Read gitonga Johane 6 Bible Online

Johane 6 - gitonga bible

Johane 6

¹Khavbo avbo, Jesu a di tshatuga yiphwa ya Galileya yi ranwago gambe pwani khya Tibheriyade.

²Gidzemo nya gingi nya vathu gi di mu landra khu gu wona siliwugiso a nga bani a gu gira ga vadwali.

³Jesu a di gwela gigomoni, aya khala ni vapizane vaye.

⁴Yi di gu hidzimela Phasika, buzo nya Vajudha.

⁵Jesu, na khuside maho a wona gidzemo nya gikhongolo gi nga bani gi mu tela, a di wudzisa Filipi, khuye: “Hi na renga hayi guhodza nya guhodzise vathu vava?”

⁶A di ganela kharati gasi gu mu linga, kholu a di gu giti igyo a nga bani a gu vbweta gu gira.

⁷Filipi a di phindrula, khuye: “Mazana mavili nya dzitsapawu dzi ranwago denari kha ma eneli gu renga dzipawu dzi ninganago gu muthu ni muthu a mane gipandrenyana.”

⁸Moyo nya mupizane waye nya gupwani khu Andreya, ndruye wa Simoni Pedro, a di mu embela, khuye:

⁹“Gyomo avba gikhwathana gi gu ni livbandre sibaba nya mala ni dzindzandzi dzimbili. Aholu, ginani gyogyo, ha guvbweta gu enedza gidzemo gegi?”

¹⁰Jesu a di khuye: “Rumani vathu vatshavbo va khale vbavbatshi.” Wu diromo mwasi nya wungi wulanga wakone. Va di khala vatshavbo. Tengo wawe wu di gu vboha umo nya livbandre magumi (5.000) mazana vama.

¹¹Khavbo avbo, Jesu, a di dzega sibaba a si kategisa, a si kabanisela ga avo va nga bani va khade; na dzegide dzindzandzi, a di gira idzosaye. Vatshavbo va di hodza idzo va nga dzinago khidzo.

¹²Na va khuride, a di ruma vapizane, khuye: “Rolelani sipandre si nga tshala, gasi gumba luzega gilo.”

¹³Na va si rolede, va di tadza likhumi na sivili situndru khu sipandre nya livbandre sibaba nya mala si nga tandregwago khavo va nga hodzago.

¹⁴Vathu vale, khu gu wona giliwugiso a nga girago, va di khavo: “Khu lisine, khuye oyu muprofeti a emisedwego guta tigoni.”

¹⁵Jesu, na dzitide gukhuye va di vbweta guta mu gira mufumeli, a di khuga nyaluphye, enga, a gu gwela gigomoni.

¹⁶Na li hwide, vapizane va di relela siwoni,

¹⁷vaya bela ngalavani va gu hongola kha guya Kafarinawume. Gudiri wutshigu, aholu Jesu a di hwela guya manana navo;

¹⁸kha nga yi nga bani yi romo phuvbo nya yikhongolo, mavimbi ma diya na ma gu engedzelana gu gugumuga.

¹⁹Na va dzuwide makasiya pfhuka nya livbandre (5) mwendro livbandre na mweyo (6) dzikilometro va di wona Jesu na gu hidzimela ngalavatunu, na gu gimbila khu vbatshani nya mati; va di khala hwanga.

²⁰Aholu, Jesu a di khuye: “Kheni, mu nga thavi.”

²¹Va di vbweta gu mu hakha ngalavani; aholu ngalava yi di dzegela gu tshegema iyo va nga bani va gu hongola, iyo.

²²Ni dzimindru, gidzemo, gi nga bani gi tshade khisikheyi nya yiphwa, gi di wona gukhigyo siwoni yi tshade ngalava mweyo basi; va di gu dziti gukhavo Jesu kha nga bela ngalavani, ni vapizane vaye, gikhati va tshatugidego.

²³Dzi di vbohide dzimbe dzingalava khu Tibheriyade vbafuvbi ni vbale va nga hodzago sibaba si nga kategiswa khu Pfhumu.

²⁴Na va wonide gukhavo Jesu ni vapizane vaye va diri mwalo vbale, vatshavbo va di bela dzingalavani vaya Kafarinawume, va gu landra Jesu.

²⁵Na va mu mane khisikheyi, va di mu wudzisa, khavo: “Rabi, u vbohide vbanyalini avba?”

²⁶Jesu a di va hakha, khuye: “Khu lisine, nyi ngu mi embelani, kheni: Enu mwa gu nyi vbweta, nasiri khu kotani nya siliwugiso mu nga si wonago, aholu khu kotani mu nga hodzago sibaba mu khura.

²⁷Mu nga thumelini guhodza, gule gu dzi kodzago guvbela, aholu thumelani gule gu ningago guvbanya nya gupindruge, ugo mu na ningwago khu Mwamana wa Muthu; kholu khuye oyu a nga ningwago gifungo khuye mune Babe Nungungulu.”

²⁸Khavbo avbo, va di khavo: “Ginani gi vbwetegago gasi gu gira guhaladza ga Nungungulu?”

²⁹Jesu a di va hakha, khuye: “Guhaladza ga Nungungulu khogu: Khodwani ga wule a nga mu rumelago.”

³⁰Va di engedza, khavo: “Siyeyedzo muni u girago, gasi, hi si wone, hi khodwe gwago? Mithumo muni u yi girago uwe?

³¹ Vakokwe vathu va hodzide manaha giwulani, kha nga gu lovidwego pwani: ‘A va ningide guhodza gu nga tshiga khu Ndzadzini.’ ”

³²Jesu a di va hakha, khuye: “Khu lisine, nyi ngu mi embelani, kheni: Khandri Mosi a nga mi ningani guhodza gutago khu Ndzadzini; Babe wangu khuye a mi ningago guhodza nya lisine gutago khu Ndzadzini,

³³kholu guhodza ga Nungungulu khu gule gutago khu Ndzadzini, khugo gu vbanyisago litigo.”

³⁴Khavbo avbo, va di khavo: “Pfhumu, hivbe guhodza gogo gikhati gyatshavbo.”

³⁵Jesu, khuye: “Eni kheni guhodza nya womi. Uye atago gwangu gima kha napwa ndzala; ni uye a khodwago gwangu, gima kha napwa lidora.

³⁶Gale na nyi mi embedeni, nya gukheni enu kha mu khodwi gwangu ambari mu nyi wonago.

³⁷Vatshavbo ava Babe a nyi ningago va nata gwangu; eni kha nyi dzi kodzi gu nyenya ni moyo nya ava vatago gwangu.

³⁸Kholu nyi tshigide khu Ndzadzini, gasi guta gira guhaladza ga wule a nyi rumedego; kha nya tela guta gira guhaladza gwangu.

³⁹Gugola ga uye a nyi rumedego khu gukhuye nyi si luzisi ni moyo nya vale a nyi ningidego, aholu nyi va wusa litshigu nya mahegiso.

⁴⁰Gugola ga Babe wangu khogu: Muthu watshavbo a wonago Mwamana, a gu khodwa gwaye, a na mana guvbanya nya gupindruge; gasi eni nyi na mu wusa litshigu nya mahegiso.”

⁴¹Khavbo avbo, Vajudha va di ngurangura kholu uye a nga ganela, khuye: “Eni nyi guhodza gu nga tshiga khu Ndzadzini.”

⁴²Avo va di wudzisana, khavo: “Ina khandruye oyu Jesu, gyanana gya Josefe, oyu hi vatigo vavelegi vaye? Khu ginani a gukhuye: ‘Eni nyi tshigide khu Ndzadzini?’ ”

⁴³Jesu a di khuye: “Mu nga nguranguri khu gyanu.

⁴⁴Mwalo a dzi kodzago guta gwangu, a gumba ranwa khu Babe a nyi rumedego; uyoyo nyi na mu wusa litshigu nya mahegiso.

⁴⁵ Vaprofeti va lovide gukhavo: ‘Vatshavbo va na hevbudzwa khu Nungungulu.’ Muthu watshavbo a pwidego ni guhevbudzwa khu Babe, a nguta gwangu.

⁴⁶Mwalo a wonidego Babe vbavbandze ga wule atago khu ga Nungungulu; uye khuye a wonidego Babe.

⁴⁷Khu lisine, nyi ngu mi embelani: Uye a khodwago a na ni guvbanya nya gupindruge.

⁴⁸Eni nyi guhodza nya guvbanye.

⁴⁹Vakokwe vanu va hodzide manaha giwulani, aholu va fude.

⁵⁰Gasi, ogu khu guhodza gutago khu Ndzadzini; uye a gu hodzago gima kha nafa.

⁵¹Eni nyi guhodza nya guvbanye gu tshigidego khu Ndzadzini. Uye a gu hodzago a na vbanya kala gupindruga; guhodza nyi na ningelago khu givili gyangu, gasi guvbanyisa litigo.”

⁵²Vajudha va di ganedzisana, khavo: “A na dzi kodza kharini gu hi ninga givili gyaye hi hodza?”

⁵³Jesu a di khuye: “Khu lisine, nyi ngu mi embelani, gukheni: Mwa gumba hodzani givili gya Mwamana wa Muthu ni gumba sela novba waye, kha mu na mana guvbanya.

⁵⁴Uye a hodzago givili gyangu ni gusela novba wangu a na ni guvbanya nya gupindruge; eni nyi na mu wusa litshigu nya mahegiso.

⁵⁵Kholu givili gyangu, guhodza nya lisine; ni novba wangu, gusela nya lisine.

⁵⁶Uye a hodzago givili gyangu ni gusela novba wangu a na khala ni eni, eni nyi na khala naye.

⁵⁷Kha nga Babe, a vbanyago, a nyi rumedego, a nyi vbanyisa khu tshivba yaye, a nuye oyu a nyi hodzago a na vbanya khu tshivba yangu.

⁵⁸Khugo ogu guhodza gu tshigidego khu Ndzadzini; kha gufanani ni gule gu nga hodzwago khu vababe vanu, va fudego; oyu a hodzago guhodza gogu a na vbanya kala gupindruga.”

⁵⁹Esi ganede Jesu na gu hevbudza nyumbani nya nombelo ya Kafarinawume.

⁶⁰Vangi nya vapizane vaye, na va pwide, va di khavo: “Ma ngu lemela magana yaya! Khu mani a na gu ma yingisago?”

⁶¹Na dzitide Jesu nya gukhuye vapizane va ngu kanakana myonyoni gwawe, a di khuye: “Esi sa gu mi khunguvanyisa, gani?

⁶²Ahati mwa gu wona Mwamana wa Muthu na gu lita iyo a nga bani a romo, mu na khenu ginani?

⁶³Liphuvbo khilo li ningago guvbanya, gasi givili kha gi phasi gilo. Magana nyi mi embedego Liphuvbo ni guvbanya.

⁶⁴Aholu, vbakari gwanu vomo va si khodwigo.” Khu lisine, Jesu a di gu vati, gukhugela guhegulani, khu vevbini vale va nga bani va si khodwi, ni gu, khu wevbini wule a nga vbweta gu mu ningela.

⁶⁵A di engedza gambe, khuye: “Khu kharato nyi ngu mi embelani, kheni: Mwalo atago gwangu a gumba ningwa khu Babe wangu.”

⁶⁶Gukhugela avbovbo, vapizane nya vangi va di bwelela hwane va mu diga, va si gimbili gambe naye.

⁶⁷Khu kharato, Jesu a di wudzisa vale nya likhumi na vavili vapizane vaye, khuye: “Enu nenu mwa gu vbweta gu hongolani, gani?”

⁶⁸Simoni Pedro a di phindrula, khuye: “Hi naya ga mani, Pfhumu? Olu a gu uwe u gu ni magana nya guvbanye nya gupindruge!

⁶⁹ Ethu hi ngu khodwa, gumogo ni gu dziti gukhethu uwe khuwe Gihathwa gya Nungungulu.”

⁷⁰Jesu a di va phindrula, khuye: “Ina khandreni nyi mi hathidego enu nya likhumi na vavili, gani? Ambari ulo, moyo wanu Sathane.”

⁷¹A di thula Judha mwamana wa Simoni Sikarioti, kholu khuye a nga bani a gu vbweta gu mu ningela, ambari a nga bani ari moyo nya vale nya likhumi na vavili.