Read gitonga Varoma 10 Bible Online

Varoma 10 - gitonga bible

Varoma 10

¹Vandriyangu, esi nyi si vbwetago khu monyo wangu watshavbo, nyi si lombago ga Nungungulu milombeloni gwangu, khu gukheni Israyeli a vbanyiswe.

²Kholu nyi ngu dzi kodza gu va emela nyi fakaza gukheni avo va ngu dzi garadza ngudzu khu silo sa Nungungulu. Nombo basi khu gu va gu dzi garadzela wukhumuni,

³Kholu kha va pimi ndzila ya Nungungulu a ningago khiyo vathu gululama mahoni gwaye. Avo va gu dzi garadza khu magirelo yawe, aholu va diga gulandra ndzila yi vegisidwego khu Nungungulu.

⁴Kristo tshipiside Nayo wa Mosi gasi gu tshanganisa wulongoni gwa Nungungulu vathu vatshavbo va khodwago gwaye.

⁵ Esi Mosi a lovidego khu mahungu nya gululame gutago khu Nayo khesi: “Muthu watshavbo a landrisago gululama nya Nayo, a na vbanyiswa khu Nayo.”

⁶Gasi khu mahungu nya gutshanganiswe khu ndzila nya gukhodwe, Mosi lovide, kharati: “U nga ganeli khu monyoni gwago, khuwe: Khu mani a na litago a hongola Ndzadzini?” (Khu gupwani: Gasi guya rana Kristo a tshige mafuni).

⁷“U nga wudzisi gambe gukhuwe: Khu mani a na relelago vbavbatshi nya mafu?” (Khu gupwani: Gasi guya dusa Kristo khu gufani ata guvbanyani.)

⁸ Gasi Milowo yari, khiyo: “Magana momo vbafuvbi gwago, kanani gwago ni monyoni gwago.” Khayo magana yaya nya gukhodwe hi ma tivisago.

⁹Wa gu fakaza khu likana lago khuwe Jesu khuye Pfhumu, gumogo ni gu khodwa monyoni gwago khuwe Nungungulu a mu wuside khu ga vafudego, u na vbanyiswa.

¹⁰Kholu, muthu a gu khodwa monyoni gwaye gasi gu ma na gululama; a gu fakaza khu likana laye, gasi gu ma na vbanyisa.

¹¹ Kholu Milowo nya Guage yi ngu hi embela gukhiyo: “Wule a khodwago gwaye gima kha na nga thedwa dzitshoni.”

¹²Khu kharato, gumwalo gu hambana nya Vajudha ni va nya mayigo, kholu vatshavbo va na ni Pfhumu mweyo basi yi kavedzelago siningwa saye ga vatshavbo vale va mu lombago.

¹³ Kha nga yi ganelago Milowo, khiyo: “Muthu watshavbo a khodwago ga Pfhumu a na vbanyiswa.”

¹⁴Aholu va na dzi kodza kharini gurana wule va si khodwigo gwaye? Mwendro, va na khodwa kharini ga wule va si mapwigo mahungu yaye? Gambe, va na ma pwisa guwani, a gumba manega muthu nya guya va tivisa?

¹⁵ A na hongodzisa guwani muthu nya guya va tivisa, a gumba rumedwa? Kha nga gu ganedwago umo nya Milowo nya Guage, gupwani: “Gu ngu tshamba ngudzu gu wona gu vboha ga vale va hi reselago Mahungu nya Yadi.”

¹⁶ Kholu khandri vatshavbo va dzumelago Mahungu nya Yadi. Isaya ganede kharati, khuye: “Khu mani a khodwego khu mahungu hi tivisidego?”

¹⁷Kharati, gukhodwa gwa guta khu gupwa mahungu hi tiviswago, gutivisa gwa guta khu mahungu ya Kristo.

¹⁸ Olu nyi ngu wudzisa: Ina avo kha va mapwa mahungu yaya, gani? Khu lisine va ma pwide. Gambe iyo Milowo nya Guage yabune yi ngu ganela, khiyo: “Lito la vativisi li pwade tigoni gwatshavbo, ni magana yawe ma vbohide kala mahegiso nya mafu.”

¹⁹ Nyi ngu wudzisa gambe, kheni: Ina, vathu va na Israyeli kha va ma pima mahungu yaya, gani? Ga giwudziso gegi Mosi a gu hakha, kharati: “Nyi na mi gira mu khalela lidiwo litigo li si gu litigo la gilo; nyi mi gira mu khalela wufu litigo nya sipumbu.”

²⁰Isaya a ngu tiya gu ganela, khuye: “Nyi manidwe khu vale va nga bani va si nyi vbweti; nyi dzi wonegiside ga vale va nga bani va si nyi wudziseli.”

²¹ Aholu na gu thula Israyeli, Isaya, a di khuye: “Matshigu yatshavbo Eni nyi thawuludzide libogo langu, ga vathu nyamba khodwa ni gumba yingela.”