Read gitonga Mithumo 12 Bible Online

Mithumo 12 - gitonga bible

Mithumo 12

¹Khu gikhati gyogyo, mufumeli Herodhi a di ruma gu saniswa vathu nya gukari nya libandla nya vakhodwa,

²a di songa khu litshari Jakobe, ndruye wa Johane.

³Na wonide nya gukhuye si tsakiside Vajudha, a di simama ni thumo waye, a gu mola nuye Pedro, khu matshigu nya sibaba nyambana mela.

⁴Na mu mode, a di mu khothela pasoni a mu ningela a ghadhwa khu mitsawa mina, tsawa ni tsawa a diri wa masotshwa mana. Na gu hingigedza gu mu ningela mwandrani khu hwane nya Phasika.

⁵Pedro a di khothedwe pasoni, ambari ulo libandla nya vakhodwa li di si garali khu gu mu girela milombelo ga Nungungulu.

⁶Ni wutshigu wowo Herodhi a nga bani a dongide gu mu ningela, Pedro a di lade vbakari nya masotshwa mavili na hungidwe dzitshinga, mambe masotshwa ma di gu ghadha lipaso.

⁷Khavbo avbo, yi di tumbuluga ngilozi ya Pfhumu, lipaso li di wenengedzwa khu safa; ngilozi ya Nungungulu yi di kuha limbambo la Pedro, yi mu wusa yi mu embela, khiyo: “Khuga u eme khu guvbiredza.” Khavbo avbo, dzitshinga dzi di thega khu mawogoni gwaye.

⁸Ngilozi yi di mu embela gambe, khiyo: “Hunga libhandri lago u ambala silato.” Pedro a di gira kharato. Ngilozi ya Nungungulu yi di engedza gambe, khiyo: “Ambala libhadzi lago u nyi landra.”

⁹Khavbo avbo, Pedro a di duga a gu landrisela ngilozi. A di si khodwi gukhuye lisine esi si nga bani si girwa khu ngilozi ya Nungungulu: A di pimisa gukhuye a gu lora.

¹⁰Na va vbindride ghadhi nya guhegule niyo nya wuvili, va di vboha vbalidimbatunu nya dzisimbi li khedzidego dhoropani, ilo li di tulega labune. Na va dugide, va di hongola, va gimbila vbadugwana, ngilozi ya Nungungulu yi mwalalega.

¹¹Pedro na wuyiside mapimo yaye, a di khuye: “Olu nyi ngu khodwa kheni khu lisine, Nungungulu rumede ngilozi yaye guta nyi vbulugisa mandzani ga Herodhi ni satshavbo sile si nga bani si gu liredwa khu Vajudha.”

¹²Na alakanyede gwadi satshavbo sesi, a di hongola ndrangani ga Mariya mayi wa Johane a ranwago khu limbe lina pwani khu Marko. Va di tshanganide iyo vakhodwa nya vangi va gu lombelela.

¹³Na khokhothile lidimba la nyangwatunu, gi di hongola githumi nya gyagadzyana nya gupwani khu Rodhe, gu yati khu mani.

¹⁴Na tugude lito la Pedro a di nengela ngudzu, a bwelela khu gututuma nyamba tula lidimba, aya tivisa khuye khu Pedro a guromo vbamwanyatunu.

¹⁵Va di mu hakha khavo “U handrugide.” Aholu uye a di simamisa a ganela, khuye: “Lisine nyi mi embelago.” Avo va di khavo: “Mwedzi waye!”

¹⁶Pedro a di simama gu khokhotha lidimba. Avo, na va tude va mu wona, va di liwuga ngudzu.

¹⁷Aholu, Pedro a di khusedza mandza a va degudza a va embeledzela edzi Pfhumu a nga mu vbulugisa idzo pasoni. A di engedza a va embela, khuye: “Tivisani silo sesi ga Jakobe ni ga vandruye.” Khavbo avbo, a di duga a gu phara ndzila a hongola wumbe wulanga.

¹⁸Na gu gugide, gu di manega pfilupfilu vbakari nya masotshwa, khu gu vbweta guti ginani gi nga dugelela Pedro.

¹⁹Herodhi, na mu vbwetide a si mu mani, a di thethisa dzighadhi, a dzi rumela gu songwa. Na khugide khu Judheya, a di ta Sezareya, a ta khala iyo.

²⁰Herodhi a diri ni giviti ni vathu va Tiro ni Sidhoni. Gasi avo va di pwanana khu monyo moyo va mu yela, na va phede khu gu pwana ni Bhalasito, muphari nya ndranga ya mufumeli, va di ta lomba gurula kholu litigo lawe li di gu pharwa khu litigo la mufumeli.

²¹Khu litshigu va nga bani va li vegiside, Herodhi a di ambala dzingandzu dzaye nya wufumu a gu khala vbagikhalotunu nya gulamule, a gu ganela vbakari gwawe.

²²Vathu va di kulungela, khavo: “Lito la Nungungulu, khandri lito nya muthu.”

²³Khu gikhati gyogyo a di vetwa khu ngilozi ya Pfhumu, a gu hodzwa khu siwungu afa, kholu kha nga rungudza Nungungulu.

²⁴Aholu, mahungu ya Nungungulu ma diya na ma gu engedzelana gudandra, ni guphalalega.

²⁵Bharinabha ni Sawule, na va vbedzide thumo wawe Jerusalema va di bwelela gumogo ni Johane a ranwago Marko.