Read gitonga Johane 7 Bible Online

Johane 7 - gitonga bible

Johane 7

¹Khavbo avbo, Jesu a di gimbilagimbila tigoni ga Galileya. A disi goli gu gimbila tigoni ga Judheya, kholu vakhongolo nya Vajudha va di guvbweta gu mu songa.

² Wu diri vbafuvbi buzo nya Vajudha, wule wu ranwago pwani i Buzo nya Mitshatsha.

³Khu kharato, vandriyaye va di khavo: “Khuga khavba, indra Judheya, gasi vapizane vago va wone navo mithumo u yi girago,

⁴kholu muthu watshavbo a vbwetago gu tidwa kha thumi khu gisihaledza. Kha nga olu u girago silo nya nga esi, dzi yeyedze tigoni.”

⁵Khu lisine, ambari vandriyaye va disi khodwi gwaye.

⁶Khavbo avbo, Jesu a di khuye: “Gikhati gyangu gi si gu vbohi, aholu ga enu gikhati gyatshavbo khyadi.

⁷Litigo kha li dzi kodzi gu mi zondra, aholu eni li ngu nyi zondra, kholu nya gu li tugudzisa mithumo yaye nya guvivbe.

⁸Indrani enu buzotunu. Eni kha nyiyi, kholu gikhati gyangu gi si gu vbohi.”

⁹Na va embede esi, a di tshala Galileya.

¹⁰Hwane nya gu vandriyaye na va hongode, a di landra nuye khu gisihaledza, nyamba dzi wonegisa.

¹¹Vajudha va di gu mu vbweta vbakari nya buzo, na va gu wudzisana, khavo: “Gasi womo hayi uye?”

¹²Gu diromo gu ganedzisana nya gukhongolo vbakari nya gidzemo khu kotani yaye. Vambe va di khavo: “Muthu nya wadi,” gasi vambe, khavo: “Eye! A gu kanganyisa vathu.”

¹³Ambari ulo, mwalo a nga bani a ganela khuye mwandrani, khu hwanga nya Vajudha.

¹⁴Aholu vbakari nya buzo, Jesu a di hongola Nyumbani ya Nungungulu aya hevbudza.

¹⁵Vajudha va di liwuga, khavo: “A gu yiti kharini Milowo gima na sa hevbula?”

¹⁶Jesu a di va hakha, khuye: “Gihevbudzo gegi khandri gyangu, khya wule a nga nyi rumelago.

¹⁷Uye a vbwetago gu gira gugola gwa Nungungulu a na dzi wudzisa gukhuye gihevbudzo gyangu gya guta khu ga Nungungulu, mwendro nya gu gi khugela.

¹⁸Uye a dzi fakazelago abune a gu vbweta gidhumo gyaye, aholu oyu a vbwetago gu dhumisa uye a nga mu rumelago, muthu nya lisine, a gu mwalo malipha.

¹⁹Gasi Mosi kha mi ningani nayo, gani? Aholu mwalo ni moyo wanu a wu landrisago! Khu ginani mu vbwetago gu nyi songa?”

²⁰Gidzemo gi di phindrula, khigyo: “U handrugide. Khu mani a vbwetago gu gu songa?”

²¹Jesu a di va hakha, khuye: “Khegi gya gimwegyo basi nyi giridego, mwa gu liwuga mwatshavbo.

²² Mosi a mi ningideni wugwera (khandri Mosi a nga wu phela, aholu khu vababe) enu mu ngu bedza wugwera khu Sabhadho.

²³ Kha nga olu mu dzumedzisago gu muthu a bele wugwera khu Sabhadho, gasi gu landrisa Nayo wa Mosi, khu ginani mu nyi zangarelago kholu nyi nga vbanyisa muthu khu Sabhadho?

²⁴Gulamulani mu nga khedzi khu khovbe, aholu lamulani khu lisine.”

²⁵Vambe Vajudha va Jerusalema va di wudzisa, khavo: “Ina khandruye oyu va mu vbwetago gasi gu mu songa, gani?

²⁶Nga wona, a gu ganela mwandrani, na tshulegide, ne gilo kha va mu giri! Ina vafumeli vathu va khodwe gukhavo khu lisine khuye Kristo, gani?

²⁷Ethu oyu hi ngu guti umo atago khumo; aholu, gikhati a natago Kristo, mwalo ni moyo a na gutigo umo atago khumo.”

²⁸Gasi Jesu, gikhati gyogyo, a di gu hevbudza Nyumbani ya Nungungulu, a di khusa lito, khuye: “Ina, mu ngu nyitini gumogo ni guti umo nyitago khumo! Aholu kha nyata khu gudzina gwangu; uye a nga nyi rumelago, mu si mutigo enu khuye a gu ni lisine.

²⁹Eni nyi ngu muti, kholu nya guta khiyo gwaye, ni gu gambe khuye a nyi rumedego.”

³⁰Khavbo avbo, va di vbweta gu mu mola, aholu mwalo a nga mu khuhago, kholu gikhati gyaye gi di si gu vbohi.

³¹Vbakari nya gidzemo, nya vangi va di khodwa gwaye, va gu wudzisa, khavo: “Ina a guta Kristo a nata gira siwoniso nya sikhongolo nya guvbindre esi a giridego, gani?”

³²Vafarisi va dipwa gu ganedzisana nya gidzemo khu kotani ya Jesu; vakhongolo nya vaphasi nya mhamba ni Vafarisi va di rumela dzindruna gasi guya mu mola.

³³Jesu a di khuye: “Nyi ngari nanu gikhati gidugwana, kholu nyi ngu vbweta gu hongola ga oyu a nyi rumedego.

³⁴Mu na nyi vbweta, aholu kha mu na nyi mana; iyo nyiyago kha mu dzi kodzi guta.”

³⁵Vajudha va di wudzisana, khavo: “Hayini a vbwetago guhongola avbo nyamba mu mana ethu? Mwendro a gu vbweta guya patana ni ava va phalalegidego tigoni nya Vagreki, gumogo ni guya hevbudza Vagreki?

³⁶A guvbweta khuye ginani khu magana yaya nya gukhuye: ‘Mu na nyi vbweta, aholu kha mu na nyi mana; ni gukhuye avbo nyiyago kha mu dzi kodzi guta?’ ”

³⁷ Khu litshigu nya guhegise, a gu litshigu likhongolo nya buzo, Jesu, na emide, a di khusa lito, khuye: “Uye a gu ni lidora a nate gwangu ata sela!

³⁸ Kha nga yi ganelago Milowo: Khu monyoni ga wule a khodwago gwangu, gu na duga mitsongo nya mati nya guvbanye.”

³⁹Jesu a di gu thula Liphuvbo, lile li nga bani li vbweta guhakhwa khu vale va khodwago gwaye; Liphuvbo li di si gu tshigi, kholu Jesu a disi gukhusedzwi wudhumoni gwaye.

⁴⁰Vbakari nya gidzemo, vambe nya vale va nga mu pwago, va di khavo: “Khu lisine uye muprofeti!”

⁴¹Vambe va di khavo: “Khu Kristo!” Gasi vambe va di khavo: “Kristo nya gute khu Galileya?

⁴² Ina kha yi ganeli Milowo khiyo Kristo a na dugela nyumbani ya Dhavhidhe, tigoni ga Bhetlehema, a gu umo a nga velegedwa umo Dhavhidhe, gani?”

⁴³Khu kharato, gu di manega gu hambana vbakari nya gidzemo khu kotani Yaye.

⁴⁴Vambe va di vbweta gu mu mola, aholu mwalo a nga mu khuhago.

⁴⁵Dzindruna dzi di bwelela ga vakhongolo nya vaphasi nya mhamba ni Vafarisi; khavbo avbo, dzi diya wudziswa pwani: “Khu ginani mu ngamba wuya naye?”

⁴⁶Dzindruna dzi di phindrula, khidzo: “Gima a si gu manegi muthu a ganelago kha nga uye!”

⁴⁷Vafarisi va di khavo: “Enu nenu mu di dzumela gu kanganyiswa?

⁴⁸Ina, mu di nga wona moyo nya madhota mwendro Vafarisi va khodwa gwaye, gani?

⁴⁹Dzitini gukhenu vathu vale va si wutigo Nayo va vadwe khu Nungungulu.”

⁵⁰ Nikodhemo, moyo nya Vafarisi, wule a nga hongola aya bhula ni Jesu, a di va wudzisa, khuye:

⁵¹“Ina nayo wathu wu ngu dzumedzisa gu mola muthu nyamba hegula khu gu mu wudzisa, gasi guti gighoho gyaye, gani?”

⁵²Va di mu phindrula, khavo: “Uwe nuwe u wa Galileya, gani? Khedza gwadi, u na wona nya gukhuwe mwalo muprofeti a dugelago Galileya.”

⁵³[Khavbo avbo, va di phalalega: Muthu ni muthu a gu hongola gaya gwaye.