Read gitonga 1 Vakorinto 12 Bible Online

1 Vakorinto 12 - gitonga bible

1 Vakorinto 12

¹Vandruye, kha nyi vbweti mu hangwa khu mahungu nya siningwa nya Liphuvbo.

²Mu ngu dzitini gukhenu na mu si gu hakhi gukhodwa, mu di gu khozela vanungungulu nya malipha, nya dzimbeveve.

³Khu kharato, khalani na mu gu pima gukhenu mwalo muthu a ganelago khu tshivba nya Liphuvbo la Nungungulu, khuye: “Jesu a na vadwe,” Gambe mwalo muthu a dzi kodzago gu ganela, khuye: “Jesu Pfhumu” a gumba kutsedzedwa khu Liphuvbo nya Guage.

⁴Siningwa si hambane, aholu, Liphuvbo limwedo;

⁵Mathumelo ma hambane, aholu Pfhumu mweyo basi;

⁶Yomo mithumo nya guhambane, aholu Nungungulu Moyo basi. Khuye a ningago vathu vatshavbo tshivba nya guthume.

⁷Siningwa nya Liphuvbo nya Guage sa gu wonegiswa ga moyo ni moyo, gasi gu phasedzela vatshavbo.

⁸Womo a ningwago gu ganela khu mapimo, mumbe a ningwa gu ganela mahungu nya guti. Satshavbo sa gu ningwa khilo Liphuvbo la limwedo.

⁹Khilo gambe Liphuvbo la limwedo li ningago mumbe gukhodwa, mumbe tshivba nya guhawulugise madwali;

¹⁰mumbe a gu ningwa tshivba nya gugire siliwugiso, mumbe a ningwa gu ganela khu lina la Nungungulu, mumbe a ningwa gupima maphuvbo; mumbe a gu ningwa gu ganela malimi nya guhambanelane, mumbe a ningwa gukodza gutshamusela malimi.

¹¹Aholu, Liphuvbo khilo la limwedo basi li girago silo sesi satshavbo; khilo li kavedzelago ga moyo ni moyo siningwa khedzi li golago khidzo.

¹² Kha nga givili gi gu gimwegyo basi aholu gi manega ni sivbango nya singi si wumbago givili gimwegyo basi, khidzo gambe kharato ni ga Kristo.

¹³Ethu hatshavbo: Vajudha ni ava va si gu Vajudha, dzikhumbi ni va nya gutshulega, hi bhapatisidwe khu Liphuvbo la limwedo, gasi hi khala givili gimwegyo basi. Ethu hatshavbo hi hakhide Liphuvbo la limwedo.

¹⁴Khu lisine, givili khandri givbango gimwegyo basi, aholu singi.

¹⁵Ngondro wa gu ganela, khuwo: “Olu eni nyi si gu mandza kha nyiri wa givili” malipha, wa gu lumba givili.

¹⁶Ndzeve ya gu, khiyo: “Olu eni nyi si gu liso kha nyiri wa givili,” malipha, ya gu lumba givili.

¹⁷Nari pwani givili gyatshavbo maho basi, hi di hadza gupwa kharini? Mwendro nari pwani gyatshavbo ndzeve, hi di hadza gupwa khu ginani gununga?

¹⁸Aholu Nungungulu vegide vbagivilitunu sivbango satshavbo, gimwegyo ni gimwegyo wulanga waye, edzi si nga mu tsakisago khidzo.

¹⁹Nari pwani givili gyatshavbo givbango gimwegyo basi, na giri hayini givili?

²⁰Givili gi na ni sivbango nya singi aholu gimwegyo basi.

²¹Maho kha ma dzi kodzi gu embela mandza, khayo: “Kha hi gu vbweti.” Hungo kha wu dzi kodzi gu embela mawundru khuwo “Kha nyi mi vbweti.”

²²Sivbango si wonegago gukhwatshi si mwalo tshivba, khiso si vbwetegago ngudzu.

²³Givilini, sivbango sile hi gukhethu si mwalo wuzundzo, khiso hi si thelago ngudzu kota, hi si fenengedzela khu wuzundzo. Esi hi pwago khiso dzitshoni, khiso hi si sayisago khu githawo guvbindra simbe.

²⁴Gasi sivbango si guromo gukhadzisegani, kha si keneledwi khu gilo, kholu Nungungulu a nga wumba givili a di vega githawo nya gikhongolo ga sivbango sile nya gusolege.

²⁵Giride kharato gasi gu si manegi guhambana givilini, gasi givbango ni givbango gi thela kota khu gikwawe, kha nga edzi gi dzi sayisago khidzo gyabune.

²⁶Gya gu saniseka givbango gimwegyo, satshavbo sa gu saniseka gumogo nagyo; gya gu zundzwa givbango gimwegyo, satshavbo sa gu nengela gumogo nagyo.

²⁷Enu mu givili gya Kristo. Moyo ni moyo wanu givbango gya Kristo.

²⁸ Nungungulu vegide muthu ni muthu wulanga waye ndrani nya libandla: Guphela khu Vapostoli, gu handzamedza vaprofeti; nya wuraru khu vahevbudzi; gu bela va nya gu gira siliwugiso ni gu hawulugisa madwali, ni va nya gu sayisa sisiwana, ni vathangeli, ni va nya gu ganela malimi nya guhambanelane.

²⁹Ina vatshavbo va na khala Vapostoli, ni vaprofeti ni vahevbudzi, gani? Ina vatshavbo va na ni tshivba nya gugire siliwugiso, gani?

³⁰Khandri vatshavbo va ningidwego tshivba nya guhawulugise madwali, ni gu ganela malimi nya guhambanelane ni gu ma tshamusela.

³¹ Khu kharato, dzi garadzeni khu gu vbweta siningwa nya lisima ngudzu. Ndzila nya yadi guvbindra dzatshavbo kheyi nyi vbwetago gu mi yeyedza olu.