Read gitonga Mithumo 15 Bible Online

Mithumo 15 - gitonga bible

Mithumo 15

¹Va di relela khu Judheya va ta Antiyokiya vathu va ngata hevbudza vandruye, khavo: “Mwa gumba hana wugwera, ni gu landrisa Nayo wa Mosi, gima kha mu na dzi kodza gu vbanyiswa.

²Gu di manega gu ganedzisana nya gukhongolo, kholu Pawulo ni Bharinabha va di hambana ngudzu ni sihevbudzo sawe. Va di pwanana vatshavbo va rumela Pawulo ni Bharinabha ni vambe vandruye, va gwela Jerusalema guya wudzisa mahungu yaya ga vapostoli ni madhota.

³Avo, na va dongisedwe khu libandla la Antiyokiya, va di phara ndzila va gu hongola. Va di tsemakanya Fenisiya ni Samariya, va gu tshamusela gu vbindrugedza ga va nya mayigo va gu nengedzisa ngudzu vandruye vatshavbo.

⁴Na va vbohide Jerusalema va di hakhwa gwadi khu libandla, ni Vapostoli, ni madhota, va tshamusela siliwugiso Nungungulu a nga girago khu avo.

⁵Aholu, vambe nya tsawa nya vafarisi va nga bani va khodwe va di ganela khavo gu vbwetega va nya mayigo va bela wugwera, va landra Nayo wa Mosi.”

⁶Vapostoli ni madhota va di tshangana gasi gu hevbula mahungu yaya.

⁷ Gu di manega gu ganedzisana nya gukhongolo ngudzu, Pedro a khuga a ema, a ganela, khuye: “Vandruye, mu ngu dzitini nya gukhenu Nungungulu a nyi hathide vbakari gwanu, gukhugela matshiguni nya guhegule, gasi va nya mayigo vapwe Ivhangeli khu kanani gwangu, va khodwa.

⁸ Uye Nungungulu atigo myonyo, a va girede wukustumunyu, khu gu va ninga Liphuvbo nya Guage kha nga a nga hi ningago ethu.

⁹Kha vega guhambana ga ethu ni avo, aholu a di agisa myonyo yawe khu gukhodwa.

¹⁰Khu ginani olu mu vbwetago gu linga Nungungulu khu gu rwega vapizane pingwi nya gu ambari vababe vathu ni ethu kha wu hi vbevbugeli gu wu rwala?

¹¹Kholu hi ngu khodwa gukhethu ha gu vbanyiswa khu wuhigo wa Pfhumu Jesu, kha nga avo navo.”

¹²Khavbo avbo, gu di gira kape libandla latshavbo. Va yingisa Bharinabha ni Pawulo na va gu tshamusela siwoniso ni siliwugiso satshavbo Nungungulu a nga girago khu avo vbakari nya va nya mayigo.

¹³Na va vbedzide gu ganela, Jakobe a di khusa lito a gu ganela, khuye: “Vandruye, nyi yingiseni:

¹⁴Simoni ganede khu edzi Nungungulu, gukhugela guhegulani, a hathidego khidzo vbakari nya va nya mayigo vale va nga ranwago vathu vaye.

¹⁵Ma ngu tadzisega magana ya vaprofeti; kholu gu lovidwe pwani:

¹⁶‘Khu hwane nya esi nyi na wuya nyi ta wusedza tshatsha wa Dhavhidhe wu thegidego nyi na vbahedza marumbi yawe, nyi va emisa,

¹⁷gasi vathu vatshavbo vale va nga tshadego va vbwete Pfhumu. Gumogo ni va nya mayigo vatshavbo va agisedwego Lina langu,

¹⁸ a ngu ganela Nungungulu a nga tulelago gu tidwa silo sesi khu myaga ya gale.’

¹⁹Khu kharato eni nya gu wona gukheni hi nga va garadzi va nya mayigo va vbwetago gu vbindrugedza mavbanyelo va khodwa ga Nungungulu.

²⁰Va na ningwe basi nayo nya gumba hodza nyama nya guphasedwe dzinguluve ni nyama nya sirengo nya gufe khu gu tshwedza, ni gu diga wubhayi, ni gumba hodza novba.

²¹Kholu, gukhugela matshiguni ya gale, Mosi na ni vahevbudzi nya Nayo va wu hevbulago mudzinyumbani nya nombelo khu dzisabhadho dzatshavbo.”

²²Khavbo avbo, Vapostoli ni madhota, na va pwanane ni libandla latshavbo, va di hatha vama nya gukari vbakari gwawe, va gu va rumela Antiyokiya gumogo ni Pawulo ni Bharinabha, ni Silasi, vama nya gutumbege vbakari nya vandruye.

²³Va di va ninga lidangalila leli, khavo: “Ethu vapostoli ni madhota, hi gu vandriyanu, hi ngu mi losani enu mwatshavbo vandruye va nya mayigo mu vbanyago Antiyokiya, ni Siriya, ni Silisiya. Seweni!

²⁴Na hi dzitide nya gukhethu va dugide vathu khu tsawani gwathu va ngata mi hambanisa mapimo khu gu ganela gwawe va gu khunguvanyisa mihefemulo yanu,

²⁵hi hungide khu monyo moyo gu hatha madhota hi ma rumela iyo gwanu gumogo ni Bharinabha ni Pawulo,

²⁶vama va ningedego womi wawe khu kotani nya Lina la Pfhumu Yathu Jesu Kristo.

²⁷Khavbo avbo, hi ngu mi rumelani Judha ni Silasi, avo va na ta ganela khu magana yawe mahungu yaya ya mamowo.

²⁸Liphuvbo nya Guage ni ethu, hi wonide gukhethu gwadi gumba mi ningani rwalo nya gulemele, vbavbandze nya milayo yeyi yi vbwetegago:

²⁹Mu diga gu hodza esi si phasedwego dzinguluve, ni novba, ni nyama nya sirengo nya gufe khu gu tshwedza, ni gu diga wubhayi. Mu na gira gwadi mwa gu dzi vegisa ga silo sesi. Vbanyani gwadi.”

³⁰Vale va nga rumedwago, va di relela Antiyokiya, na va vbohide, va di tombanisa libandla, va gu ningela lidangalila.

³¹Na va li hevbude, va di nengela khu gu tiyisedwa va gu manego.

³²Judha ni Silasi va nga bani vari vaprofeti navo, va di luleka vandruye va gu va tiyisela khu magana nya mangi.

³³Na va vbedzide matshigu nya gukari, vandruye va di va vbangana ni malosedzela nya gurule ga vale va nga va rumelago.

³⁴[Aholu Silasi a di hatha gu tshala Antiyokiya.]

³⁵Pawulo ni Bharinabha va di khala Antiyokiya gumogo ni vambe va hevbudza ni gu ganela mahungu nya yadi ya Pfhumu.

³⁶Khu hwane nya matshigwana, Pawulo a di embela Bharinabha khuye “Hongole hi bwelela hi gimbila hi holela vandriyathu madhoropani omu hi nga hevbudza mahungu ya Pfhumu, hi vati va ngu vbanya kharini.”

³⁷Aholu Bharinabha a di vbweta gu dzega nuye Johane a ranwago Marko.

³⁸Pawulo kha nga wona gwadi gu hengela ni wule a nga va diga Panfiliya a si hengeli navo thumo.

³⁹Gu di manega gu ganedzisana nya gukhongolo va hegisa khu gu hambana. Khavbo avbo, Bharinabha a di dzega Marko a khilela ngalava a gu hongola naye Kipre.

⁴⁰Aholu Pawulo, na hathide Silasi a di dongiswa khu vandruye wuhigoni ga Nungungulu a phara ndzila a hongola.

⁴¹A di vbindra khu Siriya ni Silisiya a tiyisela mabandla.