Read gitonga Mithumo 10 Bible Online

Mithumo 10 - gitonga bible

Mithumo 10

¹Sezareya a di gu vbanya mwama moyo nya gupwani khu Korineliyo, a diri muthangeli nya gikwata nya lizana masotshwa, ma nga bani ma gu ranwa pwani “Vaitaliya.”

²Mwama yoyo a diri mukhongeli nya githawo ga Nungungulu, uye ni ndranga yaye yatshavbo. A di phasedzela vathu khu silo, ni gu lombelela Nungungulu nyamba garala.

³Tshigu mwedo, ni silambo, umo nya ora nya wuraru, a di woniswa giwoniso nya gukari. Ngilozi ya Nungungulu yi di hidzimela avbo a nga bani a romo, yi mu rana, khiyo: “Korineliyo.”

⁴Uye a di khala hwanga a khusa maho a khedza, a hakha, khuye: “Ginani, Pfhumu?” Ngilozi ya Nungungulu yi di mu embela, khiyo: “Milombelo yago ni wuhindzi wago yi pwidwe khu Nungungulu, khu kharato, a gu alakanyide.

⁵Gasi olu, rumela vathu va hongola Jope vaya rana mwama moyo nya gupwani khu Simoni, limbe lina a gu Pedro,

⁶a endredego ndrangani ga Simoni, meseri nya malowo, a vbahidego nyumba yaye vbafuvbi ni yiphwa.”

⁷Ngilozi ya Nungungulu, na yi vbedzide gu ganela esi, yi di mwalalega. Khavbo avbo, Korineliyo a di rana sithumi saye sivili ni musotshwa moyo nya githawo ni Nungungulu, a gu avo a nga bani a gu va tumba.

⁸A di va tshamusela satshavbo, a va ruma gu hongola dhoropani ga Jope.

⁹Gandra ni dzimindru, na vari vbakari nya ndzila, vbafuvbi ni gu vboha, dhoropani ga Jope, Pedro a di lita vbatshani nya nyumba, khu gikhati nya midiya, gasi guya gira nombelo.

¹⁰Khavbo avbo, a di pwa ndzala a vbweta gu hodza gilogyo. Na va nga gu dongisela guhodza, a di wona giwoniso;

¹¹a di wona Ndzadzini na gu tulegide, ni gilo nya gufanane ni mwendra nya khongolo na wu thawuludzidwe, na wu hungidwe khu dzitshokani dza dzina wu relela vbavbatshi.

¹²Mwendra wule wu di tade khu sirengo satshavbo nya mawundru mana, ni dzinyoga, ni sinyoni satshavbo.

¹³A di pwa lito na li gukhilo; “Khuga u eme, Pedro, songa u hodze”

¹⁴Aholu, Pedro a di hakha, khuye: “Ahihi, Pfhumu, gima kha nyi na gira isoso, kholu, gima nyi si gu hodzi gilo nya gunyenyeze ni silo nyamba agiswa.”

¹⁵Aholu, lito li di engedza gambe, khilo: “Igyo Nungungulu a gi agisidego, u ngayi khuwe gi nyenyezide.”

¹⁶Esi si giregide dzinyondro dzitharu. Khavbo avbo, mwendra wule wu di bwelela Ndzadzini.

¹⁷Pedro, a di liwuga, a dzi wudzisa tshamuselo nya esi a nga si wonago. Va di vboha vathu va nga rumedwa khu Korineliyo, na va wudziside ndzila nya guhongole ndrangani ga Simoni, va di ta ema vbamwanyatunu.

¹⁸Na va ranide, va di wudzisa, khavo: “Khavbo avba a endredego Simoni a ranwago Pedro, gani?”

¹⁹Pedro, na nga gu pimisela esi a nga si wonago, Liphuvbo li di mu embela, khilo: “Vomo vathu va guvbwetago.

²⁰Vbiredza gu tshiga u hongole navo nyamba kanakana, kholu kheni nyi nga va rumelago.”

²¹Pedro a di tshiga a hongola aya ganela ga vathu vale, khuye: “Kheni oyu mu mu vbwetago. Nari ginani mu gi resago?”

²²Avo va di hakha, khavo: “Hi di rumwa khu Korineliyo, muthangeli nya gikwata nya lizana masotshwa, muthu nya ndruda ni githawo ga Nungungulu, uye a zundzwago khu litigo latshavbo nya Vajudha. A di embedwa khu ngilozi ya Nungungulu gu gu ranisa u hongola ndrangani gwaye, gasi uye aya yingisa magana yago.”

²³Khavbo avbo, Pedro a di va hakha a gu bela navo nyumbani. Gandra ni dzimindru, a di phara ndzila a hongola navo; vandruye nya gukari va tigoni ga Jope va di mu bangaladza.

²⁴Na va gimbide gipimo nya litshigu rumba, va di vboha dhoropani ga Sezareya Va ya mana Korineliyo na va lindrede; na tombaniside valongo ni dzipari nya gutumbege.

²⁵Gikhati a nga vbohago Pedro, Korineliyo a di mu khinga aya khidzima migondroni gwaye.

²⁶Aholu, Pedro a di mu khusedza, na gukhuye: “Khuga u eme, kholu eni neni nyi muthu nga uwe.”

²⁷Na gu bhula naye a di bela nyumbani aya mana vathu nya vangi na va tombanide.

²⁸Pedro a di va embela, khuye: “Kha nga mu dzitigo gwadi, kha gu dzumedziswi Mujudha gu hengela ni mahedheni, ambari gu bela dzindrangani gwawe. Aholu, Nungungulu a nyi yeyedzide gukhuye khandri gwadi gu rana muthu kwanu khuwe nyenyezide ni gukhuwe kha agiswa.

²⁹Khu kharato, na mu nyi ranide, kha nya bomba guta. Olu, nya gu lomba gukheni mu nyi embele egi mu nga nyi ranela igyo.”

³⁰Korineliyo a di mu hakha, khuye: “Vbanyatulo nguluni, khu gikhati nya nga egi, na nyi gu gira milombelo yangu nya silambo, nyi di wona muthu nya dzingandzu nya gungangamele,

³¹a nga ta nyi embela, khuye: ‘Korineliyo, nombelo wago wu pwidwe, ni wuhindzi wago wu wonidwe khu Nungungulu.

³²Khu kharato, rumela mwango wu hongola Jope guya rana Simoni limbe lina a gu Pedro, a endredego ndrangani ga Simoni, meseri nya malowo, a khadego vbafuvbi ni yiphwa.’

³³Nyi di dzegela gu gu ranisa. Nyi ngu bonga olu u dzudego. Olu hi tshanganide avba hatshavbo mahoni ga Nungungulu, hi dzi dongisede gu yingisa satshavbo esi u rumedwego khu Pfhumu.”

³⁴Khavbo avbo, Pedro a di khusa lito a ganela, khuye: “Nyi ngu wona khu lisine nya gukheni Nungungulu kha hatheli vathu,”

³⁵gambe kha khedzi mafumbo, a gu tsakiswa khu muthu ni muthu a mu ningago githawo ni gu landra ndruda Yaye.

³⁶Rumede magana yaye ga sanana sa na Israyeli, a gu si rumela mahungu maphya nya yadi nya gurule khu Jesu Kristo, a gu Uye Pfhumu nya vathu vatshavbo.

³⁷Mu ngu siti esi si dugeledego Judheya gwatshavbo, gukhugela Galileya, hwane nya gubhapatiswe gu nga huweledwa khu Johane.

³⁸Nungungulu a di tadza khu tshivba nya Liphuvbo nya Guage Jesu wa Nazareta uye a nga gimbilago malangani yatshavbo, na gu gira silo nya sadi ni gu hawulugisa vathu vatshavbo va nga bani va gu saniswa khu Sathane, kholu Nungungulu a diri ni uye.

³⁹Ethu hi dzifakazi nya silo satshavbo a nga girago tigoni nya Vajudha ni Jerusalema. Khuye va nga mu songa va mu vbayega vbasimbotunu.

⁴⁰Aholu, uye, khu litshigu nya wuraru, wusidwe khu Nungungulu, a gu ningwa tshivba nya gu dzi wonegise.

⁴¹Nasiri ga vathu vatshavbo, aholu ga dzifakazi dzile Nungungulu a nga bani a dzi hathide khu gale, a gu ethu hi nga hodzago ni gu sela naye, hwane nya gu bani a wugide khu ga vafudego.

⁴²Khuye a hi rumidego gu gimbila hi tivisa Ivhangeli ga vathu ni gu fakaza gukhethu uye khuye wule a nga vegwago khu Nungungulu kha nga mulamuli nya va nya guvbanya ni va nya gufa.

⁴³Vatshavbo vaprofeti va fakazide khu mahungu yaye, khavo: “Muthu watshavbo a khodwago a na mana gu tsetseledwa nya sighoho Linani Gwaye.”

⁴⁴Pedro na gu ganela silo sesi, Liphuvbo nya Guage li di tshiga ga vatshavbo va nga bani va gupwa mahungu ya Nungungulu.

⁴⁵Khavbo avbo, vakhodwa vatshavbo nya Vajudha va nga bani va dzude ni Pedro va di liwuga ngudzu khu gu wona nya gukhavo Liphuvbo nya Guage li tshigede navo va nya mayigo.

⁴⁶Kholu va di vapwa na va gu ganela malimi, va gu dhumisa Nungungulu. Khavbo avbo, Pedro a di ganela, khuye:

⁴⁷“Ina khu mani a na gu dzi kodzago gu bomba khuye va nga bhapatiswi khu mati, ava vathu va hakhidego Liphuvbo nya Guage kha nga ethu?”

⁴⁸A di ruma khuye va bhapatiswe khu Lina la Jesu Kristo. Khavbo avbo, avo va di mu lomba gu khala naye matshigwana.