Read gitonga 1 Vakorinto 13 Bible Online

1 Vakorinto 13 - gitonga bible

1 Vakorinto 13

¹Ambari nari gupwani nya gu kodza gu ganela malimi yatshavbo nya vathu ni ayo nya dzingilozi, nyambana lihaladzo, magana yangu ma gu fanana ni ligwaha nya pundru wu dzumago, mwendro ni nyangendre a wombago.

² Ambari nyiri ni giningwa nya gutshumayele mahungu ya Nungungulu, ni guti satshavbo, ni gupima misihalo yatshavbo, ni gukhodwa gwatshavbo nya gu dzi kodze gu sigula sigomo, nyambana lihaladzo, kha nyiri wa gilo.

³Ambari nya gu ninga sisiwana silo sangu satshavbo, nyi wuya nyi ningela ni givili gyangu gi vbiswa, aholu na nyiri mwalo lihaladzo, kha nyi phasi gilo.

⁴Lihaladzo li na ni gutimisela ni wuwadi. Lihaladzo li mwalo lidiwo, li mwalo matshandza ni gu dzi gugumugisa.

⁵Lihaladzo kha li giri esi nyamba yela, kha li dwaneli gu dzi tsakisa, kha li khali likhulo, mwendro guvbisega khu kota nya gu pimise guvivba li giredwago.

⁶Lihaladzo kha li nengeli khu muthu gu gira esi nyamba yela, aholu la gu nengela khu gu wona lisine.

⁷Lihaladzo li ngu rwala satshavbo, li gu khodwa satshavbo, li gu tumba gikhati gyatshavbo ni guhunisela satshavbo.

⁸Lihaladzo gima kha li vbeli. Wu na vbindra wuprofeti, malimi ma na fuva, ni guti gu na vbela.

⁹Kholu wuprofeti ni guti gwathu kha si vbeleli.

¹⁰Gikhati gu na vbohago esi nya guvbelele, si na fuva satshavbo esi nyamba vbelela.

¹¹Eni na nyi ngari gyanana nyi di ganela kha nga gyanana, nyi pimisa kha nga gyanana, nyi alakanya kha nga gyanana. Na nyi dandride nyi khala mwama, nyi di diga mavbanyelo nya wanana.

¹²Olu ha gu wona kha nga vbalibonatunu nya gupfhurele; gi na vboha gikhati hi na wonago satshavbo khovbe ni khovbe. Olu guti gwangu gu ngu kenelela, aholu, khu gikhati gyakone nyi nati satshavbo kha nga edzi nyi tidwago khidzo.

¹³Olu gu nga emide esi sa siraru: Gukhodwa, Gutumba ni Lihaladzo. Ga esi sa siraru gikhongolo khu lihaladzo.