Read gitonga Johane 5 Bible Online

Johane 5 - gitonga bible

Johane 5

¹Hwane nya isoso, wu diromo mumbe buzo nya Vajudha, Jesu a di gwela nuye Jerusalema.

²Jerusalema, vbafuvbi ni mwanya nya dzinvuta li diromo lidhamo, li nga bani li ranwa khu Gihebheru pwani Bhetesadha; li diri ni livbandre myanya.

³Myanyani momo va di khala vadwali nya vangi: Sikhumu, silima, sikhurubwa. Va nga bani va gu virela gu wunvudzwa mati,

⁴[kholu khu gikhati nya gukari ngilozi ya Nungungulu yi nga bani yi gu tshiga yita wunvudza mati muthu nya guphele gu bela lidhamuni a di hawuluga ni mevbini madwali a nga bani ari nawo.]

⁵Vbakari gwawe a di romo mwama moyo a nga bani a gu dwala ndrani nya magumararu na livbandre na miraru myaga.

⁶Jesu, a di mu wona na lade, a dziti gukhuye matshigu nari ni madwali yale, a di mu wudzisa, khuye: “U ngu dzina guvbanyiswa, gani?”

⁷Mudwali a di khuye: “Pfhumu, nya gu hamuga wangu nya gu nyi rinye lidhamuni, gikhati mati ma phelago guwunvuga; nya gukheni khu guya, nya gu thangedwa.”

⁸Jesu a di khuye: “Khuga u ema, dzega lidawu lago u hongola gaya.”

⁹Gikhati gyogyo a di dzegela gu hawuluga, a gu dzega gitshata gyaye a hongola. Satshavbo si giregide khu litshigu nya Sabhadho.

¹⁰ Khu kharato, Vajudha va di embela uye a nga hawulugiswa, khavo: “Kha gu yeli gu dzega lidawu lago, kholu muhuno Sabhadho.”

¹¹Uye a di va hakha, khuye: “Wule a nga nyi vbanyisa a di nyi embela khuye dzega lidawu lago u hongola gaya.”

¹²Vajudha va di mu wudzisa, khavo: “Khu mani muthu wakone a nga khuye dzega lidawu lago u hongola gaya?”

¹³Gani olu uye a disi muti uye a nga mu vbanyisago, kholu a di dzimeledwa khu Jesu, khaguva gu diri ni vathu nya vangi wulanga wowo.

¹⁴Hwane nya isoso, Jesu a diya mu mana Nyumbani ga Nungungulu, a mu embela, khuye: “U vbanyisidwe, u nga ghohi gambe, gasi u si dugeledwi khu mambe madwali nya guvbindre aya.”

¹⁵Uye a diya embela Vajudha khuye khu Jesu a nga mu vbanyisago.

¹⁶Khu kharato, Vajudha va di piga Jesu kholu a nga girago thumo wule khu Sabhadho.

¹⁷Aholu, Jesu a di khuye: “Babe wangu a gu thuma gikhati gyatshavbo, eni neni nyi ngu thuma.”

¹⁸Gukhugela avbovbo, Vajudha va di engedzela likhulo lawe ga Jesu, va vbweta mano nya gu mu songe, nasiri basi khu guyeyisa Sabhadho, aholu khu lito a nga ganelago nya gukhuye Nungungulu Babe waye, a dzi fananisa Naye.

¹⁹Jesu a di khusa lito a gu ganela, khuye: “Khu lisine, nyi ngu mi embelani, kheni: Gimwalo gilo Mwamana a girago khu gu gi khugela, vbavbandze nya iso a si wonago ga Babe waye, kholu satshavbo si girwago khu Babe si ngu girwa niso khu Mwanaye.

²⁰Kha nga olu Babe a golago Mwanaye ni gu mu yeyedza satshavbo iso a girago, a na mi yeyedza gambe nya sikhongolo nya guvbindre esi. Khu kharato mu na liwuga guvbindrisa.

²¹Kha nga ulo Babe a wusago va nya gufa ni gu va ninga womi, kharato nuye Mwamana a na vbanyisa avo a vanago.

²²Babe kha lamuli muthu, aholu ningide Mwanaye tshivba nya gulamule silo satshavbo,

²³gasi vatshavbo va rungudze Mwamana kha nga idzo va rungudzago khidzo Babe. Uye a si rungudzigo Mwamana kha rungudzi Babe a nga mu rumelago.

²⁴“Khu lisine, nyi ngu mi embelani, kheni: Oyu apwago magana yangu, a gu khodwa ga wule a nga nyi rumelago, a na mana guvbanya nya gupindruge. Khu kharato kha na mbemba, kholu dugide khu gufani, a gu bela guvbanyani.

²⁵Khu lisine, nyi ngu mi embelani gukheni gi nguta gikhati, vafi va na yingisago lito la Mwamana wa Nungungulu; avo va na li landrisago va na vbanya.

²⁶Kha nga ulo Babe a vbanyago khu tshivba yaye, ningide Mwanaye guvbanya nuye khu tshivba yaye.

²⁷A mu ningide tshivba nya gulamule, kholu a gu Mwamana wa Muthu.

²⁸ Mu nga liwugi khesi, kholu gi ngu vboha gikhati egi vatshavbo va fudego va gomo marowoni va na pwago lito laye, va wuga:

²⁹Ava na bani va na giride mithumo ya yadi, va na wuga vaya guvbanyani, gasi vale va na gu bani va giride guvivba va na wuga vaya gumbembani.

³⁰“Gimwalo nyi girago khu gu gi khugela. Eni nya gu lamula kha nga idzo nyi pwidego khidzo; gulamula gwangu khwa gululama. Kholu kha nyi giri gugola gwangu, gani olu, gugola ga wule a nyi rumidego.

³¹Nari pwani nya gu dzi fakazela, wufakazi wangu wu di siri wa lisine.

³²Aholu, womo a nyi fakazelago, eni neni nyi ngu dziti gukheni wufakazi a nyi girelago khwa lisine.

³³ “Mu rumede myango ga Johane; uye fakazide lisine.

³⁴Eni kha nyi vbweti wufakazi wa muthu, aholu nya gu mi embelani esi, gasi mufela guvbanya.

³⁵Johane a diri mwenge wu nga bani wu gu khondra wu wenengedza vbakari gwanu; enu khu matshigwana madugwana, mu di tsakiswa khu mwenge waye.

³⁶Gasi eni nyi na ni wufakazi nya guvbindre wa Johane, kholu mithumo nyi ningidwego gu gira khu Babe, yi ngu fakaza gu khiyo Babe a nyi rumede.

³⁷ “A nuye Babe a nga nyi rumelago ningide wufakazi khu eni. Gima mu si gupwi lito laye, mwendro gu wona khovbe yaye.

³⁸Mahungu yaye kha ma bela wongoni gwanu, kholu kha mwa khodwa ga wule a nga mu rumelago.

³⁹Enu mwa gu fulugutela Milowo na mu gu alakanya gu mana guvbanya nya gupindruge; khiyo kamwe Milowo yi fakazago khu eni.

⁴⁰Aholu enu kha mu dzini guta gwangu, gasi muta mana guvbanya.

⁴¹“Kha nyi dhumiswi khu vathu;

⁴²aholu nyi ngu mitini, gambe eni nyi ngu dziti gukheni, enu mu mwalo lihaladzo la Nungungulu.

⁴³Nyi dzude khu lina la Babe wangu, enu kha mwa nyi hakhani; aholu mumbe muthu a guta khu lina laye, mu nata mu hakha.

⁴⁴Mu na khodwa kharini enu mu girelanago lidiwo khu gyanu, mu si thembigo wuzundzo wutago basi khu ga Nungungulu?

⁴⁵Mu nga pimisi gukhenu nyi naya mi thuledza ga Babe; womo a na gu mi thuledzago, a gu uye Mosi mu mu thembago.

⁴⁶Nari pwani mu ngu khodwa ga Mosi, na mu gu khodwa gambe gwangu, kholu milowo yaye ya gu fakaza khu lina langu.

⁴⁷Aholu mwa gu bani mu si khodwi khu milowo yaye, mu na khodwa kharini khu magana yangu?”