Read gitonga Mithumo 22 Bible Online

Mithumo 22 - gitonga bible

Mithumo 22

¹“Vandriyangu ni enu vababe! Yingisani olu esi nyi gu naso gu mi embela khu gu dzi vhikela gwangu.”

²Na va pwide gukhavo a gu ganela khu Gihebheru, vatshavbo va di degula, va mu yingisa khu githawo. Uye a di engedza, khuye:

³ “Eni nyi Mujudha, nyi givelegwa gya Tarisu, tigoni ga Silisiya. Aholu nyi dandrede dhoropani momu ga Jerusalema. Nyi hevbude gambe omu, ga Gamaliyeli, gu landrisa milayo ya vababe vathu khu githawo. Nyi di khathalela Nungungulu khu tshivba, nga edzi enu mwatshavbo mu mu khathalelago khidzo muhuno.

⁴Nyi di venga nyi dwanela gu songa valandreli nya Ndzila yeyi nya Mahungu nya Yadi ya Pfhumu. Nyi di mola, nyi hunga, nyi khothela mapasoni vama ni vanyamayi.

⁵Khongolo nya vaphasi nya mhamba ni madhota khavo dzifakazi nya silo sesi. Nyi hakhide khu mandzani gwawe malangalila nya gulovedwe vandruye va vbanyago dhoropani ga Dhamasiko. Nyi hongode nawo gasi guya mola Vakristo nyi va resa Jerusalema va ta tsayiswa.

⁶“Na nyiri vbakari nya ndzila nya guhongole Dhamasiko, ni vbakari nya mihani, nyiri vbafuvbi nya guvbohe, nyi di wona guwenengedza nya gukhongolo ngudzu, guta khu Ndzadzini, guta nyi fenengedza.

⁷Eni nyi di thega vbavbatshi, nyipwa lito li nyi embela, khilo: ‘Sawule! Khu ginani u nyi tshanisago?’

⁸Eni nyi di wudzisa, kheni: ‘Khuwe mani, Pfhumu?’ Lito li di nyi hakha, khilo: ‘Kheni Jesu wa Nazareta, oyu u mu sanisago!’

⁹Ava nyi nga bani nyiri navo va wonide guwenengedza gule, aholu lito nyi nga lipwago, avo gima kha va lipwa.

¹⁰Khavbo avbo, nyi di wudzisa, kheni: ‘Nyi rini olu, Pfhumu?’ Pfhumu yi di nyi embela, khiyo: ‘Khuga u bele Dhamasiko, iyo va na gu embela satshavbo esi u yelago gu si gira.’

¹¹Nyi di khala gikhumu khu kotani nya guwenengedze gule, nyi gu pharwa kunga khu avo nyi nga bani nyi gu endra navo, nyi gu bela dhoropani ga Dhamasiko.

¹²“A diromo mwama moyo nya gupwani khu Ananiya, muthu nya ndruda khu Nayo. Vajudha vatshavbo va di gu ninga wukustumunyu khu wuwadi waye.

¹³A dita nyi vbweta. Na nyi mane, a dita ema vbafuvbi gwangu a nyi embela khuye ‘Sawule, ndriyangu, ma na tulege maho yago u wone.’ Khu gikhati gyogyo, maho yangu ma di tulega, nyi wona.

¹⁴Uye a di khuye: ‘Nungungulu wa vababe vathu a gu hathide gasi u fela guti gwadi guhaladza gwaye, u wona Wululamo waye ni gupwa lito li dugago khu kanani gwaye.

¹⁵U na khala fakazi vbakari nya vathu vatshavbo nya esi u si wonego ni esi u si pwidego.

¹⁶ U nga gu virela gambe ginani, khuga u bhapatiswe, u handzwe sighoho sago khu gu lombelela khu lina laye.’

¹⁷Na nyi bwelede Jerusalema, nyiri Nyumbani ga Nungungulu nyi gira nombelo, nyi di beledwa khu liphuvbo,

¹⁸nyi wona Pfhumu na yi nyi embela, khiyo: ‘Vbiredza u duge khu Jerusalema, kholu vathu vava gima kha va na nga hakha esi u fakazago khu eni.’

¹⁹Aholu, eni nyi di hakha, kheni: ‘Pfhumu, avo va ngu dziti gukhavo nyi di gu gimbila khu nyumba ni nyumba nya nombelo, nyi gu ruma gu modwa va khothedwa mapasoni ni gu tshaniswa vatshavbo avo va khodwago gwago.

²⁰ Gikhati wu nga bani wu vbalaga novba wa Sitefane, fakazi yago, nyi diromo neni vbale nyi hengela nava va nga bani va gu mu songa, kheni nyi nga khala ni dzingandzu dzawe.’

²¹Uye a di nyi embela, khuye: ‘Indra, kholu nya guvbweta gu gu rumela hwindzo, ga va nya mayigo.’ ”

²²Va di mu yingisela kala a ganela magana yaya. Khavbo avbo; va di phela gu gulumela, khavo: “A na fuve muthu yoyu mafuni! Mwalo fanelo nya guvbanye.”

²³Va di gulumela, va gu tshula dzingandzu dzawe, va pfuledzela mafu vbatshani.

²⁴Ndruna yi di ruma gu mu yisa phathani na gu pimisa gu mu wudzisa khu gu mu kwamula, gasi guti khu ginani va gulumelago khu kotani gwaye.

²⁵Na va gu mu hunga khu makhetshe, Pawulo a di ganela ga muthangeli nya masotshwa, khuye: “Ina mu ngu dzumedziswa gu kwamula givelegwa gya Roma nyamba hegula khu gu gi lamula, gani?”

²⁶Na pwide magana yaya, muthangeli nya masotshwa a di vbweta ndruna a yi embela, khuye: “Ginani u vbwetago gu gira? Oyu mwama givelegwa gya Roma.”

²⁷Khavbo avbo, ndruna yi di ta wudzisa Pawulo, khiyo: “Nyi embele, ina u mu Roma uwe, gani?” Uye a di hakha, khuye: “Ina.”

²⁸Ndruna yi di engedza, khiyo: “Eni nyi vbedzide dzitsapawu nya dzingi khu gufela gu ranwa givelegwa gya Roma.” Pawulo, khuye: “Gasi eni nyi Muroma khu mavelego.”

²⁹Khavbo avbo, vale va nga bani va guvbweta gu mu wudzisa khu gu mu kwamula, va di duga va hongola; ndruna niyo yi di khala hwanga gikhati yi nga dziti gu khiyo Pawulo Muroma, kholu a di mu hungide khu makhetshe.

³⁰Khu mindru gakone, na guvbweta guti lisine nya nandru Vajudha va ningago Pawulo, a di mu tshula, a gu tombanisa vakhongolo nya vaphasi nya mhamba, ni madhota nya phatha nya Vajudha; a di rumela gu reswa Pawulo a mu vega vbakari gwawe.