Read gitonga Johane 8 Bible Online

Johane 8 - gitonga bible

Johane 8

²Ni dzimindru dzikhongolo a di manega gambe Nyumbani ya Nungungulu. Vathu vatshavbo va di mu yela. Khavbo avbo, a di khala vbavbatshi a va hevbudza.

³Nari vbakari nya guhevbudze, vahevbudzi nya Nayo ni Vafarisi va di mu resela nyamayi moyo a nga manwa na gu bhaya. Na va mu vegide vbakari gwawe,

⁴va di embela Jesu, khavo: “Muhevbudzi, nyamayi yoyu a di manwa na gu bhaya.

⁵ Mosi, a hi hevbudzide Nayo gukhuye vanyamayi nya nga oyu va ngu yela gu pfarwa khu siwindri. U ngu khuwe ginani?”

⁶Va di ganela esi gasi gu mu riya, va fela gu mana gilo nya gu mu kone khigyo. Aholu Jesu a di noga, a gu lova vbavbatshi khu nyala.

⁷Kha nga ulo va nga simama gu mu wudzisa, a di ololoka, a ganela, khuye: “Uye a dzitigo nya gukhuye mwalo gighoho, a na phele khuye a mu rinyela giwindri!”

⁸Khavbo avbo, a di noga nyaluphye a lova gambe vbavbatshi.

⁹Na va pwide magana yaya, va di phalalega khu moyo ni moyo, gu phela khu vakhongolo, gu tshala basi Jesu ni nyamayi wule a nga bani a emide vbakari.

¹⁰Jesu, na ololokide, a di mu wudzisa, khuye: “Nyamayi, gasi vomo hayi? Mwalo a gu konidego, gani?”

¹¹A di hakha, khuye: “Mwalo, Pfhumu.” Jesu a di ganela, khuye: “Eni neni kha nyi gu giri gilo. Indra basi, aholu gukhugela muhuno u nga engedzi gambe gughoha.”]

¹² Jesu a di va embela gambe, khuye: “Eni kheni wenengedzo nya litigo. Uye a nyi landrelago kha na gimbila gidemani, aholu a na bani ari ni guwonegela nya guvbanye.”

¹³ Vafarisi va di mu embela, khavo: “Wa gu dzi girela wukustumunyu wabune. Wufakazi wago khandri wa lisine!”

¹⁴Jesu a di va hakha, khuye: “Ambari nya gu dzi fakazela nyabune, wufakazi wangu khwa lisine. Nyi ngu guti umo nyitago khumo niyo nyi hongolago! Gasi enu kha mu guti umo nyitago khumo, niyo nyi hongolago.

¹⁵Enu mwa gu lamula khu mavbanyelo nya muthu, gasi eni kha nyi lamuli muthu.

¹⁶Ambari nya gulamula, gulamula gwangu khwa lisine, kholu khandreni nyenga basi; kheni ni Babe a nga nyi rumelago.

¹⁷Umo nya Nayo wanu gu lovidwe pwani wufakazi nya vathu vavili khwa lisine.

¹⁸Eni nyi ngu dzi girela wufakazi; Babe, a nga nyi rumelago, a ngu nyi girela nuye.”

¹⁹Khavbo avbo, va di mu wudzisa, khavo: “Womo hayi Babe wago?” Jesu a di va phindrula, khuye: “Ni eni kha mu nyiti, ni Babe wangu kha mu muti. Nari pwani mu di nyitide, na mu tide nuye Babe.”

²⁰Jesu a di ganela magana yaya vbamezatunu nya miningelo, na gu hevbudza Nyumbani ya Nungungulu. Aholu, mwalo a nga mu molago, kholu gikhati gyaye gi di si gu vbohi.

²¹Jesu a di va embela gambe, khuye: “Eni nyi ngu hongola, mu na nyi vbweta, aholu mu na fela gighohoni gwanu. Iyo nyi yago kha mu dzi kodzi guya.”

²²Khavbo avbo, Vajudha va di wudzisana, khavo: “A guvbweta gu dzi songa, gani? Olu a gukhuye: Iyo nyi yago kha mu dzi kodzi guya!”

²³A di engedza gu va embela, khuye: “Enu mu va vbavbatshi momu; gasi eni nyi wa vbatshani; enu mu va tigoni, gasi eni kha nyiri wa tigonimu.

²⁴Khu kharato nyi nga mi embelago nya gukheni mu na fela giwononi gwanu, kholu mwa gumba khodwa nya gukhenu eni kheni kamwe, mu na fela giwononi gwanu.”

²⁵Khavbo avbo, va di mu wudzisa, khavo: “Gasi khuwe mani?” Jesu a di va phindrula, khuye: “Nyi mi embedeni gukhugela guhegulani gukheni: Kheni mani!

²⁶Nyi na ni mahungu nya mangi nya guganele ni gulamula vbakari gwanu. Kholu wule a nyi rumedego khwa lisine, iso nyi hevbudzago tigoni khiso nyi si pwidego gwaye.”

²⁷Gasi avo kha va nga pimisa nya gukhavo a gu ganela isoso na gu thula Babe waye.

²⁸Khavbo avbo, Jesu a di khuye: “Gikhati mu na khusedzago Mwamana wa Muthu, mu na dzitini gukhenu kheni mani. Mu na wona nya gukhenu gimwalo nyi girago khu gu gi khugela, aholu mu na dziti gukhenu nya gu ganela kha nga idzo a nyi hevbudzidego khidzo Babe.

²⁹Wule a nyi rumedego a na ni eni; kha nyi diga nyenga, kholu gikhati gyatshavbo nya gu gira esi si mu tsakisago.”

³⁰Khu gupwa magana yaya, nya vangi va di khodwa gwaye.

³¹Jesu a di embela Vajudha vale va nga khodwa gwaye, khuye: “Mwa gu simama gu vegedza magana yangu, mu na khala vapizane vangu khu lisine,

³²mu natini lisine, gambe ilo lisine li na mi gira vathu nya gutshulege.”

³³ Va di mu phindrula, khavo: “Ethu hi melego wa Abrahama, gima hi si gu khali dzikhumbi dza muthu, khu ginani u gukhuwe mu na tshulega?”

³⁴Jesu a di va hakha, khuye: “Khu lisine, nyi ngu mi embelani, kheni: Muthu watshavbo a ghohago, khumbi nya gighoho.

³⁵Khumbi kha yi khali ndrangani gikhati gyatshavbo, gasi gyanana khya ndrangani.

³⁶Khu kharato, mwa gu tshudwa khu gyanana, mu na bani mu tshulegide khu lisine.

³⁷Nyi ngu dziti nya gukheni mu melego wa Abrahama, aholu mwa guvbweta gu nyi songa, kholu magana yangu kha ma beli myonyoni gwanu.

³⁸Eni nya gu mi embela iso nyi si wonidego ga Babe wangu; gasi enu mwa gu gira iso mu si pwidego ga babe wanu.”

³⁹Va di mu phindrula, khavo; “Babe wathu khu Abrahama!” Aholu, Jesu, khuye: “Nari pwani mu sanana sa Abrahama na mu gu landra mithumo ya Abrahama.

⁴⁰Gasi enu mwa guvbweta gu nyi songa, eni nyi mi embedego lisine nyi li pwidego ga Nungungulu. Abrahama kha gira kharato!

⁴¹Enu mwa gu gira mithumo ya babe wanu.” Avo va di khavo: “Kha ha velegedwa wubhayini. Hi na ni Babe moyo basi a gu Nungungulu.”

⁴²Jesu a va hakha, khuye: “Nari pwani Nungungulu Babe wanu, na mu nyi gola, kholu eni nya guta khu gu rumedwa khu Nungungulu. Kha nyata khu gudzina gwangu, aholu khuye a nyi rumedego.

⁴³Khu ginani mu si ma tigo maganelelo yangu? Kholu mu si dzinigo gu hakha magana yangu!

⁴⁴Babe wanu khu Sathane, khu kharato mwa vbweta gu gira guhaladza gwaye. Uye gighevenga gukhugela guhegulani, gima a si gu emeli lisine, kholu gwaye limwalo lisine. A gu lipha khu gu landra tumbunugo nya makhalelo yaye, kholu uye muliphi gambe babe nya malipha.

⁴⁵Gasi eni nya gu mi embela lisine, pima kholu mu si khodwigo.

⁴⁶Khu mani nya enu a dzi kodzago gu nyi kona khu gighoho? Nya gu mi embela lisine, khu ginani mu si khodwigo?

⁴⁷Uye a gu wa Nungungulu a ngupwa magana ya Nungungulu; kha nga olu mu si mapwigo, giyeyedzo nya gupwani kha muri va Nungungulu.”

⁴⁸Vajudha va di mu hakha, khavo: “Khandridzo edzi hi gukhethu u Musamariya, ni gukhethu u na ni liphuvbo nya guvivbe, gani?”

⁴⁹Jesu a di va phindrula, khuye: “Nyi mwalo liphuvbo nya guvivbe, aholu nya gu rungudza Babe wangu; gasi enu mwa gu nyi nyenya.

⁵⁰Eni kha nyi dwaneli gidhumo gyangu, Babe khuye a nyi ningago wudhumo, kholu khuye mulamuli wangu.

⁵¹Khu lisine, nyi ngu mi embelani, kheni: Uye a vegedzago magana yangu, gima kha na ngafa.”

⁵²Vajudha va di mu embela khavo. “Olu khavbo hi gu wonago khethu u na ni mandriki nya guhandruge. Abrahama fude, vaprofeti navo; nulo u gukhuwe: ‘Uye a vegedzago magana yangu gima kha na ngafa.’

⁵³Ina uwe u khongolo guvbindra babe wathu Abrahama, a ngafago? Ni vaprofeti va fudego navo? Gasi wa gu dzi gira mani uwe?”

⁵⁴Jesu a di va hakha, khuye: “Nya gu dzi khusedza nyabune, wudhumo wangu khandri wa gilo. Aholu Babe wangu khuye a nyi dhumisago, wule mu gukhenu Nungungulu wanu.

⁵⁵Aholu, kha mu mutini; eni kheni nyi mutigo. Nari pwani nyi di ganede kheni kha nyi muti, na nyi liphide kha nga enu. Eni nyi ngu muti ni gu vegedza magana yaye.

⁵⁶Babe wanu Abrahama tsakide khu gu lirela gu wona litshigu langu; na li wone a di nengela.”

⁵⁷Khavbo avbo, Vajudha va di khavo: “U ngari mwalo livbandre magumi myaga, ni gukhuwe u wonide Abrahama?”

⁵⁸ Jesu a di va hakha, khuye: “Khu lisine, nyi ngu mi embelani, kheni: Na si gu velegwi Abrahama, nyi diromo eni.”

⁵⁹Khavbo avbo, va di rola siwindri gasi gu mu rinyela, aholu Jesu a di sihala, a gu duga Nyumbani ya Nungungulu.