Read gitonga Mithumo 26 Bible Online

Mithumo 26 - gitonga bible

Mithumo 26

¹Agiripa a di embela Pawulo, khuye: “U ngu dzi kodza gu sasamedzela wabune mahungu yago.” Pawulo, na khusedzide mandza a di ganela, khuye:

²“Mufumeli Agiripa! Nyi ngu nengela ngudzu muhuno khu gu ningwa wulanga mbeli gwago nya gu sasamedzele lisine khu mahungu nya milandru yatshavbo va nyi singedzago Vajudha.

³Ngudzungudzu, kholu uwe u ngu mati gwadi mavbanyelo nya Vajudha ni mahungu va ganedzisanago khayo. Khavbo avbo, nyi ngu gu lomba u nyi yingisa khu gu timisela.

⁴Vajudha va ngu dziti gwadi edzi nyi vbanyidego khidzo wudzahani gwangu, ndrani nya libandla langu, Jerusalema.

⁵ Avo va ngu dziti gwadi, gambe va na fakaza va gu dzina, gukhavo gukhugela wudzahani gwangu nyi landriside milayo nya mavbanyelo nya vafarisi, a gu ayo ma garadzago ngudzu guvbindrisa, ndrani nya milayo yatshavbo nya wukhodwa wathu.

⁶Olu va nyi reside avba gasi guta lamudwa khu kotani nya gitumbo nyi gu nagyo ga esi Nungungulu a nga sambanya ga vababe vathu khuye a na gira.

⁷Mahundzu yatshavbo nya likhumi na mavili ya na Israyeli, momo vbakari nya guvirele gu wona gu tadzisega nya gitumbiso gyogyo. Khu kotani nya egi gitumbiso va ngu khozela Nungungulu wutshigu ni mihani nyamba rereka. Khigyo gitumbo gegi, amanawe mufumeli Agiripa, gi vangelago ketso yatshavbo nyi giredwago khu Vajudha.

⁸Ina khu mawonelo yanu, mwari khenu Nungungulu kha dzi kodzi gu wusa va nyagufa, gani?

⁹Eni neni nyi di gu pimisa gukheni gu vbwetega gu dwana khu maphuvbo yatshavbo gasi gu fuvisa lina la Jesu, Munazarenu.

¹⁰Khiso nyi nga girago Jerusalema. Nyi di ningwa tshivba khu vakhongolo nya vaphasi nya mhamba, nyi khothela mapasoni nya vangi va nga khodwa ga Kristo. Gikhati va nga lamuledwa gufa, eni nyi di seketela gukheni va na songwe.

¹¹ Dzinyondro dzingi, eni nyi di bela dzinyumbani nya nombelo nyi va ninga sisaniso nya sikhongolo, khu gufela gukheni va dange gukhodwa gwawe. Khu kotani nya likhulo nyi nga bani nyiri nalo gwawe, nyi di va tutumisela kala ni madhoropani ya mayigoni ya vbavbandze.

¹²“Khiso si nga nyi yisa dhoropani ga Dhamasiko, na nyi ningidwe tshivba ni sileletelo khu vakhongolo nya vaphasi nya mhamba.

¹³Nyi diri vbakari nya ndzila, amanawe mufumeli, ni vbakari nya mihani, gikhati khigyo nya midiya, nyi di wona gu wenengedza nya gukhongolo, nya gute khu Ndzadzini, nya gungangamele guvbindra lidambo, nyi fenengedzwa khu safa eni ni avo nyi nga bani nyi gu endra navo.

¹⁴Hatshavbo hi di thega vbavbatshi. Khavbo avbo, eni nyi dipwa lito na li nyi rana khu Giharami, khilo: ‘Sawule, Sawule! Khu ginani u nyi sanisago? Kanu wago khandri wa gilo.’

¹⁵Eni nyi di wudzisa, kheni: ‘Gasi khuwe mani, Pfhumu?’ Lito li di nyi hakha, khilo: ‘Eni kheni Jesu, oyu u mu sanisago uwe!

¹⁶Khuga u ema. Eni nyi dzi wonegiside gwago, gasi u khale muthumeli wangu, u tivisa ga vambe esi u si wonego muhuno, ni esi simbe nyi na gu yeyedzago khu hwane nya matshigu.

¹⁷Nyi na guvbulugisa ga Vajudha ni ga va nya mayigo nyi gu rumelago vbakari gwawe.

¹⁸ Eni nyi ngu gu rumela guya va tula maho yawe gasi va duga gidemani, va ta guwonegelani; va duga wugumbini wa Sathane, va ta ga Nungungulu, va khodwa gwangu va fela gu divaledwa sighoho sawe, va hakha thomba yi lulamisedwego vbakari nya sihathwa, khu gukhodwa Gwangu.’

¹⁹“Gukhugela avbovbo, amanawe, mufumeli Agiripa, eni gima kha nyi dzi kodzi gu yeyisa giwonegiso gya Ndzadzini.

²⁰ Guphela nyi di tshumayela dhoropani ga Dhamasiko, nyi bela Jerusalema ni litigo latshavbo la Judheya nyi vbindrela mayigoni ya vbavbandze. Ga vatshavbo nyi tivisa gukheni gu vbwetega gu vbindrugedza mavbanyelo, va diga sighoho sawe, va wuya ga Nungungulu, va yeyedze gu vbindrugedza gwawe khu mithumo ya yadi.

²¹Khayo aya mahungu va nyi modego khayo Vajudha na nyi romo Nyumbani ga Nungungulu, va vbweta gu nyi songa.

²²Aholu, Nungungulu a nyi vhikede kala litshigu la muhuno, nyi emidego avba, mbeli gwanu, nyi ninga wufakazi wangu ga enu mwatshavbo nya vadugwane ni vakhongolo. Esi nyi ganelago khiso si nga tiviswa khu vaprofeti ni Mosi pwani si na dugelela,

²³ mahungu nya gupwani Misiya emede gufa gasi a khale muthu nya guhegule gu wuga khu gufani, a emiswa kha nga wenengedzo nya guvbanyise vbakari nya Vajudha ni va nya mayigo.”

²⁴Pawulo, na nga guganela magana yaya, Festo a di khusa lito a ganela, khuye: “U handrugide, Pawulo! Sihevbulo sago nya gulaphe si gu vbungude mapimo.”

²⁵Pawulo a di hakha, khuye: “Kha nya handruga, mufumeli wangu. Nya gu ganela mahungu nya lisine ni gupima.

²⁶Avba womo mufumeli Agiripa a si tigo gwadi silo sesi; pima kholu nyi ganelago na nyi tshulegide mahoni gwago. Gimwalo na gimwegyo gi giridwego khu gisihaledza.

²⁷Mufumeli Agiripa, u ngu khodwa ga vaprofeti, gani? Eni nyi ngu dziti gukheni u ngu khodwa.”

²⁸Khavbo avbo, mufumeli Agiripa a di embela Pawulo, khuye: “Nugunugu olu, wa guvbweta gu nyi vbindrugedza nyi khala mukristo!”

²⁹Pawulo a di mu hakha, khuye: “Nya gu lomba ga Nungungulu gukheni, gani nugunugu, gani khu matshigu ma ngu gutago, nasiri uwe basi, aholu mwatshavbo mu gomo avba mu nyi yingisa, mu vbindrugedza mu gu khala nga eni, na mu tshulegide nyambana dzitshinga dzedzi.”

³⁰Khavbo avbo, mufumeli Agiripa a di khuga a ema, a khuga nuye Festo ni Bherenise ni vatshavbo va ngatago navo.

³¹Na va gu duga, va di ganela khu gyawe, khavo: “Oyu mwama kha gira gilo nya guyele gu songwa mwendro gu khothedwa.”

³²Khavbo avbo, Agiripa a di embela Festo, khuye: “A di gu yela gu tshudwa, nari khwatshi khandri ga olu a lombidego gu lamudwa khu Sezari.”