Read gitonga Varoma 2 Bible Online

Varoma 2 - gitonga bible

Varoma 2

¹ Khu kharato, uwe muthuwe u dzi girago mulamuli, gani u givbango muni, khu na nga ditshedzwa. Gikhati u lamulago vakwanu, wa gu dzi rwega nandru wabune, kholu iso u va lamulago khiso, u ngu si gira nuwe.

²Hi ngu dziti gwadi gukhethu Nungungulu kha hosisi a gu lamula a ninga nandru muthu a vbanyago khu mavbanyelo nya nga ayoyo.

³Ahati uwe u dzi girago mulamuli wa vakwanu na wu gu vbanya nuwe nga avo. Wa gu pimisa gukhuwe u na vbuluga gulamudwa khu Nungungulu, gani?

⁴Khu ginani u yeyisago wuhindzi nya wukhongolo wa Nungungulu, ni gurula ni gutimisela gwaye? Wa gumba dziti nya gukhuwe wuhindzi wa Nungungulu wu ngu gu gurumedza gu vbindrugedza mavbanyelo yago, gani?

⁵Aholu uwe u na ni monyo nya guvivbe, khu dzini gu dzi laya. Wa gu engedzela gitsayiso a nga gu ningago khu litshigu nya likhulo avbo Nungungulu a nga resago gulamula gwaye nya gululame.

⁶ Nungungulu a na hakhisa muthu ni muthu maningano ni mithumo yaye.

⁷A na ninga guvbanya nya gupindruge vale va dzi garadzago khu guthuma mithumo nya gululame, vale va mu dhumisago ni gu mu rungudza na va gu dwanela gu mana womi nyamba vbela.

⁸Aholu, a na tsayisa khu tshivba ava va mu wugelago, va si dzumeligo lisine, va gu landra ndzila nya guvivbe.

⁹Gu na manega gutshaniseka ni wuvi nya wukhongolo ga vathu vatshavbo va girago guvivba, guphela khu Vajudha kala ga va nya mayigo navo.

¹⁰Aholu Nungungulu a na ninga wudhumo ni wuzundzo ni gurula ga vatshavbo vale va girago nya sadi, guphela khu Mujudha kala va nya mayigo.

¹¹ Kholu Nungungulu kha hatheli vathu.

¹²Kholu vatshavbo va ghohago nyamba wuti Nayo, va na mbemba nyamba lamudwa khu Nayo yoyo. Gasi vale va ghohago na va gu wuti Nayo, va na lamudwa khu Nayo.

¹³Kholu muthu kha khali wa guluma mahoni ga Nungungulu khu guti Nayo basi. Aholu khu gu landrisa esi wu rumago Nayo.

¹⁴Avo va si gu Vajudha, va si wutigo Nayo, va gu landrisa esi si rumwago khu nayo nya tumbunugo nya mavbanyelo yawe, va ngu dzi gira nayo avo vamune.

¹⁵Va gu yeyedza khu mavbanyelo yawe gukhavo esi wu rumago nayo si lovidwe myonyoni gwawe. Mavhalo yawe ma ngu va hevbudza ugo gu vbwetegago gu gira, ma gu va thuledza mwendro gu va emela mithumoni gwawe.

¹⁶Gu na girega kharati litshigu Nungungulu a natago a ta lamula mithumo nya gusihale ya muthu ni muthu khu Jesu Kristo, kha nga edzi yi hi hevbudzago khidzo Ivhangeli nyi mi tivisago.

¹⁷Uwe wari khuwe u Mujudha, u themba Nayo, u dzi gira matshandza khu guti Nungungulu.

¹⁸U ngu guti gugola gwaye, ni Nayo gambe wu ngu gu hevbudza gu hatha esi si gu sadi.

¹⁹U ngu dzi gira muphari nya kunga nya sikhumu, ni mwenge wu wenengedzago vale va vbanyelago mugidemani.

²⁰U ngu dzi gira muhevbudzi vbakari nya sipumbu ni sanana, kholu u tigo lisine ni Nayo.

²¹Uwe u hevbudzago vakwanu, khu ginani u si dzi hevbudzi uwe mune? Uwe u hevbudzago khuwe kha gu vbwetegi guba, khu ginani uwe u bago?

²²Uwe u gukhuwe kha gu vbwetegi gubhaya, khu ginani u bhayago? Uwe u nyenyago vanungungulu nya malipha, khu ginani u thumisago esi si phasedwego avo.

²³Uwe u ngu dzi zundza khu gukhuwe u na ni Nayo, aholu, u ngu thela dzitshoni Nungungulu khu gu gira esi si himbedzedwago khu Nayo.

²⁴ Khidzo kharati, Milowo nya Guage, yi gu, khiyo: “Lina la Nungungulu li ngu vadwa vbakari nya va nya mayigo khu kotani yanu.”

²⁵Khu lisine, guhana wugwera gu na ni giphaso wa gu bani u gu landrisa Nayo. Aholu, wa gumba landrisa Nayo, ambari na wu hanide, khidzosaye ni gu bani wa sa hana.

²⁶Gasi wule a sa hanago wugwera, aholu a gu landrisa mithumo yi rumwago khu Nayo, ina kha na wonwa kha nga wule a hanidego wugwera, gani?

²⁷Wule a sa hanago wugwera mugivilini gwaye, aholu a landrisago Nayo, a na khala mulamuli wago uwe u wutigo Nayo nya gulowe gambe u hanidego wugwera, aholu u yeyisago Nayo.

²⁸Kholu khandri Mujudha nya lisine wule a yeyedzago wujudha waye khu vbavbandze basi, kha nga gambe, wugwera nya lisine khandri wule wu wonegago givilini basi.

²⁹Mujudha nya lisine khu wule a gu Mujudha khu monyoni gwaye, a nuwo wugwera nya lisine khu wule wu hanwago monyoni, wu hanwago maningano khu edzi li lombago khidzo Liphuvbo, nasiri khu edzi wu lombago khidzo nayo nya gulowe. Khuye oyu a rungudzwago khu Nungungulu, ambari a si rungudzwi khu vathu.