Read gitonga Varoma 5 Bible Online

Varoma 5 - gitonga bible

Varoma 5

¹Na hi wonidwe kharati, kha nga vathu nya gululame, khu kotani nya gukhodwe gwathu, ethu hi ngu vbanya khu gurula ni Nungungulu khu gwa Jesu Kristo, Pfhumu yathu.

²Khavbo ga Kristo, ethu nethu hi manide gukatega khu kotani nya gukhodwe gwathu. Khuwo wuhigo wowu hi vbanyago khuwo na hi tiyide ni gu dzi zundza khuwo, na hi gu lirela khu gunengela ni gitumbo gu wona wudhumo wa Nungungulu.

³Kha hi nengeli basi khesi, ha gu dzi zundza gambe khu kotani nya gusaniseke gwathu, kholu hi ngu dziti nya gukhethu gusaniseka khugo gu girago gutimisela:

⁴Gutimisela gu ninga gutiya musilingoni; gutiya gu ninga gitumbo.

⁵Gitumbo gegi kha gi hi phazamisi kholu Nungungulu tadzide myonyo yathu khu lihaladzo laye khu tshivba nya Liphuvbo nya Guage, a gu giningwa hi ningidwego khu Nungungulu.

⁶Kholu, gikhati hi nga bani hiri mwalo tshivba, na gi vbohide gikhati gyaye, Kristo a difa khu kotani gwathu ethu sighohi.

⁷Gu ngu garadza ngudzu muthu gufa khu kota nya mumbe muthu, ambari nari wa gululama. Aholu vomo va dzi kodzago gu ningela womi wawe va fela muthu nya gululame.

⁸Aholu, Nungungulu a hi yeyedzide gueta nya lihaladzo laye ga ethu, khu gu Kristo a hi fela ethu na hiri sighohi.

⁹Ngudzungudzu olu hi agisidwego khu novba wa Kristo, hi na vbulugiswa khuwo sisanisoni nya likhulo la Nungungulu.

¹⁰Uye Nungungulu, na hi ngari valala vaye a hi wonego na hi lulamide khu kotani nya gufe ga Kristo, hi ngu khodwa gukhethu, ngudzungudzu olu, hi tshanganisidwego naye, hi na vbanyiswa khu womi wa Mwanaye.

¹¹Gambe khandri iso basi. Ethu hi na ni gunengela nya gukhongolo ngudzu mbeli gwa Nungungulu khu kota ya Jesu Kristo, a gu uye hi manago khuye gutshangana ni Nungungulu.

¹² Gighoho gi bede mafuni khu muthu moyo basi, gambe gighoho gi yade gufa. Khidzo kharato gufa gu enedzidego vathu vatshavbo kholu vatshavbo va ghohide.

¹³Gighoho gi diromo khu gale mafuni na wu si gu vegwi Nayo. Aholu, Nungungulu a di si theli kota khigyo, kholu a di si gu vegi Nayo.

¹⁴Gu mwalo gukanakana vbamahungutunu nya gukhethu gukhugela matshiguni ya Adhamu kala matshiguni ya Mosi, gufa gu fumide vbatshani nya vathu vatshavbo ni ga vale va ngamba ghoha nga Adhamu a nga yeyisago Nungungulu. Adhamu a diri giyeyedzo gya wule a nga bani a gu hadza guta.

¹⁵Aholu, gighoho kha gi dzi kodzi gu ninganiswa ni wuhigo hi ningwago khu Nungungulu. Khu lisine, vathu vatshavbo va fude khu kota nya gughohe gwa muthu moyo basi; aholu wuhigo wa Nungungulu wukhongolo ngudzu guvbindrisa. Wuhigo wowu ha gu ningwa khu Nungungulu linani ga muthu moyo basi, a gu Jesu Kristo, wu vbalagela ga vathu vatshavbo khu gutala.

¹⁶Giningwa nya wuhigo wa Nungungulu, gi na ni mihandro nya guhambane ngudzu ni eyi yi nga vangwa khu gighoho gya muthu moyo basi. Kholu, gulamudwa nya gighoho gya muthu moyo basi, gu reside nandru ni gukonega, aholu, giningwa nya wuhigo gi ngata khu hwane nya sighoho nya singi, gi hi giride vathu nya gululame.

¹⁷Kholu kha nga gufa gu ningidwego tshivba khu kotani nya gighoho gya muthu moyo basi; ngudzungudzu vale va hakhago wuhigo wowu ni gu mana makategwa nya gululame, va na vbanya ni gu fuma khu tshivba ya muthu moyo basi, uye Jesu Kristo.

¹⁸Kha nga olu, gighoho gya muthu moyo basi gi residego gukonega ga vathu vatshavbo, kharati gambe, thumo nya guvbanyise wa muthu moyo basi, wu tshanganiside vathu vatshavbo ni Nungungulu, va gu vbanya naye khu gurula.

¹⁹Khu guyeyisa ga muthu moyo basi, vathu vatshavbo va khade sighohi, khu gu yingela ga muthu moyo basi, vatshavbo va khade va nya gululama.

²⁰Nayo wu tede guta engedzela gighoho. Aholu avbo gighoho gi nga dandra, wuhigo wa Nungungulu wu di engedzela gu dandra ngudzu.

²¹Kha nga olu gighoho gi yeyedzidego tshivba yaye khu gu resa gufa, kharati nuwo wuhigo wa Nungungulu wu ngu yeyedza tshivba yaye khu gu hi ninga gululama gu hi yisago guvbanyani nya gupindruge, khu Pfhumu yathu Jesu Kristo.