Read gitonga Varoma 4 Bible Online

Varoma 4 - gitonga bible

Varoma 4

¹Hi na khethu ginani khu babe wathu Abrahama, a gu nyapandre wathu khu tumbunugo? Ginani gi nga mu dugelelago?

²Nari gupwani Abrahama a di wonwa khu Nungungulu kha nga muthu nya gululame khu kotani nya mithumo yaye nya yadi, a diri ni fanelo nya gu dzi zundze khu mithumo yaye nya yadi, aholu nasiri mbeli ga Nungungulu.

³ Kha nga yi ganelago Milowo nya Guage, khiyo: “Abrahama khodwe ga Nungungulu, khu kharato, a sayedwe muthu a lulamidego.”

⁴Muthu watshavbo a thumago a na ni fanelo nya guhakhiswe, nasiri kha nga wule a ningwago giphaso nya gukari, aholu, kha nga wule a gu ni fanelo nya gulivbwe khu thumo a wu thumidego.

⁵Aholu, muthu a khodwago ga Nungungulu, a gu uye a hakhago gighohi, gukhodwa gwaye gu na mu gira muthu nya gululame.

⁶Khidzo kharato, Dhavhidhe a ganelago khu makategwa ya vale Nungungulu a va tshanganisidego lihaladzoni gwaye, nyamba khumbuga mithumo yawe, khuye:

⁷ “Va kategide vale Nungungulu a va ditshedzago sighoho sawe, vale sighoho sawe si futidwego!

⁸Ina, kategide wule Pfhumu a si theligo kota khu sighoho saye.”

⁹Ina, makategwa yaya khya Vajudha basi, mwendro ma gu lumba vambe navo, gani? Ethu hi ngu tiyisa nya gukhethu Abrahama wonidwe nari muthu nya gululame khu gukhodwa.

¹⁰Gasi gikhati muni si giregidego isoso ga Abrahama? Sayedwe muthu nya gululame na hanide wugwera mwendro na si gu hani wugwera, gani? Ahihi kha sa girega na hanide wugwera, aholu nasi a si gu hani.

¹¹Khu hwane, khavbo a hanidego gwadi wugwera kha nga giyeyedzo nya gupwani Nungungulu a mu wone kha nga muthu nya gululame, a mu hakha a khala pari yaye khu kotani nya gukhodwe a nga bani ari nago, na si gu hani wugwera. Khu kharato, uye khade babe wa vatshavbo vale va khodwago ambari na va sa hana wugwera, gasi a avo navo va wonwa na va lulamide.

¹²Uye gambe khuye babe wa vale va hanago wugwera, vale va si hegeligo basi gu hana wugwera, aholu va landrago gambe gihevbudzo nya gukhodwe gwa Abrahama na si gu hani wugwera.

¹³Nungungulu tumbiside ga Abrahama ni ga sanana saye gu va ninga litigo rumba li khala thomba yawe, nasiri khu kota nya gulandrise Nayo, aholu khu gukhodwa gwaye.

¹⁴ Kholu, nari gupwani thomba yeyi ya gu lumba basi vale va landrisago Nayo, gukhodwa gu diri mwalo giphaso, gambe gitumbiso gya Nungungulu gi di si phasi gilo.

¹⁵Nayo wa gu rana tsayiso wa Nungungulu, kholu avba wu gu mwalo Nayo, guhoha nugo gu mwalo.

¹⁶Khu kharato, thomba ha gu yi mana khu gukhodwa. Kharati, gitumbiso gi na ni giphaso ga satshavbo sanana sa Abrahama, nasiri basi ga vale va landrisago Nayo, aholu, ga vatshavbo va khodwago ga Nungungulu nga edzi Abrahama a nga khodwago khidzo. Khidzo kharati a gu babe wa ethu hatshavbo khu gukhodwa.

¹⁷ Kha nga yi ganelago Milowo nya Guage, yi gukhiyo: “Eni nyi gu giride babe nya mayigo nya mangi,” Abrahama khade babe wathu mbeli gwa Nungungulu a gu uye a vbanyisago va nya gufa, a tumbunugisago silo si nga bani siri mwalo.

¹⁸ Ni avba gu nga bani guri mwalo gutumba, Abrahama a di khodwa ni gutumba. Khu gukhodwa gwaye khade babe nya mayigo nya mangi, kha nga Milowo yi ganelago, khiyo: “Tengo nya sanana sago wu na bani wuri kharati.”

¹⁹ Abrahama a diri vbafuvbi nya gutshanganise lizana myaga, aholu gima kha kanakana gukhodwani gwaye khu gu dzipwa givilini gwaye na vbeledwe khu tshivba, ni guti gukhuye mwangadzi waye Sara gyumba, kha velegi.

²⁰Wulangani nya gukanakane ni gumba tumba ga gisambanyo gya Nungungulu, gukhodwa ga Abrahama gu di engedzelana gu tiya khu tshivba a gu rungudza Nungungulu.

²¹A di khodwa ni gu tumba gukhuye Nungungulu a na ni tshivba nya gutadzise gisambanyo gyaye.

²² Khidzo kharati Abrahama a nga wonwago kha nga muthu nya gululame, khu kotani nya gukhodwe gwaye.

²³Ogu nya gupwani: “Wonidwe kha nga muthu nya gululame” kha ga lowa basi khu kotani ya Abrahama.

²⁴Aholu gu lovidwe nugo khu kotani gwathu. Kholu a ngu hi wona nethu kha nga vathu nya gululame, ethu hi khodwago ga wule a wugidego khu ga vafudego, Jesu Kristo, Pfhumu yathu.

²⁵ Uye a di ningedwa a gu songwa khu kotani nya sighoho sathu, aholu wugide gasi gu hi gira vathu nya gululame mbeli gwa Nungungulu.