Read gitonga Mithumo 19 Bible Online

Mithumo 19 - gitonga bible

Mithumo 19

¹Gikhati Apolo a nga bani ari Korinto, Pawulo a di vbindra tigoni nya gigomo a gu relela Efeso. A di ya mana iyo vapizane nya gukari,

²a va wudzisa, khuye: “Mu hakhide Liphuvbo nya Guage gikhati mu nga khodwa, gani?” Avo va di hakha, khavo:

³“Gima hi si gupwi gupwani lomo Liphuvbo nya Age.” Uye a di engedza, khuye: “Gasi gubhapatisa muni mu nga bhapatiswa khugo?” Avo va di hakha, khavo: “Khu gubhapatisa ga Johane.”

⁴Khavbo avbo, Pawulo a di ganela, khuye: “Johane a di bhapatisa khu gubhapatisa nya gu dzisodzise ni gu dzi laya, a embela vathu gu khodwa ga oyu a na tago khu hwane gwaye, a gu Jesu.”

⁵Na va pwide esi va di bhapatiswa khu lina la Pfhumu Jesu.

⁶Gikhati Pawulo a nga va handzega mandza, Liphuvbo nya Guage li di tshiga vbatshani gwawe, avo va gu ganela malimi ni gu profeta.

⁷Vatshavbo va diri tengo nya likhumi na vavili vama.

⁸Pawulo a di bela nyumbani nya nombelo, a vbedza migima miraru na gu ganela khu gu tiyisa, nyamba thava gilo, na guvbweta gukhuye va khodwe vale va nga bani va gu mu yingisa, khu mahungu nya Mufumo wa Nungungulu.

⁹Ambari ulo, vambe va nya gubanga mihungo ni gumba khodwa va di phela gu dzuwungela Ndzila ya Pfhumu vbakari nya mwandra. Pawulo a di va diga a dzega vapizane khu phuvbo. Matshigu yatshavbo a di gu tshangana a bhula navo nyumbani nya guhevbule ya Tiranu.

¹⁰Girile kharalo gipimo nya myaga mivili, vathu vatshavbo va tigoni ga Aziya, Vajudha ni Vagreki va mane gu yingisa mahungu ya Pfhumu.

¹¹Nungungulu a di gu gira siliwugiso nya sikhongolo khu mandza ya Pawulo,

¹²gu di vboha avbo vathu va nga dzega sikhongelo va gu kuha khiso mili waye, va gu si yisa ga vadwali va gu hawuluga, ni maphuvbo nya guvivbe ma gu duga ma hongola.

¹³Vambe Vajudha va nga bani va gu legalega va gu tutumisa maphuvbo nya guvivbe, va di lingedzela navo gu thumisa khu lina la Jesu gasi gu vbanyisa vale va nga bani va mbakidwe khu maphuvbo nya guvivbe, va di ganela, khavo: “Eni nyi ngu mi ruma khu lina la Jesu, oyu Pawulo a ganelago khu Uye.”

¹⁴Ava va nga bani va gu gira esi a diri livbandre na sivili sanana sa Sevha, moyo nya khongolo nya vaphasi nya mhamba nya Vajudha.

¹⁵Aholu liphuvbo nya guvivbe li di hakha, khilo: “Jesu nyi ngu muti gwadi, Pawulo nuye nyi ngu muti. Ahati enu, khenu va mani?”

¹⁶Muthu wule nya mandriki a di va ndragela, a va pferulela dzingandzu, va duga khu nyumbani mule wumbwiri na va tade khu silondra.

¹⁷Vathu vatshavbo va Efeso Vajudha ni Vagreki va dipwa mahungu yaya, va gu tala khu hwanga va gu rungudza lina la Pfhumu Jesu.

¹⁸Vatshavbo avo va nga khodwago ga Kristo va di ta va ta dzi sodzisa ni gu dawulela mithumo yawe.

¹⁹Vathu nya vangi va nga bani va gu thumisa wun'yanga nya wutumbe, va di resa dzisolo dzawe va ta dzi vbisa na va gu wonwa khu vathu vatshavbo. Ga satshavbo esi si nga vbiswago, si di gu ningana tengo nya livbandre mazana nya mazana (500) dzitsapawu nya parata.

²⁰Khu magirelo yoyo Mahungu ya Nungungulu ma di andra ma gu tiya khu tshivba.

²¹Khu hwane nya satshavbo sesi, Pawulo a di hunga gikungo nya guvbindre khu Makedhoniya ni Akaya a hongola Jerusalema, a ganela, khuye: “Hwane nya gu bani nyi vbohide Jerusalema, nyi fanede gu hongola nyi ya wona gambe Roma.”

²²Khavbo avbo, a di rumela Makedhoniya vaphasedzeli vaye vavili, a gu Thimoti ni Erasto; uye a di simama gu khala gikhati nya gukari Aziya.

²³Khu gikhati gyogyo, gu di manega litunga nya likhongolo dhoropani ga Efeso khu kotani nya Ndzila yeyi nya yiphya.

²⁴Mwama moyo nya gupwani khu Dhemetriyo, mupfhuli nya parata, a di gu thuma gu gira sifananiso nya ndrumba ya Aritemisa khu parata. A di gira wugwewo nya bhindzu nya yikhongolo ngudzu, a fuma uye ni vatshavbo a nga bani a gu thuma navo.

²⁵Khavbo avbo, a di tshanganisa vatshavbo, gumogo ni vambe vameseri nya thumo wa moyo, a va embela, khuye: “Vama vakhwathu, mu ngu dzitini gwadi gukhenu satshavbo hi gu naso ha gu si mana khu thumo wowu.

²⁶Aholu mu ngu si wona ni gu sipwa khu dzindzeve dzanu esi mwama yoyu nya gupwani khu Pawulo a gimbilago a gira. A gu hevbudza khuye vanungungulu nya guvatwe khu mandza nya vathu khandri vanungungulu nya lisine. Khu kharato a dzi kodzide gu ndreyisa vathu nya vangi, nasiri basi tigoni momu ga Efeso, aholu ni Aziya gwatshavbo.

²⁷Esi si na gira mhango nya yikhongolo, kholu khandri basi thumo wathu wu na tshiswago vbavbatshi, ni nyumba ya nungungulu nya khongolo, Aritemisa kha yi na wonwa gambe nga gilo, nungungulu a khozedwago Aziya gwatshavbo ni hwindzo kha guya, kha na thedwa gambe kota.”

²⁸Na va pwide magana yaya va di swireka ngudzu, va phela gu gulumela, khavo: “Khongolo khu Aritemisa, nungungulu wa Vaefesu!”

²⁹Pfilupfilu yi di phalalega ni lidhoropa latshavbo. Vathu nya vangi va di tutumela guya nyumbani nya mihagano, na va mode Gayo ni Arisitariko va Makedhoniya, vabangaladzi va Pawulo.

³⁰Pawulo a di vbweta gu dzi wonegisa vbakari nya vathu, aholu vakhodwa kha ma mu dzumedzisa.

³¹Vathangeli nya gukari va Aziya nya dzipari dza Pawulo, va di mu rumela mwango, va lomba gukhavo a si beli nyumbani nya mihagano.

³²Pfilupfilu yi di engedzelana vbakari nya tshangano, muthu ni muthu a di ganela dzaye. Nya vangi vawe va di si giti igyo gi nga va tshanganisago.

³³Vajudha va di embeledzela Alexandre mahungu a nga vbweta gu ganela, va mu gurumedza gu ema vbakari nya tshangano. Alexandre a di khusedza mandza a lomba gurula gasi afela gu ganela.

³⁴Aholu, na va dzitide nya gukhavo Mujudha, va di engedzela gu gulumela khu lito limwedo, gipimo nya dziwora dzimbili, khavo: “Khongolo khu Aritemisa, nungungulu wa Vaefesu!”

³⁵Khavbo avbo, mabhalane wa dhoropani mule a di kodza gu degudza vathu, a ganela, khuye: “Madhota ya Efeso, vathu vatshavbo va ngu dziti nya gukhavo lidhoropa lathu la Efeso khilo li sayisago nyumba ya nungungulu nya khongolo Aritemisa gumogo ni gifananiso gyaye gi nga thega khu Ndzadzini.

³⁶Kha nga ulo hi dzitigo gukhethu mwalo muthu a dzi kodzago gu ganedza silo sesi, rulani myonyo, mu nga giri silo khu mavbingi.

³⁷Mu reside avba vama vava, aholu va mwalo nandru wa gilo, kha va phanga nyumba ya nungungulu, gambe kha va hembulula nungungulu wathu.

³⁸Uye Dhemetriyo ni ava a thumago navo, va gu bani vari ni ketso ni muthuyo, momo matshigu nya gulamule mahungu, vomo gambe valamuli, va na hongole vaya thela iyo dziketso dzawe.

³⁹Aholu ma gu bani ma romo mambe mahungu nya guganele, ma na lamudwa tshanganoni nya nayo.

⁴⁰Khu esi si giregidego muhuno, hi ngu dzi kodza gu ningwa nandru nya gupwani hi vawusi nya pfilupfilu vbakari nya vathu, hi na hamuga ni magana nya gu hakhe.”

⁴¹Na ganede kharato, a di phalalegisa vathu.