Read gitonga Mithumo 9 Bible Online

Mithumo 9 - gitonga bible

Mithumo 9

¹Sawule a di gu vila khu likhulo na guvbweta lipindru nya gusonge vapizane va Pfhumu a diya ga khongolo nya vaphasi nya mhamba,

²aya mu lomba malangalila nya guhongole khayo dzinyumbani nya nombelo dzi guromo dhoropani ga Dhamasiko. A gimbila a molela vakhodwa nya vama ni vanyamayi va landrago ndzila yeyi a va hunga dzitshinga a va resa Jerusalema.

³Na gimbide, nari vbakari nya ndzila, vbafuvbi ni gu vboha Dhamasiko, a di fenengedzwa khu gulasa nya gukhongolo nya gute khu Ndzadzini.

⁴A di thega vbavbatshi a pwa lito na li gukhilo “Sawule, Sawule, khu ginani u nyi sanisago?”

⁵Uye a di hakha, khuye: “Nuri uwe mani, Pfhumu?” A di hakhwa pwani: “Kheni Jesu wule u mu sanisago,

⁶ambari ulo khuga u bele dhoropani, va na gu embela esi u fanedego gu gira.”

⁷Avo a nga bani ari navo Sawule va di thuruga kholu va di pwa lito, aholu va si woni muthu.

⁸Sawule a di khuga a ema a zama gu wona aholu a di si woni gilo. Va diya khu gu mu phara kunga va mu bedza Dhamasiko.

⁹Khade gipimo nya matshigu mararu nyamba wona, nyamba hodza, nyamba sela.

¹⁰Dhamasiko a di gu vbanya mupizane nya gupwani khu Ananiya, a di embedwa khu Pfhumu khu ndroroni, pwani: “Ananiya!” Uye a hakha, khuye: “Ganela Pfhumu, nyi ngu pwa.”

¹¹Pfhumu a di engedza gambe, khuye: “Khuga u hongola ndrangani ga Judha yi manegago ndzilani yi ranwago pwani ‘Gululama’ u ya wudzisa khu lina la mwama moyo nya gupwani khu Sawule nya givelegwa gya Tarisu, kholu womo vbakari nya gulombelele.”

¹²Khu gikhati gyogyo, Sawule a di woniswa mwama nya gupwani khu Ananiya na gu bela, a mu handzega mandza gasi a wona.

¹³Ananiya a di hakha, khuye: “Pfhumu, nyi pwide vathu nya vangi na va gu amba muthu yoyu khu guvivba gwatshavbo a girelago sihathwa Sago Jerusalema.

¹⁴Olu dzude eno khu gu rumedwa khu khongolo nya vaphasi nya mhamba ni lidangalila gasi guta molela vatshavbo avo va khodwago linani gwago.”

¹⁵Aholu, Pfhumu a di mu embela, khuye: “Indra, kholu muthu yoyo nyi mu hathide gasi a vbohisa Lina langu ga mayigo, ga vafumeli ni ga sanana sa Israyeli.

¹⁶Aholu, eni nyi na mu nonedza tshanisa a na gu yi wonago khu kotani nya lina langu.”

¹⁷Khavbo avbo, Ananiya a di khuga a hongola, na vbohide a di bela nyumbani a gu handzega mandza Sawule a mu embela khuye: “Sawule ndriyangu, Pfhumu Jesu, wule a nga gu tumbulugela ndzilani, gikhati u nga bani u guta, khuye a nga nyi ruma guta gu tula maho ni gu gu ninga Liphuvbo nya Guage.”

¹⁸Gikhati gyogyo gu di thega khu mahoni gwaye silo nya nga magwaru. Khavbo avbo, a di wona, a gu bhapatiswa.

¹⁹Hwane nya gu bani a hodzile, Sawule a di mana tshivba a gu khala matshigwana ni vapizane, dhoropani ga Dhamasiko.

²⁰Khavbo avbo, a di phela gu hevbudza dzinyumbani nya nombelo khuye Jesu. Mwamana wa Nungungulu.

²¹Avo va nga bani va gu mupwa va di liwuga, khavo: “Ina khandruye oyu a nga bani a gu sanisa avo va nga bani va gu ganela khu Lina la Jesu dhoropani ga Jerusalema, gani? Gasi khandri a dita eno gufela guta va molela a va hunga dzitshinga aya va ningela ga vakhongolo nya vaphasi, gani?”

²²Aholu, tshivba nya gutshumayele ga Sawule yi diya na yi gu tadzisega, a hambanisa mapimo nya Vajudha va Dhamasiko khu edzi a nga bani a gu fakaza khidzo khuye Jesu khuye Muvbanyisi a nga tumbiswago.

²³Na ma vbindride matshigwana, Vajudha va di hunga gikungo nya gu mu songe.

²⁴Aholu Sawule a di tiviswa. Ni malimba nya lidhoropa ma di ghadhwa wutshigu ni mihani, vafela gu mu songa.

²⁵Khavbo avbo, vapizane vaye va di mu dzega va duga naye ni wutshigu, va mu thela gitundruni va mu ndragisa libhiyo.

²⁶Na vbohide Jerusalema, Sawule a di vbweta gu bela tsawani nya vapizane, aholu, vatshavbo va di khala hwanga, va si khodwi gukhavo uye nuye mukhodwa.

²⁷Khavbo avbo, Bharinabha a di mu dzega a mu yisa ga Vapostoli aya va tshamusela idzo a nga wonago khidzo Pfhumu ndzilani a ganela naye, ni tshivba a nga ganelago khiyo khu lina la Jesu, dhoropani ga Dhamasiko.

²⁸Gukhugela litshigu lolo a di khala navo Jerusalema, a gimbilagimbila navo a hevbudza khu lina la Jesu na si thavi gilo.

²⁹A di bhula ni gu ganedzisana ni Vajudha nya guganele Gigereki, gasi avo va di gu luga mano nya gu mu songe.

³⁰Na va dzitide, vandruye va di mu rumela Sezareya va mu khiledza a gu hongola Tarisu.

³¹Libandla li di gu vbanya khu gu rula Judheya gwatshavbo, ni Galileya ni Samariya; Li diya na li gu dandra ni githawo ga Nungungulu, na li gu tiyiswa khu tshivba nya Liphuvbo nya Guage.

³²Pedro na gu gimbila a holela vakhodwa malangani yatshavbo, a di vboha ga sihathwa si vbanyago Lidha.

³³Iyo a ngaya mana mwama moyo nya gupwani Eneya, nya gigoha, a nga bani ari ni livbandre na miraru myaga na ladzisidwe vbadawutunu.

³⁴Pedro a di mu embela, khuye: “Eneya, Jesu Kristo a ngu gu hawulugisa; khuga u peta lidawu lago.” Uye a di dzegela gu khuga.

³⁵Vathu vatshavbo va Lidha ni va panini ga Saromi, na va mu wone, va di vbindrugedza va khodwa ga Pfhumu.

³⁶Tigoni ga Jope a di romo, vbakari nya vapizane, nyamayi moyo nya gupwani Tabhita, gu tshamusago gupwani “Yisya!” Adiri muthu nya mithumo ya yadi, a di phasedzela sisiwana.

³⁷Khu matshigu yale, a di dwala, a gu fa. Khavbo avbo, va di mu dzega vaya mu vega nyumbani ga vbatshani.

³⁸Lidha gu di gu, khala vbafuvbi ni Jope, vapizane na va pwide nya gupwani, Pedro womo iyoyo, va di rumela vama vavili gasi guya mu lomba, khavo: “U nga hweli guta eno gwathu.”

³⁹Pedro a di dzegela gu khuga a gu hongola navo. Na vbohide, va di mu yisa nyumbani ga vbatshani; dzinoni dzatshavbo dzi di hidzimela vbafuvbi gwaye, dzi mu yeyedza dzingandzu ni myendra a nga sonago Tabhita, na nga gu vbanya navo.

⁴⁰Aholu, Pedro, na rumide vathu vatshavbo gu duga vbavbandze, a di khidzima a gira nombelo. Na thendregedzide a khedza girumbi, a di khuye: “Tabhita, wuga!” Uye a di hapfhula; na wonide Pedro, a di khala khu giwunu.

⁴¹Pedro a di mu phara khu mandza, a mu phasa gu khuga a ema. Khavbo avbo, a di rana sihathwa ni dzinoni a va ninga muthu wawe na gu vbanya.

⁴²Mahungu nya giliwugiso gile ma di pwala dhoropani gatshavbo ga Jope, vathu nya vangi va di khodwa ga Pfhumu.

⁴³Pedro a di khala Jope matshigu nya gulaphe, ndrangani ga moyo nya gupwani khu Simoni a nga bani ari meseri nya malowo.