, khuye: “Indra rana mwama wago u wuya naye.”

¹⁷Nyamayi a di phindrula, khuye: “Nyi mwalo mwama.” Jesu a gu hakha, khuye: “U ganede gwadi gukhuwe u mwalo mwama,

¹⁸kholu u gimbide ni livbandre vama; ni oyu u gu naye olu khandri wago. Khu kharato u ganede lisine.”

¹⁹Nyamayi a di mu embela, khuye: “Pfhumu, nyi ngu wona gukheni u muprofeti.

²⁰Vababe vathu va khozede gigomoni momu. Aholu enu mwari khenu gu vbwetega guya khozela Jerusalema.”

²¹Jesu a di mu embela, khuye: “Khodwa gwangu, nyamayi. Gi ngu vboha gikhati mu no khozelago Babe wangu nasiri gigomoni momu, mwendro saye Jerusalema.

²²Enu mwa gu khozela igyo mu si gitigo, gasi ethu ha gu khozela igyo hi gitigo, kholu guvbanyiswa gwa guta khu ga Vajudha.

²³Aholu, gi na vboha gikhati, kha nga gi vbohidego, avbo vakhozeli nya lisine va na khozelago Babe khu Liphuvbo ni lisine, kholu khavo vakhozeli va vbwetwago khu Babe.

²⁴Nungungulu Liphuvbo, khu kharato, vakhozeli vaye gu vbwetega va mu khozela khu Liphuvbo ni lisine.”

²⁵Nyamayi a di hakha, khuye: “Nyi ngu dziti nya gukheni Mesiya (a ranwago Kristo), a ngu vbweta gu vboha. Gikhati a na vbohago a nata hi tivisa satshavbo.”

²⁶Jesu a di mu embela, khuye: “Kheni nyi ganelago nago.”

²⁷Na varomo vbakari nya libhulo, va di vboha vapizane, va liwuga ngudzu khu gu mu mana na gu ganela ni nyamayi. Aholu, mwalo a nga tiya gu mu wudzisa, khuye: “Ginani u gi vbwetago?” Mwendro saye, khuye: “Khu ginani u ganelago naye?”

²⁸Nyamayi a di diga khali yaye, a gu hongola dhoropani aya embela vathu, khuye:

²⁹“Hongoleni muya wona mwama a nga nyi embela satshavbo nyi giridego. Ina khandri uye Kristo, gani?”

³⁰Avo va di duga khu dhoropani gasi guya wona Jesu.

³¹Gasi vapizane va di gu mu gurumedza, khavo: “Hodza Rabi.”

³²Aholu, uye a di va hakha, khuye: “Nyi na ni guhodza mu si gutigo.”

³³Vapizane va di wudzisana khu gyawe, khavo: “Nari mani a nga mu reselago guhodza?”

³⁴Jesu a di va embela, khuye: “Guhodza gwangu khu gu gira guhaladza ga wule a nga nyi rumelago ni gu gira mithumo yaye.

³⁵“Ina kha mu tali guganela, khenu: Ndrani nya migima mina yi na vboha nango nya guvbwere, gani? Khu kharato, eni neni nyi ngu mi embelani, nya gukheni: Khusedzani maho mu wone: Dzimbewu dzi vidzidwe, dza guvbweta gu vbwerwa.

³⁶Muvbweri phede gu hakha, gambe a ngu havela mihandro nya guvbanye gu si vbeligo, gasi muyali a tsaka gumogo ni muvbweri.

³⁷Khidzo kharati ma tadzisegago magana yale nya gukhayo: Muyali khu muyali; muvbweri khu muvbweri.

³⁸Nyi mi rumedeni guya vbwera iso mu ngamba si thuma; vomo va si thumidego, gasi enu mwa gu londrola tshivba yawe.”

³⁹Vasamariya nya vangi va dhoropani mule va di khodwa gwaye khu kotani nya lito lile nyamayi a nga li ganelago, khuye: “A nyi embede satshavbo esi nyi giridego.”

⁴⁰Khu kharato, gikhati va nga mu yela, va diya mu lomba gu a khale navo. A di khala navo matshigu mavili.

⁴¹Va na mu pwide, nya vangi ngudzu va di khodwa gwaye;

⁴²va di embela nyamayi, khavo: “Olu kha hi khodwi khu kotani nya magana yago; hi diya khu gupwa habune; hi ngu dziti nya gukhethu uye khu lisine khuye Kristo Muvbanyisi nya litigo.”

⁴³Na ma vbindride matshigu mavili, a di khuga khu vbale aya Galileya.

⁴⁴ Uye mune Jesu a di ganede, khuye: “Muprofeti kha thedwi kota tigoni gwawe.”

⁴⁵ Na vbohide Galileya, a di hakhwa khu Vagalileya va nga bani va wone satshavbo iso a nga girago Jerusalema litshigu nya buzo, kholu avo navo va di hongode buzotunu.

⁴⁶ Khavbo avbo, a di vboha nyaluphye tigoni ga Khanani gwa Galileya, iyo a nga vbindrugedza mati ma khala wadwa. Avbovbo, a diya mana mwama moyo a nga bani ari githumi nya mufumo, uye a diri ni gyanana gi nga bani gi dwala tigoni ga Kafarinawume.

⁴⁷Na pwide gupwani Jesu vbohide Galileya, na guta khu Judheya, a di mu khinga aya mu lomba gu a hongole gaya gwaye aya hawulugisa mwanaye a nga bani a gu hadza gufa.

⁴⁸Jesu a di mu embela, khuye: “Mwamba wonani siyeyedzo ni siliwugiso kha mu khodwi!”

⁴⁹Mwama wule a di hakha, khuye: “Pfhumu, relela, na si gufi mwamana wangu.”

⁵⁰Jesu a di mu embela, khuye: “Indra, mwanago a ngu vbanya.” Mwama wule a di khodwa khu magana ya Jesu, a gu hongola.

⁵¹Ndzilani a di manana ni sithumi saye si nga bani si gu mu landra, khiso: “Mwanago vbanyide.”

⁵²A di va wudzisa, khuye: “Gikhati muni a nga girago tshukwana?” Va di mu hakha, khavo: “Vbanova, ni mihani omu nya gikhati nya guhegule nya silambo, khavbo a nga khalago tshukwana.”

⁵³Babe wule a di wona nya gukhuye khigyo kamwe gikhati gile Jesu a nga khuye: “Mwanago a ngu vbanya.” A di khodwa uye ni vatshavbo va ndrangani gwaye.

⁵⁴Khigyo egi giliwugiso nya wuvili a nga girago Jesu, gikhati a nga wuyago khu Judheya ata Galileya.