Read gitonga Varoma 16 Bible Online

Varoma 16 - gitonga bible

Varoma 16

¹Nyi ngu mi bikelani ndriyangu Febe a thumelago Libandla la Kenikereya.

²Mu hakheni gwadi khu lina la Pfhumu, nga edzi gu vbwetegago khidzo vbakari nya vakhodwa, mu phasedzeleni ga satshavbo a na si vbwetago, kholu uye nuye phasedzede nya vangi, ambari eni neni a nyi phasedzede.

³ Vbohisani malosedzela yangu ga Prisila ni Akila, a gu avo nyi hengelago navo ndzilani momu nya guthumele Jesu Kristo.

⁴Avo va di dzi ningela ni womi wawe khu gufela gu nyi vbanyisa. Khavbo avbo, nyi ngu va bonga ngudzu. Nasiri eni basi, aholu ni mabandla yatshavbo nya vakhodwa nya va nya mayigo va ngu va bonga.

⁵Malosedzela yangu nya gu ma rumela gambe ga vakhodwa vatshavbo va tshanganago ndrangani gwawe. Losedzelani pari yangu Epeneto, a gu uye muthu nya guphele gu khodwa ga Kristo tigoni ga Aziya.

⁶Losedzelani Mariya a thumidego ngudzu vbakari gwanu.

⁷Losedzelani gambe Androniko ni Juniya sivelegwa sa tigomwedo ni eni, gambe hi nga hengela lipaso. Khavo va nga phela khavo gu tidwa vbakari ga vapostoli, va nyi hegudza gu khodwa ga Kristo.

⁸Losedzelani Apiliyato, pari yangu nya gigodwa khu ga Pfhumu.

⁹Mu losedzela Uribano nyi hengelago naye ndzilani momu nya guthumele Kristo; ni pari yangu Esitakiyo.

¹⁰Losedzelani Apelesi, mwama nya gukhathalele ngudzu Kristo, gumogo ni ngamo yatshavbo ya Arisitobhulo.

¹¹Malosedzela yangu nya gu ma rumela gambe ga Herodhiyamo, wa gaya, ni ngamo ya Narisizo va khodwago ga Pfhumu.

¹²Losedzelani Tirifena ni Tirifosa va dzi garadzago khu gu thumela Pfhumu, ni Perisidha, pari yangu nya gu yi gole, a thumedego nuye ngudzu Pfhumu.

¹³ Losedzelani Rufo a dzi ningedzelago thumoni wa Pfhumu, ni mayi waye, oyu eni neni nyi mu wonago kha nga mayi wangu nya lisine.

¹⁴Nyi ngu rumela gambe malosedzela ga Asinkirito, ni Felegonte, ni Herime, ni Patoroba, ni Hema ni vandruye vatshavbo va vbanyago navo.

¹⁵Losedzelani gambe Filologo ni Juliya, Nerewo ni ndriyaye nya nyamayi, ni Olimpiya, ni vakhodwa vatshavbo va vbanyago vbakari gwanu.

¹⁶Vatshavbo va loseni khu besu nya wundruye. Mabandla yatshavbo ya Kristo ma ngu mi losedzela.

¹⁷Nyi ngu mi tivisani, vandruye, gukheni dzi woneleni ga vale va wusago guhambana ni gu yala gukanakana sihevbuloni mu hakhidego. Gimbilelani hwindzo navo,

¹⁸kholu vathu nya nga avovo kha va thumeli Kristo, Pfhumu yathu, aholu va gu thumela sirumbu sawe. Va gu pfhadza vathu nya vangi khu magana yawe nya gulombele na ma tade khu wuhephi.

¹⁹Mahungu nya gutumbege gwanu ga Kristo ma pwade malangani gwatshavbo, ma nyi tsakisa ngudzu. Aholu nya guvbweta gukheni mu gengela gasi mu kodze gu landra esi nya sadi; mu rula gasi mu kodze gu dzi vhikela ga esi nya guvivbe.

²⁰Nungungulu nya gurule a na pala Sathane, a mu vega nyamba hwela vbavbatshi nya migondro yanu. Pfhumu yathu Jesu Kristo a na mi kategise.

²¹ Thimoti, mubangaladzi wangu thumoni momu, gumogo ni Lisiyo ni Jasani ni Sosipatro va ngu mi losedzelani.

²²Eni Terisiyo nyi lovago lidangalila leli, nyi ngu mi losedzela neni, khu ga Kristo.

²³ A ngu mi losedzela nuye Gayo, a nyi hakhidego ni gu hakha libandla latshavbo ndrangani gwaye.

²⁴Hakhani gambe malosedzela ya Erasito, a gu uye muphari nya kwama nya lidhoropa, ni malosedzela ya ndriyathu Kwarito. Wuhigo wa Pfhumu yathu Jesu Kristo wu na khale ga enu mwatshavbo. Amen.

²⁵A na rungudzwe Nungungulu! Khuye a dzi kodzago gu mi tiyisela gukhodwani, kha nga edzi yi hevbudzago khidzo Ivhangeli nyi mi tivisidego, ni mahungu ya Jesu Kristo, khu esi hi nga tuledwa gu siti khu mahungu nya guvbanyise ga Nungungulu. Sihalo wu nga bani wu sihade gukhugela myaga yatshavbo,

²⁶olu wu wonegisidwe khu Milowo ya vaprofeti khu guruma ga Nungungulu nya gupindruge. Mayigo yatshavbo ma tuledwe gu wuti sihalo wowu gasi ma hakhe gukhodwa.

²⁷Wudhumo wu na vegwe gwa Nungungulu nya Tshivba Yatshavbo, Nungungulu wamoyo nya guti, khu ga Kristo, kala gupindruga. Amen.