Read gitonga 1 Vakorinto 10 Bible Online

1 Vakorinto 10 - gitonga bible

1 Vakorinto 10

¹ Vandriyangu, alakanyani gwadi esi si nga dugelelago ga vababe vathu. Vatshavbo va diromo vbavbatshi nya lipfhi; vatshavbo va tshatugide yiphwa.

²Vatshavbo va bhapatisidwe lipfhini ni phwani, va hengela gumogo ni Mosi.

³ Va hodzide vatshavbo guhodza gwa gumogo nya Liphuvbo nya Guage;

⁴ va gu sela gambe mati ya mamowo nya liphuvbo ma nga pfhurugago khu mugiwindrini nya Liphuvbo gi nga bani gi gu va bangaladza, giwindri gyogyo khu Kristo.

⁵ Ambari ulo, nya vangi kha va tsakisa Nungungulu, va fude giwulani.

⁶ Silo sesi si khade giyeyedzo ga ethu hatshavbo, gasi hi si dogoreli silo nyamba sadi, kha nga avo va nga si dogorelago.

⁷ Mu nga khozelini sithombe nya vanungungulu nya malipha kha nga vambe vababe va nga si khozelago, kha nga gu lovidwego omu nya Milowo nya Guage, gupwani: “Vathu va di khala vbavbatshi va hodza ni gu sela, va khuga va hana.”

⁸ Hi nga dzi ningedzeli wubhayini, kha nga edzi va nga gira nya vangi vawe, va fa khu litshigu limwedo basi gipimo nya magumavili na mararu magumi mazana (23.000) vathu.

⁹ Hi nga lingi Pfhumu kha nga edzi va nga girago vambe, va ngafa khu guhodzwa khu dzinyoga.

¹⁰ Mu nga ganedzi, kha nga va nga gira vambe, va gu mbemba khu gufa.

¹¹Satshavbo sesi si manegide gwawe gasi gu khala giwonegiso, gambe si lovidwe gasi si khale gitiviso ga ethu hi vbanyago ga matshigu yaya nya guhegise.

¹²Khavbo avbo, oyu a dzi pwago na tiyide, a na dzi wonele gumba thega.

¹³Sigaradzo mu si wonago khiso si pimedwego gu padwa khu muthu. Kholu Nungungulu tumbegide, kha na nga dzumedzisa gukhuye mu mane silingo nya guvbindre tshivba yanu. A gu mi rumela gilingo, a na mi tulela gambe dzindzila nya gu gi pale.

¹⁴Khavbo avbo, sigodwa sangu, mu nga khozelini sithombe nya vanungungulu nya malipha.

¹⁵Nya gu ganela ga vathu nya guti. Pimani gwadi esi nyi mi embelago:

¹⁶ Gasi gikombe nya gikategiso hi rungudzago khigyo, khandri wuhengeli Novbani wa Kristo, gani? Ahati gibaba hi pilago, khandri wuhengeli givilini gya Kristo, gani?

¹⁷Olu gibaba a gu gimwegyo basi, ethu hatshavbo, ambari hiri vangi, hi givili gimwegyo basi, kholu hi ngu hengela gu hodza igyo gibaba gya gimwegyo.

¹⁸ Khedzani libandla la na Israyeli khu tumbunugo. Vale va hodzago nyama nya miphaso, khandri va gu hengela ni Nungungulu a nga phasedwa mhamba yile, gani?

¹⁹Ina nya gu vbweta gukheni ginani khu esi? Ina nyama nya guphasedwe vanungungulu nya malipha yi na ni giphaso, gani? Mwendro gukheni vanungungulu nya malipha va phaswago gilo, gani?

²⁰ Ahihi, khandriso! Va nya mayigo, dzimhamba va ningelago dzinyumbani nya vanungungulu nya malipha, va gu phasela maphuvbo nya guvivbe, kha va phaseli Nungungulu. Eni kha nyi vbweti gukheni mu hengela ni maphuvbo nya guvivbe.

²¹Enu kha mu dzi kodzi gu sela gikombe nya phaso wa Pfhumu, mu wuya khavbo muta sela gambe gikombe nya miphaso nya vanungungulu nya malipha. Kha mu dzi kodzi gu hodza mbiyani nya Mhamba ya Pfhumu, mu wuya khavbo mu hodza gambe mbiyani nya dzimhamba nya vanungungulu nya malipha.

²²Mwendro ha gu vbweta gukhethu Pfhumu a goroga? Mwa gu alakanya gukhenu hi na ni tshivba guvbindra uye, gani?

²³Silo satshavbo si ngu dzumedziswa, aholu khandri satshavbo si vbahago muthu; silo satshavbo si ngu dzumedziswa, aholu khandri satshavbo si phasago gukhodwa.

²⁴Muthu a nga dwaneli basi esi si mu tsakisago wurumba waye, aholu muthu ni muthu a na dwanele esi si tsakisago muthu kwawe.

²⁵Hodzani satshavbo si rengiswago bazarini nyamba kanakana mahingigedzoni gwanu,

²⁶ kholu litigo ni silo satshavbo sa tigoni sa gu lumba Pfhumu.

²⁷Mwa gu ranwa guya hodza ndrangani ga muthu a si gu mukhodwa, hodzani, nyamba kanakana mahingigedzoni gwanu, satshavbo esi a mi ningago.

²⁸Aholu wa gu embedwa khu muthu, khuye: “Wona gukhuwe eyi nyama nya guphasedwe vanungungulu nya malipha,” u nga hodzi khu kotani nya guninge githawo mahingigedzo ya wule a nga gutivisa.

²⁹Esi nyi ganelago kha nyi kheni khu gupima gwanu, aholu khu gupima ga mumbe muthu. Khu ginani gutshulega gwangu gu lamudwa khu mahingigedzo ya mumbe muthu, na?

³⁰Nya gu bonga Nungungulu khu guhodza nyi hodzago, khu ginani va nga nyi lembago khu kotani nya esi nyi bongago khiso Nungungulu?

³¹Khu kharato, gani mwa gu hodza, gani mwa gu sela, ni gevbini gimbe gilo mu girago, satshavbo girelani gu rungudza Nungungulu.

³²Mu nga khali gikhunguvanyiso ga Vajudha, ga va nya mayigo mwendro ndrani nya libandla la Nungungulu.

³³Girani kha nga eni nyi dzi garadzago khu gu vbweta gutsakisa vathu vatshavbo, siloni gwatshavbo, nasiri gudwanela esi si nyi nengedzisago wurumba wangu, aholu khu gudwanela esi si phasago va nya gutala, vafela gu vbanyiswa.