Read gitonga Varoma 15 Bible Online

Varoma 15 - gitonga bible

Varoma 15

¹Ethu hi tiyidego gukhodwani, guvbweta hi timisela, hi phasedzela vale va sa tiyago, gu rwala sigaradzo sawe. Hi nga dwaneli gu gira esi si hi tsakisago.

²Khu kharato, muthu ni muthu gu vbwetega a tsakisa kwawe khu silo nya sadi, gasi a mu tiyisela gukhodwani.

³ Kholu Kristo nuye kha vbweta esi nya gu mu nengedzise, aholu si tadzisegide gwaye esi si nga ganedwa omu nya Milowo nya Guage, pwani: “Givalo gya vale va gu valago gi thegede vbatshani gwangu.”

⁴Kholu satshavbo si guromo omu nya Milowo nya Guage si lovedwe gu khala gihevbudzo gwathu, gasi hi mane gutumba khu kotani nya gutimisele hi gu manago umo nya Milowo nya Guage.

⁵Uye Nungungulu a gu gifefe nya gutimisele ni gutiya gwatshavbo a na mi ningeni gupwanana moyo ni moyo mu fanana ni Jesu Kristo.

⁶Gasi mwatshavbo gumogo, khu lito limwedo, mu rungudza Nungungulu Babe wa Pfhumu yathu Jesu Kristo.

⁷Khavbo avbo, hakhanani khu gyanu kha nga Kristo a mi hakhidego, gasi a dhumiswe Nungungulu.

⁸Eni nyi ngu ganela kheni, Kristo dzude guta thumela Vajudha gasi gu yeyedza gutumbega gwa Nungungulu ni gutadzisega nya sisambanyo a nga girago ga vababe vathu.

⁹ Gasi va nya mayigo va kodze navo gu rungudza Nungungulu khu kotani nya wuhindzi waye, kha nga gu lovidwego umo nya Milowo nya Guage, pwani: “Khu kharato, nyi na gu rungudza vbakari nya mambe mahundzu, Nungungulu wangu, nyi na embelela wudhumo wago.” Gu lovidwe gambe, pwani:

¹⁰ “Ma na nengele mambe mayigo gumogo ni vathu Vaye.”

¹¹ Wumbe wulanga gu lovidwe gambe, pwani: “Rungudze Pfhumu, enu mwatshavbo va nya mayigo, vathu vatshavbo va na pwadze wudhumo waye.”

¹² A nuye muprofeti Isaya a ngu ganela, khuye: “Gi nata gitugulwana gya Jese, gi na ema gi fuma mayigo, va nya mayigo va na tumba igyo.”

¹³Uye Nungungulu a gu gibuga nya gitumbo a na mi ninge gunengela, ni gurula khu gukhodwa, gasi gitumbo gyanu gi engedzelana gu dandra khu tshivba nya Liphuvbo nya Guage.

¹⁴Vandriyangu, nyi ngu tumba ni gu tiya gukheni mu tade khu wuhindzi ni wusingalagadzi nya gululekane khu gyanu.

¹⁵Ambari ulo nyi tiyide gu mi lovela mahungu yaya gasi mu khale na mu gu ma pima. Nya gu gira esi khu kota nya thumo nyi pharisidwego khu Nungungulu,

¹⁶nya guthumele Jesu Kristo ga va nya mayigo. Kha nga muphasi nya mhamba, thumo wangu khu gu tivisa Mahungu nya Yadi ya Nungungulu gasi va nya mayigo va ningedwe ga Pfhumu kha nga mhamba nya gutsakise Uye, yi agisidwego khu Liphuvbo nya Guage.

¹⁷Kha nga muthu a khodwago ga Jesu Kristo, nyi ngu dzipwa nyiri ni wuzundzo ndrani nya thumo wowu wa Nungungulu.

¹⁸Eni kha nyi tiyeli gu ganela khu simbe silo vbavbandze nya esi Kristo a thumidego khu mandza yangu gasi gu wuyisa va nya mayigo vata khodwa ga Nungungulu. Esi si giregide khu magana ni mithumo,

¹⁹khu siliwugiso ni sisamadziso, ni tshivba nya Liphuvbo nya Guage. Khidzo kharati nyi tago na nyi gu tivisa Mahungu nya Yadi ya Kristo, gukhugela Jerusalema, ni malangani yatshavbo kala gipandre gya Iliriya.

²⁰Khu magirelo yoyo nyi garadzegide khu gu tivisa Ivhangeli malangani yale Kristo a nga bani a si gu tidwi, gasi nyi si vbahi vbatshani nya girendro gya vambe vathu.

²¹ Nyi di landrisa Milowo nya Guage, yi gu, khiyo: “Vale va ngamba embedwa mahungu yaye, va na ma wona; ni vale va nga bani va si gupwi gilo, va na ma pima.”

²² Dzinyondro dzingi nyi nga thindrekiswa guta mi holelani.

²³Gasi olu nyi vbedzidego thumo wangu eno, nyi ngu tumba gukheni nyi nata nyita manana nanu, kha nga a gu gale na nyi gu gola guta mi wona kharato, nyi nata mi holela.

²⁴Nyi nata mi holela gikhati nyi vbindrago nyi gu hongola tigoni ga Espanya. Mu nata nyi vbwelegedzani iyo, hwane nya gu na hi kodwe khu gu wonana.

²⁵Olu nya guhongola Jerusalema guya thumela vakhodwa va guromo iyo.

²⁶ Kholu vakhodwa va Makedhoniya ni Akaya va di pwanana va gu gira mihengo gasi guya phasedzela vandruye nya sisiwana nya Libandla la Nungungulu li guromo Jerusalema.

²⁷ Va di wona nari gwadi gu gira kharato, gambe a diri fanelo yawe. Kha nga ulo va nya mayigo va hakhidego makategwa nya liphuvbo a gu ya Vajudha, avo navo va na ni fanelo nya gu va phasedzele khu siningwa sawe nya mafu.

²⁸Gikhati nyi na vbedzago gu gimbidzisa thumo wowu, na nyi ningede mihengo yatshavbo, nyi na phara liendro nya guhongole Espanya, nyi na vbindra khiyo gwanu nyi mi holela.

²⁹Nyi ngu tumba gukheni gikhati nyi natago iyo gwanu, nyi nata na nyi tade khu makategwa ya Kristo.

³⁰Vandriyangu, nyi ngu mi lombani khu Pfhumu yathu Jesu Kristo ni lihaladzo hi ningwago khu Liphuvbo nya Guage, gukheni mu hengela ni eni, mu nyi lombelela ga Nungungulu khu monyo watshavbo.

³¹Lombani ga Nungungulu a nyi vbulugise ga vale va si khodwigo tigoni ga Judheya ni gu giphasedzelo gegi nyi yisago ga vakhodwa va guromo Jerusalema, giya hakhwa gwadi khu gunengela.

³²Gasi khu wuhindzi wa Nungungulu nyi na dzi kodza guta mi holela na nyi tsakide ngudzu, nyita hefemula vbadugwana vbakari gwanu.

³³Nungungulu nya gurule a na khale ni enu mwatshavbo. Amen.