Read gitonga Varoma 9 Bible Online

Varoma 9 - gitonga bible

Varoma 9

¹Khu lina la Kristo nya gu ganela lisine, kha nyi liphi. Livhalo langu, na li gu wenengedzwa khu Liphuvbo nya Guage, li ngu tiyisa lisine nya esi nyi ganelago.

²Monyo wangu wu tade khu gu garadzega nya gukhongolo ni wuvi nyamba hegisa,

³Nyi di gu dogorela gu vadwa, givili gyangu gi dzudzugwa ni gu hambaniswa ni Kristo, nari gupwani iso sa gu dzi kodza gu phasedzela vandriyangu nya mavelego.

⁴ Avo sivelegwa sa Israyeli. Nungungulu a va giride sanana saye, a wuya a va kategisa khu gu khala vbakari gwawe ni wudhumo waye; hungide navo gidzumeledzwano, a va ninga Nayo, ni wukhozeli; ni situmbiso.

⁵Khavo sivelegwa sa vababe nya libandla; Kristo, khu tumbunugo nya wuthu, a gu lumba lihundzu lawe, uye a guromo vbatshani nya silo satshavbo, a gu Nungungulu nya gurungudzwe kala gupindruga. Amen!

⁶Ambari ulo, khandri gupwani gitumbiso gya Nungungulu gi tandregide. Kholu, khandri satshavbo sanana nya melego wa Israyeli si gu libandla la Nungungulu.

⁷Khandri satshavbo sanana nya livelego la Abrahama a gu a gu sanana saye nya lisine, kholu Nungungulu a di khuye ga Abrahama: “Khu Isaki a na gu ningago melego nya sanana nyi gu tumbisidego.”

⁸Esi sa gu yeyedza gupwani: Khandri sanana sa Nungungulu esi si velegwago khu tumbunugo nya wuthu; aholu, vale va velegwago khu tshivba nya gisambanyo, khavo basi va thudwago sanana saye nya lisine.

⁹ Kholu magana nya gitumbiso khaya: “Mwakani, khu matshigu yaya nyi na wuya, Sare a na bani ari ni gyanana.”

¹⁰Silo sesi kha sa dugelela Sare ekha, si dugelede nuye Rabheka a nga velega sanana sivili nya mavbaha ni kokwe wathu Isaki.

¹¹Nasi gu hefemuli, sanana si si guti gughoha, mwendro gu gira gululama, gasi gu yeyedza gwadi gupwani makungu ya Nungungulu ma girwa khu gu hatha nya gu gole gwaye, nasiri gukhedza khu mithumo, aholu gola ga Nungungulu a ranago.”

¹²Nungungulu a di khuye ga Rabeka: “Oyu nya koma a na thumela oyu nya nandra.”

¹³ Kha nga yi hevbudzago Milowo nya Guage, yi gu, khiyo: “Nyi gode Jakobe guvbindra Esawu.”

¹⁴Hi na khethu ginani olu? Hi na khethu Nungungulu kha gira gwadi? Ahihi, kha hi dzi kodzi gu ganela kharato.

¹⁵Kholu uye embede Mosi, khuye: “Nyi na girela wuhindzi uye nyi na dzinago gu mu girela, nyi ditshedza oyu nyi na dzinago gu mu pwela”

¹⁶Kholu kha pimi khu gugola mwendro khu gu dzi garadza nya muthu, aholu a gu pima khu guhaladza gwaye basi.

¹⁷ Kholu omu Milowo nya Guage, Nungungulu a ngu ganela a embela Faro, khuye: “Eni nyi gu khusedzide gasi nyi yeyedze khavbo gwago tshivba yangu, ni gu lina langu li tidwa tigoni gwatshavbo.”

¹⁸Khu kharato, Nungungulu a gu girela wuhindzi oyu a dzinago gu mu girela, a gu vivbisa monyo wa oyu a dzinago gu mu vivbisela.

¹⁹Olu mu na nyi wudzisani, gukhenu: “A gu bani ari kharato, khu ginani Nungungulu a ningago nandru muthu? Khu mani, a dzi kodzago gu yeyisa guhaladza gwaye?”

²⁰ Uwe muthu, khuwe mani, uwe nya gu ganedzisane ni Nungungulu? Ina khali nya libumba yi ngu dzi kodza gu wudzisa ga muwumbi waye, khiyo: “Khu ginani u nga nyi wumbago kharati?”

²¹Ina muwumbi mwalo ni fanelo nya gugire edzi a dzi golago khu libumba, gani? Ina kha dzi kodzi gu gira khilo sombo nya guthavisege, ni sombo nya nyalidede, gani?

²²Ha gupwa ginani ethu, Nungungulu a gu bani a dzinide gu yeyedza likhulo laye ni gu wonegisa tshivba yaye? Uye yeyedzide guhunisela nya gukhongolo ga vale va nga bani va gu yela gu mana sitsayiso nya likhulo laye, va nga bani va gu yela gu fuviswa.

²³Dzinide gambe gu yeyedza talo nya wufumu waye ga vale a va hathidego, kholu a hi pwede wusiwana a hi dongisela guya hengela naye wudhumoni gwaye.

²⁴Ethu khethu vale va ranidwego khu Nungungulu nasiri basi vbakari nya Vajudha, aholu ni vbakari nya va nya mayigo gambe.

²⁵ Khiso si lovidwego libhukuni ga Hoseya, pwani: “Vale va nga bani va siri vathu vangu, nyi na va rana vathu vangu’. Litigo nyi nga bani nyi si li goli, nyi na li rana gigodwa gyangu.

²⁶ Vbale va nga embedwa avbo gupwani: ‘Enu kha muri vangu’, wulangani wowo va na ranwa q sanana sa Nungungulu a vbanyago.”

²⁷Isaya nuye a ngu ganela, na gu thula Israyeli, khuye. “Ambari tengo nya vathu va Israyeli wu tala kha nga fungo wa phwani, gu na vbanyiswa basi vadugwana.

²⁸ Kholu Pfhumu a na tadzisa mafuni gwatshavbo magana yaye, nyamba hwela.”

²⁹ Uye gambe Isaya a di phede khu gu ganela, khuye: “Nari gupwani Pfhumu nya Tshivba Yatshavbo kha nga hi tshiyela melego, na hi mbembide kha nga Sodhoma ni Ghomora.”

³⁰Ha guvbweta gukhethu ginani khu satshavbo sesi? Ha guvbweta gukhethu vale va si gu Vajudha, va nga bani va si landreli Nungungulu, va wonidwe na va lulamide mahoni gwa Nungungulu khu kotani nya gukhodwe.

³¹Gasi Vajudha, va nga bani va gu landrisa Nayo, wu nga vbweta gu va gira vathu nya gululame mbeli gwa Nungungulu, va tandregide.

³²Khu ginani? Kholu kha va vbweta gululama khu ndzila nya gukhodwe, aholu va di vbweta gu gu mana khu gu landrisa mithumo yawe. Kharati, va di tshunganela va gu thega vbagiwindritunu nya gikhunguvanyiso,

³³ gi nga thudwa khu Milowo nya Guage, pwani: “Nyi ngu vega Siyoni giwindri gi tshunganisago gi thesa. Aholu, wule a khodwago ga egi giwindri gima kha na thedwa dzitshoni.”