Read gitonga 1 Vakorinto 11 Bible Online

1 Vakorinto 11 - gitonga bible

1 Vakorinto 11

¹Landrisani mavbanyelo yangu kha nga eni nyi landrisago ya Kristo.

²Nyi ngu mi zundza, vandruye, kholu mu ngu nyi alakanya ga silo satshavbo, ni gu sayisa milayo nyi nga mi tshiyelani.

³Aholu, nya gu vbweta mu dzitini gukhenu Kristo khuye hungo a fumelago vathu vatshavbo, kha nga mwama a fumelago nyamayi, kha nga Nungungulu a fumelago Kristo.

⁴Mwama a gu gira nombelo mwendro gu ganela mahungu khu lina la Nungungulu na fenengede hungoni, a gu thela dzitshoni Kristo a gu hungo waye.

⁵Nyamayi a girago nombelo mwendro gu ganela mahungu khu lina la Nungungulu na funungude hungo, a gu thela dzitshoni mwama waye. Khidzosaye ni gu vidwa ndzudzu.

⁶Nyamayi a gumba hunga gikhongelo hungoni, a na gaye ndzudzu! Aholu a gu khala dzitshoni gu gaya mwendro gu vbaludwa, a na hunge gikhongelo!

⁷ Gasi vama, kha gu vbwetegi va fenengela hungoni, kholu khavo giwonegiso ni wuzundzo wa Nungungulu, gasi nyamayi khuye wuzundzo wa mwama.

⁸Khandri mwama a nga duswa khu ga nyamayi, aholu nyamayi khuye a dusidwego khu ga mwama.

⁹ Gambe khandri mwama a nga girwa khu kota nya nyamayi, aholu, nyamayi khuye a nga girwago khu kota nya mwama.

¹⁰Nari guralo, nyamayi fanede gu vega hungoni gilo gi yeyedzago gupwani a gu fumedwa, khu kotani nya dzingilozi.

¹¹Ambari ulo, ga Pfhumu, mwalo nyamayi nyambana mwama, kha nga gambe a gu mwalo mwama nyambana nyamayi.

¹²Kholu ha gukhethu nyamayi a di duswa khu ga mwama, hi na gambe khethu mwama a gu velegwa khu nyamayi. Satshavbo sa guta khu ga Nungungulu.

¹³Nga lamulani enu vamune: Ina mwa gu wona nari gwadi nyamayi guya gira nombelo ga Nungungulu nyamba fenengela gilo hungoni, gani?

¹⁴Tumbunugo wu ngu hi hevbudza gukhuwo dzitshoni mwama gu dandrisa ndzudzu.

¹⁵Aholu, nyamayi a gu dandrisa ndzudzu wumburi, kholu ningidwe ndzudzu nya gulaphe gasi wu khala gifenengelo gyaye.

¹⁶Aholu, oyu a ganedzago esi a na khale na gu dziti gukhuye ethu hi mwalo giolovedzo gyogyo, ni mabandla ya Nungungulu nayo ma mwalo nagyo.

¹⁷Ga esi nyi vbwetago gu mi embela olu, nyi mwalo gu mi zundza. Kholu mitshangano yanu kha yi mi phasi gu khala tshukwana, aholu ya gu mi vivbisani.

¹⁸Gilo nya guhegule, nya gupwa gupwani mwa gu bani mu tshanganide gu manega guhambana vbakari gwanu. Eni nyi ngu khodwa gukheni, gu ngu manega furi.

¹⁹Gwadi gu manega guhambanelana nya mavbanyelo mwendro makhalelo, gasi gu wonega avo va gu vakhodwa nya lisine vbakari gwanu.

²⁰Aholu enu kha mu tshangani dangamwedo khu gighelo nya guta hengela gilaleloni ga Pfhumu,

²¹kholu muthu ni muthu a gu tutumela gu hodza gilalelo gyaye a ngatago nagyo, gu manega gu vambe va khala ni ndzala, vambe va leva.

²²Ina mu mwalo magaya nya guhodze ni gu sela iyo, gani? Khu ginani mu kanyisa libandla la Nungungulu, muya thela dzitshoni vale va gu mwalo gilo? Mwa gu vbweta nyi mi embela kheni ginani? Mwa gu vbweta nyi mi zundza, gani? Ahihi, ga esi silo kha nyi mi zundzi ne vbadugwana!

²³Khaguva eni nyi hakhide ga Pfhumu esi nyi mi tivisago: Pfhumu Jesu, ni wutshigu a nga ningedwago khuwo, a di dzega gibaba,

²⁴a bonga Nungungulu, a gi pila a ganela, khuye: “Egi khu givili gyangu gi ningedwago khu kotani yanu. Girani esi kha nga gialakanyo gyangu.”

²⁵ Khu magirelo ya mamowo, guhegisani nya gilalelo a di dzega gikombe a ganela, khuye: “Gikombe gegi khu gidzumeledzwano nya giphya gi nga tiyiswa khu novba wangu; gikhati gyatshavbo mu selago gikombe gegi, selani na mu gu nyi alakanya.”

²⁶ Khu kharato, gikhati gyatshavbo mu hodzago gibaba gegi, mu sela gikombe gegi mwa gu tivisa gufa ga Pfhumu kala a gu wuya.

²⁷Khu kharato, gani khu mani a hodzago gibaba ni gu sela gikombe gya Pfhumu nari mwalo fanelo, a ngu mana nandru nya gughohele Givili ni Novba wa Pfhumu.

²⁸Muthu ni muthu a na dzi lole uye mune wurumba waye, na si gu hodzi gibaba ni gu sela gikombe gya Pfhumu.

²⁹Kholu oyu a hodzago ni gu sela nyamba hambanisa Givili gya Pfhumu, a gu hodza ni gu sela gumbemba gwaye.

³⁰Khigyo gi giridego gu manega vbakari gwanu nya vangi va vbedego tshivba, va dwalago, ni vambe nya vangi va fudego.

³¹Gasi ha gu dzi lola ethu vamune hi dzi lamula, kha hi na lamudwa khu Nungungulu.

³²Pfhumu a gu hi lamula a gu hi laya, gasi hi si tsayiswi gumogo ni litigo.

³³Khu kharato, vandruye, mwa gu bani mu tshanganide, guta hodza gilalelo gya Pfhumu, muthu ni muthu a na lindrele vakwawe.

³⁴Oyu a gu ni ndzala a na hodze gaya, gasi tshangano wanu wu si mi raneli likhulo la Nungungulu. Gasi khu esi simbe, nyi nata mi laya na nyi vbohide iyo gwanu.